أخبروني اخواتي ماهو سر المذاق الطيب في أكلك ؟

[قاصِرَةُ الطّرْف]

السلام عليكم ورحمة الله و بركتاه
في الرمضان السابق كنت اساعد امي في المطبخ و انظر الى كل كبيرة وصغيرة تقوم بها كنت كمساعدة فقط و تقلي إفعلي كذا و لا تفعلي كذا
لكن في هذا الرمضان سأتولى زمام الأمور لوحدي و هذا كإختبار لي مشكلتي هي عندما اطبخ شيء يكون طعمه مقبول و لكن مقارنة بطيخ امي فإنه لا يكون بنكهة طيبة كطبخ امي مع اني اقوم بكل ما تخبرني عنه وهي اخبرتني بان الطبخ نفس و رغبة و عينك ميزانك في المقدار
لمذا النكهة و المذاق يختلف من يد الى اخرى مع انه حتى و إن كان نفس المقادير و نفس المكيالو نفس الطريقة
ماهو السر عند كل واحدة منكن بالضبط

[إكليل]

و عليك السلام و رحمة الله تعالى و بركاته

أهلا بأختنا راية العدالة جميل منك أن تسألي و تبحثي عن الطرق الفضلى في الطبخ .

أختي كل واحد و ذوقه و كل واحد و طريقته في إعداد الطعام و بما أنك مبتدئة ما تقلقيش روحك لأن هذا يأتي بعد التجريب و الممارسة فكما يقال الممارسة تعلم الإتقان و لا مجال للمقارنة بينك و بين أمك العزيزة .

أما عني أنا فأنا أكثر من البصل في الحرير و الشوربة و و الطاجين زيتون جلبان أو لوبيا خضراء و غيرها البصل عندي نقليه أول شيء مع الملح و الزيت نقليه حتى يصبح لونه مكرمل طبعا مش محروق فهو بهذه الطريقة يعطي حلاوة للمرق و نكهة رائعة.

و كل طاجين و تركيبة توابله الخاصة به.

نتمنى تكوني فهمتي و ربي يوفقك و إذا مازال عندك أسئلة تفضلي فأكيد راح نستفيد منها

[*نآدرة~]

يقولو ناس بكري"الماكلة يدين"يعني كل واحد وبنة يدو


ماتتقلقيش حنونة غير بشوية،،وزيد كل واحدة فينا لو تسقسيها تقولك ماكلتي عادية لكن كي يتذوقوها الآخرين ميش هي نفس البنة،،انا مرات ننخلع كي يقعدو يشكرو في ماكلتي لي تبانلي اقل من العادية

بالتوفيق

[ام فروحة]

حتى انا نفس الشيء رغم اني ربت بيت ولكن وجدت وحدة من خواتاتي هنا في المنتدى قالت انه كل من يذوق ماكلتها يقول بنينة حتى لوكانت بطاطا راقو والسر هو وضع ملعقة صغيرة من مايوناز في المرق وانا بصراحة وبكل صدق ملي راني ندير هاذي العفسة والله غير دوق خاص ومميز مثلا عندما تعملين صوص طماطم ننصحك انك في الاخير ديري شوية زعيترا وشوية سكر اه ونسيت السر انك تقلي نص كمية الثوم المستعمل مع الزيت والبصل والنصف الاخر ضيفيه حتى كي ديري طماطم يعني مايكونش مقلى صيه ورجعيلي الخبر

[ام فروحة]

نعطيك معلومة هامة فيما يخص الخبز اذا بغيتيه خبز زمان اولا صنعي محسن اي خميرة طبيعية ولي هي شوية دقيق مع الماء فقط دون عجن كي تتلملك العجينة وماتكونش ناشفة جي شوية جارية يعني تتلصق في اليدين وماتديريش الملح لان الملح يكسر الخميرة مايخليهاش تتخمر وثاني سر اذا كان العجين من السميد ماعليك غير بالدلك ولازم يكون يتلصق في اليدين وخليه يخمر بجيه ثم بعد ربع ساعة رجعي كسريه وخليه يخمر ثم ديريه خبيزات خليهم يرتاحوا غير شوية بعد ذلك خبزيهم ونسيت استعملي السكر وخميرة الحلوى يولي خبزك هش واذا كتب ربي غادي نصورلك الخبز كي نديره باذن الله يجي فارغ من الداخل وهش

[sara ab]

يعطيك ربي ما تتمناي

[رودينة19]

السلام عليكم، تصوموا بصحة والهنا ان شاء الله، اذا حبيتي الماكلة تجيك بنينة السر في أنك تقلي البصل والحم مليح ومن بعد تمرقي، تجي الماكلة بنينة ماشي كيما ليرموا كل شيئ بلاما يقلوا وبتعود رايح تكسبي خبرة في الطبخ، أهم سر هو أنك تكوني تحبي الطبخ.

[attiamustapha]

انا عن نفسي نحب نقلي اللحم او الدجاج مليح وبعد نضيف البصل و التوابل

[sira1993]

اختي درك نقولك
الماكلة باش تجي بنينة لازم تنجح في المرحلة الاولى من طيابها يعني في مرحلة قلي البصل
البصل لازم يتقلا وحدو مليح بشرط مايتحرقش طبعا مع الملح والتوابل والثوم والدبشة والمعدنوش وو....... وبعد مايتقلا البصل مليح تضيفيلو الطماطم وتخليها تتقلى مع البصل
لاخاطرش لوكان تديري الطماطم والبصل فالاول مع بعض البصل ماراحش يتقلى مليح وبالتالي مايطلقش بنتو

مبعد كي يتقلا كلش راكي تمرقي وماتكثريش الماء باش ماتروحش البنة اللي فيه هذا بالنسبة للشوربات والمرقة و تختلف حسب واش رايحة تطيبي

يعني اذا عددكم بزاف فالعايلة راكي تكثري البصل باش تجي مليحة وبنينة

نسيت تاني اذا رايحة تطيبي باللحم واللا بالدجاج لازم تتبليهم مليح قبل ماتطيبيهم وفي مرحلة القلي لازم يتقلاو مليح يعني لازم تطولي شوية مرحلة القلي باش تدخل البنة فيهم

ان شاء الله نكون افدتك شوية


سلااام