طاجين الحلو بيتني نبكي..يا لبنات شورو عليا..

عمري ضايع · 2013-07-24, 15:24

السلام عليكم...
من وقت بديت نتعلم وطاجين الحلو نطيبه بلا لحم ومام بلا سمن او زيدة..بالمختصر ندير الفواكه الجافة في ماء يغليو..وكي يغليو مليح ندير ماء زهر وعود قرفة والسكر..ونخليه يعقد مليح..وكي يوجد نحط منه والباقي اذا بقالي نديره فالثلاجة وميخسرليش يجي بحال المربى....
المهم حكايتي وما فيها راني مخطوبة لتيبازة وان شاء الله بنات تيبازة يفيدوني...المهم مرت اخ خطيبي جابتها طريق للغرب وعرضتها تفطر عندنا..ودرت ليها طاجين الحلو بطريقتي....عجبها وكلات بصح قالتلي غير ولفي روحك طيبيه باللحم والبصل والسمن..قالتلي كون يسمعو بيك الناس يضحكو عليك وقالتهالي قدام فاميلتي..حسيتها اهانتني....بكيت وكي جيت لقسم الطبخ نتاع الجلفة لقيت كامل طواجين الحلو كيما قالتلي هي...يعني انا غالطة والطاجين اللي نديره انا ميصلحش....ولعلمكم عجوزي متاكلش لحم حلو تاكل غير الفواكه اللي فالطاجين...
وش رايكم نعتمد طريقتي ولا نبدل كيفما قالتلي هي...

yara djoumana · 2013-07-24, 15:30

ننصحك نصيحة واش رايك تسالي زوجك كيفاش يحب ياكلو و طيبيلو بويسك النساء و امالين الراجل راو مايعجبهمش لعجب
الا من رحم ربك وطيبي اطيابك كل واحد عندو طريقتو ..........................

حياتي نبع امل · 2013-07-24, 15:31

اقتباس:

المشاركة الأصلية كتبت بواسطة عمري ضايع

السلام عليكم...
من وقت بديت نتعلم وطاجين الحلو نطيبه بلا لحم ومام بلا سمن او زيدة..بالمختصر ندير الفواكه الجافة في ماء يغليو..وكي يغليو مليح ندير ماء زهر وعود قرفة والسكر..ونخليه يعقد مليح..وكي يوجد نحط منه والباقي اذا بقالي نديره فالثلاجة وميخسرليش يجي بحال المربى....
المهم حكايتي وما فيها راني مخطوبة لتيبازة وان شاء الله بنات تيبازة يفيدوني...المهم مرت اخ خطيبي جابتها طريق للغرب وعرضتها تفطر عندنا..ودرت ليها طاجين الحلو بطريقتي....عجبها وكلات بصح قالتلي غير ولفي روحك طيبيه باللحم والبصل والسمن..قالتلي كون يسمعو بيك الناس يضحكو عليك وقالتهالي قدام فاميلتي..حسيتها اهانتني....بكيت وكي جيت لقسم الطبخ نتاع الجلفة لقيت كامل طواجين الحلو كيما قالتلي هي...يعني انا غالطة والطاجين اللي نديره انا ميصلحش....ولعلمكم عجوزي متاكلش لحم حلو تاكل غير الفواكه اللي فالطاجين...
وش رايكم نعتمد طريقتي ولا نبدل كيفما قالتلي هي...

انا وحدة من الناس نطيبو بلا لحم خاطر مكانش اللي ياكلو ياكلو فيه الفاكهة فقط
طريقتي ندير كيلة سكر مع زوج كيلات ماء ونخليهم يغليو ونزيد عود قرفة ونحط التفاح يطيب في نصف طيابو نزيد البرقوقة او العينة والمشماش ونخليهم كي يولي قريب يعقد نزيد زبيب
اما البرقوق والمشماش قبل ما نطيبهم نحطهم في طبسي ونفرغ عليهم ما سخون مدة ربع ساعة قبل ما نضيفهم
في الاخير كي نطفي ندير عليه خليط ماء ورد وماء الزهر
انتى كي تتزوجي وتشوفيهم كيفاش يطيبوه سوا طيبي كيما هوما سوا طيبي بطريقتك وشوفي بالاك يعجبهم
وزيد وعلاش يضحكو كل منطقة وكيفاش طريقة طيابها هدي مافيهاش ضحك
ربي يوفقك ان شاء الله

زنجبيل11 · 2013-07-24, 15:32

ما تبكي ما ولو كاين بزاف يديروه بدون لحم
حتى اني سمعت الحلو المودارن راهم يديروه بدون لحم

مسعودي خولة · 2013-07-24, 15:39

السلام عليكم اختي ان شاء الله خير

انا ساعة نديرو باللحم ساعة نديرو كيما انت و ماديريهاش في راسك خليها تهدر كيما تحب ياك الهدرة باطل نتي واش عليك ديري اتعلميه بكل طرقه باللحم و لا بلا لحم و كي تروحي لعندهم كي تعودي رايحة ديريه ديريه باللحم وشاوري عجوزتك ماتبكي ماوللو يقولك المثل

نسا لاسلاف كي الحمة فوق الكتاف قولها كليتي كليتي حتى شبعتي ومنبعد نضتي تهدري هذا لي قالك توكل في الغلة وتسب في الملة

انا وش نقولك يا اختي والله راكي كي اختي انا ثاني رايحة عروسة اتعلمي كل شيء لي يقولولك طيبيها قوليلهم نعرفها هكذا باه ماتخليهم يهدرو عليك حتى حاجة انا نعرف ناس الغرب كرماء اما ناس الوسط فيهم غير الفم عن تجربة هذا واش نقولك اختي كثرت عليك بالهدرة اسمحيلي وهذه كلها نصائح لوجه اللله و ربي يهنيك ان شاء الله اختي و يجمع بيناتكم بالمحبة

عمري ضايع · 2013-07-24, 15:41

اقتباس:

المشاركة الأصلية كتبت بواسطة yara djoumana

ننصحك نصيحة واش رايك تسالي زوجك كيفاش يحب ياكلو و طيبيلو بويسك النساء و امالين الراجل راو مايعجبهمش لعجب
الا من رحم ربك وطيبي اطيابك كل واحد عندو طريقتو ..........................

بارك الله فيك اختي..راجلي يحب الحلو وكل ما يجي عندنا يقولي عندكي تنسي الحلو ولا مرة قالي مش مليح ولا احنا منديروهش هك...ديما ياكله ويقولي يعطيك الصحة...

اقتباس:

المشاركة الأصلية كتبت بواسطة حيهتى كلها امل

انا وحدة من الناس نطيبو بلا لحم خاطر مكانش اللي ياكلو ياكلو فيه الفاكهة فقط
طريقتي ندير كيلة سكر مع زوج كيلات ماء ونخليهم يغليو ونزيد عود قرفة ونحط التفاح يطيب في نصف طيابو نزيد البرقوقة او العينة والمشماش ونخليهم كي يولي قريب يعقد نزيد زبيب
اما البرقوق والمشماش قبل ما نطيبهم نحطهم في طبسي ونفرغ عليهم ما سخون مدة ربع ساعة قبل ما نضيفهم
في الاخير كي نطفي ندير عليه خليط ماء ورد وماء الزهر
انتى كي تتزوجي وتشوفيهم كيفاش يطيبوه سوا طيبي كيما هوما سوا طيبي بطريقتك وشوفي بالاك يعجبهم
وزيد وعلاش يضحكو كل منطقة وكيفاش طريقة طيابها هدي مافيهاش ضحك
ربي يوفقك ان شاء الله

ربي يبارك فيك....الحمد لله طريقتك وطريقتي في طيابه كيف كيف...يعني عادي يطيب بلا لحم...

اقتباس:

المشاركة الأصلية كتبت بواسطة زنجبيل11

ما تبكي ما ولو كاين بزاف يديروه بدون لحم
حتى اني سمعت الحلو المودارن راهم يديروه بدون لحم

ربي يخليك اختي...والله هذا وين طلعلي المورال قلت خلاص انا اللي غالطة ودرك تضحك عليا الناس الكل....الحمد لله كان بزاف يديروه بلا لحم..
ربي يجازيكم خير ويعطيكم ما تتمناو

عمري ضايع · 2013-07-24, 15:44

اقتباس:

المشاركة الأصلية كتبت بواسطة مسعودي خولة

السلام عليكم اختي ان شاء الله خير

انا ساعة نديرو باللحم ساعة نديرو كيما انت و ماديريهاش في راسك خليها تهدر كيما تحب ياك الهدرة باطل نتي واش عليك ديري اتعلميه بكل طرقه باللحم و لا بلا لحم و كي تروحي لعندهم كي تعودي رايحة ديريه ديريه باللحم وشاوري عجوزتك ماتبكي ماوللو يقولك المثل

نسا لاسلاف كي الحمة فوق الكتاف قولها كليتي كليتي حتى شبعتي ومنبعد نضتي تهدري هذا لي قالك توكل في الغلة وتسب في الملة

انا وش نقولك يا اختي والله راكي كي اختي انا ثاني رايحة عروسة اتعلمي كل شيء لي يقولولك طيبيها قوليلهم نعرفها هكذا باه ماتخليهم يهدرو عليك حتى حاجة انا نعرف ناس الغرب كرماء اما ناس الوسط فيهم غير الفم عن تجربة هذا واش نقولك اختي كثرت عليك بالهدرة اسمحيلي وهذه كلها نصائح لوجه اللله و ربي يهنيك ان شاء الله اختي و يجمع بيناتكم بالمحبة

ههههههههههههه بارك الله فيك اختي واضحك الله سنك...عجبني المثل اللي قلتي نسا لسلاف كي اللحمة فوق لكتاف...والله صح....
حتى انتي اختي ربي يهنيك ويعطيك ما تتمناي وان شاء الله سعد الهنا كيما نقولو....وما كثرتي هدرة ما والو كل كلمة نصحتيني بيها ربي يجازيك خير بيها

اسماء منار · 2013-07-24, 16:02

شوفي حنونتي ما تبكي ما والوحاجة ما تستاهل تنزلي عايها دمعاتك العزاز
حبيبتي انت تعرفي طيبيه بلا لحم زيدي تعلمي طيبيه بطريقتهم والنات عندك ابحثي راح تلقاي وان شاء الله لما تروحليهم سقسي حماتك كيفاش تحبو والزوج ايضا كيفاش يحبو اذا كان بالحم تعرفيه واذا كان بلا بيه تعرفيه ماكانش مشكل وربي يكملك ان شاء الله وهنيك ويجعل حياتك كلها سعادة ان شاء الله

عمري ضايع · 2013-07-24, 16:18

اقتباس:

المشاركة الأصلية كتبت بواسطة اسماء منار

شوفي حنونتي ما تبكي ما والوحاجة ما تستاهل تنزلي عايها دمعاتك العزاز
حبيبتي انت تعرفي طيبيه بلا لحم زيدي تعلمي طيبيه بطريقتهم والنات عندك ابحثي راح تلقاي وان شاء الله لما تروحليهم سقسي حماتك كيفاش تحبو والزوج ايضا كيفاش يحبو اذا كان بالحم تعرفيه واذا كان بلا بيه تعرفيه ماكانش مشكل وربي يكملك ان شاء الله وهنيك ويجعل حياتك كلها سعادة ان شاء الله

والله اختي حراير قسم الطبخ ما شاء الله عليهم حاطين وصفات طاجين الحلو باللحم وقادرة نتعلمه بسهولة....لكن سلفتي وطريقة كلامها معايا حيرتني قالتها بسخرية حسيت نفسي الوحيدة في هذ العالم اللي نطيبه بلا لحم وليت نشوف روحي منعرفش....خاصة انها كي قالتلي ديريه باللحم مش بيني وبينها قدام زوجها واهلي...الحمد لله مكانش خطيبي وعجوزي حاضرين كون تبهدلت اكثر.....
ربي يهنيك انتي تاني ويرزقك ما تتمناي ويجعل حياتك سعادة..

oum tesnime · 2013-07-24, 17:55

قوليلها الحلو تاعي تقريبا صحي مافيش ليدام والشحومات واللحومات

نقولك حاجة أختي شوفي راجلك وش يحب و مدابيك ما تخلي حتى وحدة تدخلك في حياتك

اليوم بداتلك بهاد القصة غدوة مانيش عارفة وش راح تقول

وبالنسبة لطريقتك هي نفس طريقتي وكي تروحي لدار راجلك إن شاء الله شبحي بلجلجلان من فوق وفارسي الحبات تاع البرقوق باللوز مطحون شوي خشين وشوي قرفة

كنوع من التغيير

ام اولادي · 2013-07-24, 18:05

واش راحلك فيها ديري بطريقتك و ديجا انا عجبتني طريقتك و راني كتبتها باش نطبقها اصلا مانكلش اللحم نتاعو ناكل غير الفواكه برك و نحس يلي اللحم خسارة فيه شكرا اختي

ninafret · 2013-07-24, 20:42

اختي العزيزة ماتتحيريش خلاص تعرفي بلي الغيرة موجودة بين بعض النساء ربي يهديهم
مالا نقلك كاين نساء من الغيرة ماياكلوش خلاص كي يشوفو كل خير فوق المايدة انا تاني صراتلي عدة مرات وبكيت وتدمرت مي ماشي قدامهم ومع الوقت اكتسبت مناعة لاني واثقة من اللي نعملو
اختي انتي ماكي خاسرة والو زيدي تعلمي طريقتو بالبصل واللحم واحنا في مدينتنا نعملوه باللحم والبصل ويجي روعة ادا تحبي نعملك فيه
وهكدا كي تروحي لزوجك اعمليه بطريقتك وادا قالك نحبو باللحم على الاقل تكون عندك فكرة وتعمليهولو
وفي الاخير حبيت نقلك رضاء الناس غاية لا تدرك خاصة النساء انتي اتعلمي كلشي باش منين يقصدو يلقاو
صحا فطورك حبيبتي وربي يكملك ويهنيك ومايهمك حتى واحد من غير زوجك

الأمنيات · 2013-07-24, 20:51

انا نديره بلا لحم اختي بصح فيه البصل اما ترحيه او تحطي بصله من بعد تنحيها وديري سمن او الزبدة
طريقة الاخت حياتي كلها امل راها مليحة تبعيها

ام طيري الجنة · 2013-07-24, 22:58

انتي اختي راكي مع العصر. زمان كانو يديروه باللحم و مشكلة اللي يبغي اللحم الحلو واللي يبغيه مالح اما الان فحتى في لي صال نتاع لعراس راهم يديروه بلا لحم ويديرو في الوسط نوع من انواع les charlotte
لكن تجنبا للمشاكل بسبب اشياء تافهة في الحقيقة من جهة وعملا بعاداتنا وتقاليدنا من جهة اخرى المرأة تتبع دار راجلها في طيابهم و عاداتهم حتى يوالفوها و من بعد تبقى تدوقهم بعض عاد اتها في الطياب
الله يطيب بيناتكم و الله يسخّرلك اختي

manara1704 · 2013-07-24, 23:47

salam 3likoum
saha ftourkom
ya khti matabki ma tghidhak rouhak kol wahed kifach idirou
ana nnashek ki ttzawdji kima chaftihoum yatabkho atabkhi
ou ida ma3raftich 9olilhoum iwariwlak psk tari9tak machi kima ta3houm mafihaich 3ib
wallah na3raf nssa maya3arfou idirou walou apres t3almou
ou ntiya ma cha2 allah raki haba deja tt3almi hwayedj djdod
rabi ikoun m3ak ou ihanik fi darek