**مافن الكوسى والجزر ** و **كب بيتزا ** من مطبخي

[ladymillion]

السلام عليكم أعزائي انشاء الله تكونوا بخير
جبتلكم مقبيلتين نتمنى يعجبوكم ونفيدكم بيهم --مافن الكوسى والجزر -- و -- كب بيتزا --


نبداو بــ الوصفة الاولى (( بسم الله ))



--- مافن الكوسى والجزر ---

بالنسبة للحشوة :
حبة جزر مبشورة
حبة كوسى مبشورة ( جريوات ) COURGETTE
حبة بصل صغيرة مقطعة رقيقة
ملح -- فلفل أسود


الطريقة:

في مقلاة نحط شوي زيت وشوي مارغارين تذوب ونقليو فيها البصل والجزر + التوابل مع التقليب مرة على مرة حتان تذبال شوي نضيفولها فنجان ماء ونضيف الكوسى




نحركوهم شوي ونقفل عليهم ونخليوهم على نار هااادئة يطيبو شوي لمدة 7د هكاك ونطفي عليهم نخليوهم على جهة

الآن نحضر خليط العجين يمكنن أن نقول نحتاج :
7 م ك فرينة
1 م ك نشا
2 بيضات
ملح -- فلفل أسود -- موطارد -- فص ثوم
نصف باكي خميرة الحلوى
فنجان زيت
بيكاربونات غير شوي على رأس الملعقة
نصف كأس حليب (( كأس لي كيلت بيه نتاع 250ملل ))


بواسطة الخلاط الكهربائي نخفق البيض + التوابل حتى يبياض البيض ويتضاعف حجمه + الزيت + الفرينة والخميرة والبيكربونات هاك يكون قوامها ثقيل


من بعد نزيد الحليب ونخفق غير شوي ويكون الخليط سائل
نخلط الحشوة مع الخليط وزيدي شوي فروماج كيما في الصورة



ونحط كمية في مول صغار نتاع السيليكون أو نتاع الحديد


نحطها في الفرن سخون تشعليه بـ 15د قبل بحرارة 180° الصينية تكون في الوسط المدة حتان يحماروا من تحت ومن فوق



الوصفة الثانية --- كب بيتزا ---

المقادير :

8 م ك فرينة
2 بيضات
ملح -- فلفل أسود -- موطارد -- فص ثوم
نصف باكي خميرة الحلوى
فنجان زيت
نصف كأس حليب


الحشوة حاجة اقتصادية
علبة طون طماطم
حبة طماطم صغيرة مقطعة
كمية من الجبن الطري (( تقدري تستعملي المبشور ))
زيتون مقطع
(( الحشوة تقدري ديري واش حبيتي لحم أو دجاج ))


الطريقة نفسها كيما الاولى وحتى هي تكون سائلة لكن منخلطش الحشوة مع الخليط


نحط 2 ملاعق كبيرة من الخليط في المول كيما في الصورة

ونزيد كمية من الحشوة فوقها من غير ما نخلط وندخلها الفرن سخون تشعليه بـ 15د قبل بحرارة 180° الصينية تكون في الوسط المدة حتان يحماروا من تحت ومن فوق

وهكذا تقدم
قولولي ملييييحة ؟؟؟؟ اقتصادية ؟؟؟ وأنا نقولكم جلربوها راهي بنينة






تقبلوا تحياتي