واش ندير راح نهبل

[مشكلتي]

السلام عليكم بعدما ضاقت بيا مالقيتكم غير انتوما الحل علابالي غير انتوما اللي ترشدوني .. و تعاونوني...

خاوتي أنا شابة في عمري 24 سنة متوظفة و الحمد لله كنت مخطوبة قبل من شخص تعرفت عليه فالجامعة لكن لسوء الحظ تفارقنا بعد الخطبة لاسباب تافهة و معندها حتى معنى لانو هوا شخص مقلق و الحاجة الصغيرة خلاص يزعف منها و ياخذ على خاطرو هوا علابالو باللي نحبو و متمانيا نعيش معاه كل عمري لكن رغم كل هادا مادارليش حساب و خسر عليا جملة وحدة قالي نيفي زجاج إدا تكسر مايوليش المهم هادا صرا قبل 3 سنين تفارقنا و تعذبت عليه بزاف خاصة منين نسمع خبر عليه راهو مع هاديك و راهو يحب هاديكك .. حاولت نداوي روحي و قلت مالزمش نبقى على هاد الحالة لازم ننسى اللي فات فات و مايوليش .. ماشفتوش مدة عام و نص و حسيت بالراحة النفسية و بالللي نسيت كلش ... بعد عام تعرفت على شاب من ولاية أخرى بالصدفة بينلي باللي راهو يحبني و مايخلينيش و ناويني للحلال قلت بيني و بين روحي إيه نورمال لازم نبني حياتي كيما بناها خطيبي لقديم و إدا هادا صح يحبني درك يبانلي مع الايام ... المهم جا خطبني من دارنا و قبلو و كلش ..لكن المشكل فيّا مهما حاولت نحبو ماقدرتش نجي نذكر إسمو نذكر إسم خطيبي لقديم ... عييت و راني حاسة باللي نظلم فيه و ساعات نخمم نخليه بصح نخاف نعدبو .. وين نحب نتقرب منو أكتر و نعرفو أكتر يبانلي خطيبي لقديم نولي نبطّل مافهمتش بالرغم أني متيقنة بالللي مابقى حتى إحساس تجاهو نسيتو .... عاونونيي .. واش ندييييييييييييييييييييييير

[nouna l maghbouna]

ماتقوليش نسيتو راني sur مزلتي تخمي فيه و تقارني بين خطيبك لقديم و جديد

خلاص انسااايه ديري في بالك بلي ماعرفتيش انسان هكداك
اقنعي روحك

ان شاء الله تنسايه و ماتظلميش خطيبك
ربي يهنيك
ربي معاك

[بسمة تحدي]

والله عيني دمعت فعلاااااااا را حاسة بيك فعلا

هذي هيا الدنيا عمرنا مندو فيها وش حبينا الواحد لازم يصبر هذا مكان

يا اختي وش نقلك لازم تنساي الماضي .......

الماضي فات وراح وخلااااااص لازم تقنعي روحك

وتاني لازم تتقربي لربي سبحانو هو الوحيد الي يقدر على كل شئ

كي تصلي قولي يارب اخرج حبه من قلبي وان شاء الله ميكو غير الخير

ربي يكون فالعون

صعيبة والله ولكن مكاش حاجة صعيبة على ربي سبحانو

اتوكلي وخليك عندك ثقة في ربي وان شاء الله سيفرج همك عما قريب

[baalache]

هو نيفو زجاج وانتي نيفك بلاستيك اتقي الله انت مخطوبة الان

[سارق القلوب]

اختي اربطي العزيمة على النيسيان كيما خطيبك نساك بسهولة حتى انت كوني مثله لان مثل هذه الحالات قد تؤدي انهيار عصبي .. لكن

حاولي النسيان و اشعري بالمسؤلية تجاه خطيبك الثاني فهذا ايضا يساعدك . و المهم في الامر الاراااااااااااادة تصنع المعجزات و كما اوصيك بالصلاة في وقتها و الدعاء

اللهم طهر قلب اختنا
اللهم اشفها و شافها و اصلح شأنها
اللهم لا تشغل قلبها بما لا يرضيك يا حي يا قيوم
اللهم اهدهها او يسر امرها لبناء بيت الصلاح بما يرضيك عنها

[naiilia]

صح اختي لازم يكون عندك كرامة اذا كان هاذ الانسان يبادلك نفس المشاعر ماعليه كي تضحي علا جالو بصح اذا رماك وماسئلش فيك انت ثاني انسيه وماتظلميش انسان وحداخر بهاذ الافكار ارجعي لربك صلى وادعي الرشد والهداية

[hamza touazi]

انساي الهم ينساك حاولي تكوني فيدال لخطيبك الجديد وتفكري لوخر لاحك ومدارلكش كمل قيمة ايبا دديري نتي قيمة لروحك ونسايه

[Assouma 93]

لازم تبعي هذاك المثل اللي يقول "اللي بدلك بالفول بدله بقشوره" انا ننصحك مادام لقيتي واحد يحبك نتاع الصح متفرطيش فيه احسن ما تندمي من بعد يوم لا ينفعك الندم و ربي يسرلك امورك ان شاء الله

[محمد...عبد النور]

اختي الكريمة كان الله في عونك
لكن اقول لك الايام كفيلة بان تنسيك ما جرى و ما كان .........لكن مرات تأتي ذكريات معينة قد تحنين لها و لكن سرعان ما تنسى
الان امضي في حياتك و لو ان الحياة جاءت بالتمنى لبقي الناس على احوالهم
و لكن هذا الشخص شاف حياته ...اذن انت احرصي على ما ينفعك و هذا الشخص جا و خطبك من اهلك...اذن كوني على قدر من المسؤولية
ربي يتمم بالخير و انساي الماضي ...فهو امر لن يأتيك منه الا الضرر لذا تفاءلي خيرا و انظري للامام
رمضان مبارك لك و للجميع و تقبل الله صالح الاعمال
ســـــــــــــــــــــــــــــلام

[kawtar koukou]

ان الله غيور على عباده
لو تعلق قلبك باحد غير المولى عزوجل
عذبت به
كان الله في عونك اوصيك بالصبر والتقرب من الله عزوجل والتضرع اليه يبعد عنك ما انت فيه
موفقة اختي

[loufa]

الحب ياتي بعد الزواج والعشرة الطيبة
ابغي اللي يبغيك في الحلال طبعا وارمي عليك الماضي وكلما تجيك حاجة اتفكري ربي يااختي وزيد انتي ترضاي ان خطيبك الجديد يفكر في وحدة غيرك غير احسبيها بعقلك برك
وزيد ضرك تتلهاي بالتحضيرات والتصديرة ووو تنساي مع الوقت
ربي يهنيك ويهدينا ويهديك

[naamane3]

عام ونص ومازال مانسيتيه
ديري في حسابك باللي هذا الشخص اهانك
لما قال لك نيفي تاع سجاج وهذا معناه
انه لن يتسامح مع لو اخطأت معه وهذا ان أخطأت أصلا
ومثل هؤلاء الناس لا يستحقون اي معاشرة
وها قد أبدلك الله خيرا منه فماذا تريدين أكثر من هذا
غريب أمرك يا انسان تحب من يعذبك وينقص من قدرك
ادعي الله بكل تذلل أن ينسيك أمره و حبه وذكرياته
مع كثرة الاستغفار وعدم التركيز في ذكراه
ولا تكوني حمقاء آسف جدا على الكلمة لان الله اختار لك
وانت او قلبك لم يرضي باختيار ربك لك
والله المستعان

[*نآدرة~]

ربي يكون معاك أختي ويقدرك على نسيان خطيبك القديم
شوفي ماذام خطيبك الاول على جال حاجة تافهة خلاك معناتها ما يبغيكش،وزيد قلتيها بفمك منين تفارقنا راه يبني في حياتو خطرة مع هذي وخطرة مع ذيك،هذا الانسان واش تنتظري منو مليح لي ربي بعدو عليك وقرب منك شخص فور ماتعرفتي عليه قصد بابك هذا هو لي المفروض تبغيه ومل تفكري في حتى واحد مخلافو،هذي غير وساوس كل ماتتفكريه انعلي الشيطان وتفكري الاشياء لي دارهملك وما كانوش ملاح هكذا تكرهيه
ربي يوفقك ويجمعك بزوجك عاجلا غير آجل ويلقي محبته في قلبك
بالتوفيق وعجلي زواجك قدر ما تقدري
تقبل الله اعمالكم

[imene12]

اللي باعك بالفوووووووول بيعيه بقشورووووو .. كيما نساك أنسيه و كيما خرجك من حياتو خرجيه من حياتك.

[nono12]

لازم تنسيه وتشوفي حياتك
مادامو خلاك و ادار النيف حتى انتي ثاني و هذي النقطة اللي تخليك تكرهيه
اما خطيبك الثاني فانو اذا حس بهذا الشيء راح يتغير عليك لذلك لازم تحتاطي
و ما لازمش تقارني بينو و بين خطيبك
و دايما كي تصلي ادعي ربي و هو خير من يستعان
فكري فلحوايج الملاح في خطيبك و اهتمي بيه هذا الشيء يخليك تحبيه و تنسي الاخر
ربي يعنيك
راح ندعيلك معايا