ابن عمتي

[مشكلتي]

السلام عليكم ورحمة الله

انا فتاة ابلغ من العمر 21 سنة مشكلتي هي ابن عمتي الكبير الذي يبلغ 35 او 36 سنة لا اعلم تحديدا وغير متزوج بحكم ان ابي لا يملك الاخ واخي صغير فهو يساعده في بعض الاشياء كان ياتي لنا ببعض المستلزمات عندما يكون ابي في العمل لكنه منذ سنتين تقريبا اصبح يزعجني بتصرفاته حيث انه كل ما التفت لفعل شيئ والتفت رايته ينظر لي وعندما اراه لا يستحي بل يضحك ويقول اي شيئ كان كيف حالك او يردد اسمي او شيئ مثل هذا كل ما اتى لبيتنا يصافحني وانا لا احب هذا اخبرت امي عن تصرفاته و انها تزعجني و انه (حارزني) كثيرا ويعقب على كل تصرفاتي ويطالعني بنظرات ليست بريئة فقالت عيب هذا ولد عمتك كبير عليك كون تزوج راي بنتو نتيجتك لكنها مؤخرا لاحظته لكن ابي عصبي كثيرا وان اخبرته سيقتله وضعت الحجاب في البيت دون جدوى فيجلس بجانب جدتي لساعة او اكثر بحجة انه اشتاق لها ويبقى يطالعني كالعادة وهو كبير نوغمالمون راو تزوج بصح هو ماحبش
حاولت ان لا اخرج من غرفتي عندما يزورنا لكن امر حتمي(نطيب غداء نسيق ولا وتاني منعرفش عليه كيفاش يجي داخل) كرهت منو تصرفاتو امام ابي مختلفة تماما حتى انه لا يطيل الجلوس ومايرفدش عينيه ويخرج فورا

وش ندير معاه وانا كرهت نظراتو و اصبحت اكره نفسي ولا اطيقه ابدا وكل ما دق جرس بابنا وما ان سمعت صوته الا شعرت بالغثيان:m ad: تبا لهكذا ذكور .........عذرا من الجميع

[mitrochka]

إدعي هذا الدعاء
اللهم إكفنيه بما شئت

[السيدة كرمين]

خلي والدتك تكلموا فور ملاحظتها لتصرفاته وتهدده باخبار عمه - تحمر عينها معاه -
انتي أي شئ يخليه يشوفك ماتعمليه ابقي في بيتك أو اغلقي الكوزينة عليك
وقت اطيبي يماك علابالها وما يهم إذا باباك لاحظ ،الأب لن يتعصب أو يعمل شئ يسئ
لإبنته اذا لاحظ أنه بقدومه تدخلين بيتك سوف يفهم لوحده وييتصرف ثقي في ذلك

[sali-sali]

كي تشوفيه روحي لغرفتك ..وخلي امك تقوم بالشغل في مكانك في الفترة لي يكون موجود فيها

[l'espoir de la vie]

لو كنت مكانك لكنت اوقفته عند حده
أول حاجة مادام امك عارفة قوليلها تهدر معاه ويلا ماحبتش انتي سقسيه قوليلو علاش تبدل افعالك قدام ابي وتلعبها عاقل!!!!!!!!!!!!!!!!!
ومين تكملي هدرة معاه قوليلو الله يهديك لانه هكذا راه منافق قولتيلنا قدام باباك حاجة وقدامك حاجة اخرى
المهم ان شاء الله ما يكون غير الخير تقبلي مروري اختي في الله

[مرام سيرين]

قولي لأمك كي جي هو تشوفو من بعيد كيف يتصرف او حاولى على قد ما تقدرى كي جي هو تحججي بأمور تعمليها في مكان اخر بعيد عليه حتى يروح

[lola22]

اذا قلقك بزاااف روحي عيطي عليه وقليلي راك كبيرر هذي تصرفات ليجان
+++++++++
وحاولي كي يجي لداركم ادخلي للغرفة نتاعك واقفلي الباب وخلي ماماك تغسل واطيب ياك مهوش ساكن عندكم
واذا شفتي الدعوة كبرت قولي لباباك

[z.abdo]

كثيرا ما نسمع قصص زنا المحارم أو إغتصاب سببها سكوت البنت في مثل هذه الحالات


عليك ان تخبري والدك قبل ان تقع الفأس على الرأس

[achwak crazy girl]

اذا كان ختي ابوك عصبي معليش ولكن لازم تقوليلو وامك عااارفة قولهاا تراقبو من بعيد كيفاااه يدير ولا انت كي يجي هو انت متخرجيش من غرفتك ولا اهدري معاااه اقميه يولي يخطيك وربي معاك

[Assouma 93]

كي تتجنبيه و متقيميهش يعيا يهدر و يهدر و يكره مع مرور الوقت و هو كي يكون في داركم قعدي في بيتك و متخرجيش حتى يروح

[الجزائرية 1995]

بكل أسف راااااااااكي مستهدفة من وحش بشري راهو يخير في الفرصة باش يغتصبك صدقيني إذا مقلتيش لباباك راح يعملها لاااااقدر الله رب يجعل كيده في نحره وإذا باباك محبش يصدق متزيديش تخرجي من الغرفة لما اجي لداركم مهما كان حتان يفهموا والديك رب يهديهم

[نجمة المستقبل]

السسلام عليكم و رحمة الله و بركاته


أختي ما تبقايش ساكتة حتى طيح الفاس على الراس ، خبري ماماك و لا جداتك يحكو معاه و يهدوه و اذا ما حبش يفهم احكي لباباك باسكوا هو اللي دار فيه الكونفيونس هكذا يولي ما يدخلش كامل لداركم و تتهناي و تعيشي براحتك في بيتكم

ربي يسهلك أختي ، بالتوفيق

[بلسم غرام2018]

ما نقلك غير استحفظي على روحك والا عينوا فيك حسب تصرفاتوا باباك موجود

[naamane3]

اخبري جدتك فهي قادرة على ردعه
ولا تخبري اباك او امك
واستغفري الله وادعيه كثيرا

[wafa16]

اختي لازم تتاكدي مليح ماترميش التهم التي ربما عواقبها تكون وخيمة راكي تقولي باباك عصبي و ممكن يتصرف تصرف خطير
انا حسب ضني لاحظ انك تتقلقي من نظراتو و لهدا راه يسمط و الا من طبعك خجولة و منه بالتحديد و هو عاجبو الحال و يحب يشوفك مقلقة و منزعجة و هدا عن تجربة انا قريبي كان تقريبا كيما هادا لكن انا ساهمت من غير ما نشعر اد اني بطبعي خجولة و كنت نحشم من خيالي فهو كان يتصرف هكدا باش يشوف ردة فعلي و انا حكيت لماما و قالت لامو اللي نبهاتو بطريقة غير مباشرة قاللها شفتها تحشم نحب نقلقها و زيد ماعنديش اخوات بنات ومن داك النهار تبدلت تصرفاتو و انا تاني تسرعت في الحكم تاعي
المهم ادا كان عندك خجل مفرط اتحكمي فيه كوني طبيعية عادية و ما تقعديش تشوفي فيه بلي راني شفتك كوني على طبيعتك و الا قوليلو مباشرة تصرفاتك راهي تقلقني
و ادا امك راهي ملاحظة خلاص كي يكون هو في الدار انت اقعدي في بيتك و امك تخدم الشغل