طاجين الحلو بالبسبوسة

[ام نسمة]

مرحبا بما انو رمضان على الابواب حبيت نمدلكم هادي الطريقة الرائعة لطاجين الحلو اللي يحمر لك وجهك قدام الضياف شكل جميل وبنة اجمل اسفة راحولي بعض الصور تاع التحضير راح نحط اللي عندي ونشرح الوصفة

اولا حضري البسبوسة بالشابلير تحتاجي كاس شابلير كاس زيت كاس حليب كاس بيض كاس سكر عادي خميرة كميائية وجوز الهند والكوكاو مرحي رقيق هو جوز الهند كاس نص بنص وقشور ليمون وعيره وضربيهم مليح بالباتور ودهني مول السيلكون قوالب فردية بالزبدة ورشيهم بالفرينة ودخليهم يطيبو وتكوني موجدة سيرو غير تطفي عليهم سقيهم وخليهم يبردو


ومن بعد جيبي قطعة لحم خروف مايكونش فيها عظم باش تطيب بسرعة اكثر
نحتاج نصف بصلة شرائح جد رفيعة ونحتاجو برقوق وزبيب وسفرجل فقط


و زعفران استعملت تاع الشعرة باش لاصوص تخرج لاكولار اتاعها ميال ونجمة الارض وقرفة عود ورشة بودر ورشة جوزة الطيب وملح وزبدة صول
حطي في الطاجين يكون ثقيل الزبدة وقليه اللحم والملح والبصل فيها وضيفي الزعفران بعد ما حليتيه بشوية ماء دافي وحطي القرفة والنجمة ورشة سكر وخليهم على نار واطية ومن بعد ضيفي البرقوق اللي تكوني شمختيه في ماء بارد ربع ساعة وزيدي رشة مليحة تاع سكر وخليه يطيب وعاودي حطي سفرجل وخليه يطيب شوية ومن بعد حطي زبيب وكدالك رشة سكرة مليحة يعني كمية السكر قسميها على مراحل الطياب تاع الطاجين وفي الاخير ضفي شرائح البرتقال وعصير ليمون مع ماء ورد يغلي غلية وطفي وبالطبع يكون المرق عقد وتعسل
نقلي اللوز ونجيب جوز الهند وجوز ونحتفظو بالقرفة والنجمة وشرائح البرتقال على جنب للتزيين نجيبو طبق حطي البسبوسة في الوسط وزيدي سقيها بالصوص تاع الطاجين ورتبي الطبق على دوقك وانا زينته هكدا


او هكدا



والله الدوق روعة ويصلح للضيافة الراقية حتى البرتقال اعطى له طعم مختلف وانا اول مرة نستعمله وعجبتني النتيجة بزاف