وشتي نحكي لمنصور محمد

[منصور محمد]

وشتى نحكي راه قلبي متعمر .......................... حتى عقلي من المحاين ودرتو
الراي ونفسي ومعاهم الصغر ........................... شعلو في قلبي نيران فناتو
بلا ماندري صبت روحي وسط وعر ...................... لا طالب لا طبيب نفعت وصفات
بحر الحب صعيب ما قدرت نكابر .......................... ما نعرف كيفاه ذا البحر دخلتو
تعذبت وشاب راسي ذقت المر ............................ يكثر خير الصبر في الضيقة صبتو
سباب عذابي ريم سبحان القادر ............................ اسكني عقار ساعة ما شفتو
ريتو شاو صباح يمشي يتبختر ............................. .تقول انت هو القمر في ذاتو
اتشطن حالي وامشيت نستخبر ............................. ونسول في الناس يعطوني نعتو
قالولي صفونا نعطوك خبر ............................... وتبرا من الهم هذا ونعاتو
قلتلهم مسرار وفي سرو سر ................................ وسرو مكتوم عني خباتو
عيون المها عيونو ولا اكثر ................................. رامي في النظرة تقتل خزراتو
والمبسم ضاوي ابيض مثل الجوهر .......................... والخانة ع الخد كحلة وتاتو
طبعاتو كي جات ع الخد الأيسر ............................... وحواجب نخلات في واحة نبتو
خدودو تفاح في زينو لحمر ................................... يشهاه مريض يبرا من وقتو
وجهو شمس صباح كي تبدا تظهر ............................ والرقبة لعاج في الحسن ضواتو
ونيفو بلور كيفاش مسطر ..................................... ..درة وسط حزام برقت وراتو
شعرو على لكتاف طايح متبعثر............................... خيوط الفجر منين يرسل قسماتو
وريحو كيفاش من مسك وعنبر ................................ من المحال عطور تلحق نسماتو
قدو قد غزال لاطول ولاقصر .................................. صوتو نغمة عود عذبة رناتو
اسلب مني الروح خلاني نهدر................................ ..ونهترف باسماه اسمي تلفتو
قالولي محال ذا موشي بشر ................................. .هذايا ملاك روحك لاقاتو
صرالي قلتلهم ماصار بعنتر ..................................... وكثير اللي عزة فناتو
وقيس اللي كان في غرامو يدهشر............................وين يبان اليوم في همي فتو
ما نهدرش خلاص على بن معمر ............................... حيزية وسعيد ذا مثل جبتو
الفرقة يالحباب في العشق ادمر ............................... تسري كيف السم عظمي رشاتو
وشتى نحكي محبوب قلبي راه هجر ........................ بعد الوصل علاه قلبي هجراتو
اوصلني حتى قاسمني لعمر .................................... واهجرني لياه راني توحشتو
اقسى قلبك راه صار من الحجر.................................. من الصفاح تقول ذا القلب صنعتو
الما من الصفاح عيون تشرشر.................................. حقيقة ذا الشي بعينيا شفتو
طال الحال وزاد مرضي وتجذر ................................... وحالي من المحال تبرا كياتو
اوصلني يهديك ربي واستفسر..................................هجرك كاس مرار علقم شربتو
صبرت عليك شحال وماقدرتش نصبر ..........................معاك شبابي في الغباين ودرتو
داوي ضري راه زاد عليا الضر ..................................حشمتك بالله قربك والفتو
قاصد فطومة لاهند وجوهر........................................هي روح الروح لقلبي قوتو
يعذر حالي اللي اسمع مني ذاالسر ...........................يا ما هذا القلب في الحب نصحتو
وريتو كيفاش يمشي يستحذر .................................. ويخالط لجواد تزيان حياتو
محمد ياناس مهموم محير .......................................من فرقة لحباب سالو دمعاتو

السيد : منصور محمد برني نظمت القصيدة في يوم:20أوت2007
ودائما أنا في انتظار تعليقاتكم وشكرا للجميع مسبقا