عــــــــــــــــــــــــــــــــــــــــــــاجل

رحيق الزهراء · 2013-06-30, 18:42

السلام عليكم ورحمة الله وبركاته

اخواتي ساعدوني ربي يخليكم زوجي عطلو صاحبو دقيق تاع الزرع وقالي عجنيلي خبزة وانا عمري ما جربتها بغيت نديرهاله للعشا فياريت تعطيولي الطريقة بارك الله فيكم

ام اجياد · 2013-06-30, 18:45

فهمينا وشنهي دقيق الزرعيعني دقيقالقمح ولا الشعير يعني نتاع لحرشاية ونجاوبوك

رحيق الزهراء · 2013-06-30, 19:15

نعم اختي تاع الشعير كما قلتي

عطوفة · 2013-06-30, 22:56

دقيق الشعير نديرو بيه الحرشاية
شمخيها في الليل وغدوة ان شاء الله طيبيها ..ديري الدقيق شويه ملح وماء دافي واعجني ولميها لازم تكون شويه مطلوقة وغطيها حتى الصباح وطيبيها .قرص في الطجين انتاع الطين ..اتمنى انني افدتك ...

crystale49 · 2013-06-30, 23:07

مثل ماقالت الاخت عطوفة تماما ربي يجازيها خير

غيداق · 2013-07-01, 05:31

شوفي اختي انا نعطيك الطريقة عن تجربة يومية بحكم اني مريضة بالسكر ناكل كسرة الشعير يمالا كل 3 ايام نطيبها وتجي تهبل المهم: اذا حبيتي تتغدايها بليها ليلة من قبل واذا حبيتي تتعشايها بليها في الصباح المقادير هي : كيلة سميد عادي الي تديري بيه الكسرة اليومية نتاعك زيديلها 2 كيلات الدقيق نتاع الشعير زيدي الملح على حسب ذوقك مع ثلاث مغارف زيت حطي المكونات كامل في كاسرول غامق وخلطيهم مع بعض ناشفين روحي غلي الماء بمعنى يغلي وجيبي مغرفة نتاع الخشب وبلي العجينة نتاعك بالشوية حتان تتحصلي على عجينة طرية وتقدري تستعملي يدك باش تلمي كل الدقيق حطي العجينة في ساشي نظيف وخليها ترتاح حتى وقت الطياب اجبدي لعجينة واعجنيها بلا ما تقطعيها ولا شفتيها ناشفة زيديلها شوية نتاع الماء اطرحيها بالحلال وديريهم قرصات صغار قدر يدك علا خاطر راكي مبتدئة هههههههه
المهم طيبيها في طاجين الطين ما تقلبيهاش حتى تحمار وكولوها بالصحة والهنا وراهي تهبل خصوصا مع اللبن هدي طريقتي نتمنى تفيدك سلاااااااااام

رحيق الزهراء · 2013-07-02, 12:21

شكرا لكن اخواتي انا جربتها بصح درتها طريقة كما موالفة نعجن تاع دقيق القمح ايمالا جاتني قاااسحة ندمت للي ضيعت الدقيق درت 3 كيسان شوب دقيق الشعير و2 مغارف صغار خميرة الخبز والملح وعجنت بما دافي ايمالا ما نحكيلكمش مين طيبتها كيفاش جات يابسة حجر
الحقيقة تقدرو تقولو انا مبتدئة في دقيق الشعير وكانت اول تجربة ليا ههه
المهم ربي يجازيكم بالخير ونجرب كما قلتولي ونوجدها للعشاء اليوم ان شاء الله

رحيق الزهراء · 2013-07-02, 12:28

اخواتي للملاحظة ما نديروش الخميرة خاطر حتى وحدة ما ذكرتها

غيداق · 2013-07-03, 12:18

اقتباس:

المشاركة الأصلية كتبت بواسطة رحيق الزهراء

اخواتي للملاحظة ما نديروش الخميرة خاطر حتى وحدة ما ذكرتها

اذا حبيتي اختي نكتبلك الوصفة اللي فيها لخميرة