السلام عليكم ورحمة الله وبركاته 
مساء الخير ياحلوات المنتدى
رح نعطيكم الطريقة تع قلب اللوز وبإذن الله تجربوه وتدعولي،وشنو منكذبش عليكم كاين مشكل واحد يجي حلو شوي
بصح ماشي مشكل اصلا تاع برا يجي حلو بزاف
منطولش عليكم،السر نتاعو متديروش فيه ليدام،ايه لا زبدة ولا سمن ولا زيت بويسك هاذي ماشي بسبوسة
المقادير
انا كيلت بغرفية حليب)
8 كيلات دشيشة اللي كيما الكسكس(أنا درت تاع سفينة وكان عندي غير المتوسط ملقيتش الخشين بزاف )
3 كيلات سكر(أنا قالتلي 4 كيلات سكر بصح جاني حلو وفي المرة الثانية درت غير 3 وزاد جاني حلو)
اخدمي السكر والدشيشة بيدك مليح
ومن بعد جيبي غير ملعقة زبدة ثم كيلة حليب وزيديها على دفعات وافتلي ملييح بين يديك كيما الكسكس لازم نصف ساعة وانتِ تحكي بيديك
ديريه في ساشي وحطيه ليلة كاملة في الثلاجة
وفي نفس الليلة حضري العسل اللي تسقي بيه غدوا(انا درت باطة عسيلة صغيرة في كسرونة ومن بعد غمرتها بالماء وزدتلها شوي سكر راني فنيانة الله غالب وخليتها حتى بدات تغلي وطفيت عليها)
لغدوا من ذاك ادهني صينية الفرن مليح بالزبدة وحطي هذاك الخليط بعد ماتزيدي تفتليه بيدك غير شوي باش يتحل من بعضاه
ومتظغطييييييييييييييش جيبي ملعقة واغطسيها في ماء الزهر وسوي الوجه بدون ضغط غير بالخفيييف
وزيدي بالسكين ارسمي مربعات غير من فوق وارشقي حبة لوز في كل مربع
وتكوني سخنتي الفرن ملييييح ودخليه يطيب
انا دالي حوالي نصف ساعة وهو يطيب لانو الفرن تاعي يشعل من فوق ومن تحت بنفس الوقت
المهم حمريه من فوق مليح متخليهش ابيض
وكي تخرجيه مباشرة عسليه بعسل بارد
ومتقطعيهش في ذيك اللحظة اصبري عليه على الاقل 3 سوايع
انا خبيتو في الصالون وفرميت عليه خخخخ
وقبل ما تقطعيه وتقدميه كبي فوق كل حبة ملعقة ماء زهر باش تجي الريحة الزييييييييينة هذا تاني سر
وبصحتكم واي سؤال راني هنا اللي مفهمتش
اللي تجربو تدعيلي ربي ييسر عرسي ويفوت بعافية
سلام
ملاحظة: الصينية اللي استعملتها فيها 30 سم/30سم
( تقرير عن مشاركة سيئة )، و الموجودة أسفل كل مشاركة .
2013-01-13, 18:51
عنك مشكل مع قلب اللوز؟ادخلي تتعلمي سر المهنة
العرض العادي
