عادات الزواج في الجلفة

ام نسمة · 2013-05-14, 13:26

مرحبا ..........البارح كنت مقنوطة واليوم فرحوني بخبر شباب بزاف هو انو اخي لقى طفلة في عين وسارة وذهب امس ليطلب يدها للزواج هو وامي حفظها الله واليوم اخبروني التفاصيل لانو البارح دخلو في وقت متاخر فما اتصلوش بيا واليوم قالتلي امي انهم فرحو بيهم واعطاولهم الطفلة بكل سرور وكانو ناس مضيافين وكرماء لكن مازالو ماتكلموش في التفاصيل يوم السبت ان شاء الله نروح انا واختي وماما -*وراني غير نحلل فيهم باش يروح ابي معانا معلاباليش تقبل امي ولا لالا--المهم حبيت يكون عندي فكرة على تقاليد المنطقة وعاداتهم في الزواج بكل تفصيل وانهار السبت با نروحو باش الرجال يحكو في قصة المهر وقالونا باش ناسم يعرفو بلي راهم مدو بنتهم امي اقترحت اننا ندو مصروف الخطبة كما في تقاليدنا وانا اقترحت نشرو لبسة للعروسة وكوسميتيك انا قلت لامي راح انا نشريهم من عندي هدية لعروسة خويا دليل على فرحتنا بيها وراح تاني نعمل بلا قاطو قولولي الا هكا ولا لازم نزيدو حاجة ولا بلاك ماشي كامل هكا ........يالا يا ناس الجلفة انا هنا راني نسيبتكم ارواحو نتفاهمو ههههههههههه ياريت تعطوني تقاليد المنطقة بنتظار مشاراكاتكم وهكذا يصبح الموضوع هام وقد يستفيد منه غيري ماشي غير انا راح ندي عروس من الجلفة بلاك بزاف كما انا وهنا في المنتدى شكون عرف

مريم الصابرة · 2013-05-14, 13:49

السلام عليكم اختي
هذا خبر شباب وإن شاء الله باباكم يجي معاكم إفرحي شويا وخليك من الزعاف
ناس الجلفة الصح كرماء وناس عاقلين ربي يكمللهم بالهنا يا رب
شوفي ما نعرفش عاداتهم ممكن الاخوات يدخلو يفيدوك لكن انا لما تخطبت اكيد جابولي هدايا الصح والقاطو كيما راكي تقولي ولكن انا درت الخاتم والفاتحة في نهار يعني كانت مناسبة شويا كبيرة وبما إنهم جيراني يعني بعد الفاتحة تعشاو عندنا مع الناس اللي عرضتهم طبعا المقربين برك والخاتم لأانو كانت خطبة رسمية وذاك الوقت كانت الفاتحة قبل العقد لكن عادات الجلفاويين والله ما نعرف ضرك يدخلو لبنات يفيدوك ألف مبروك
فقط كان تسمحيلي نظن اللي فالصورة بنتك من ٍاي تنحيها خير لأانو حتى وراهي صغيرة لكن معليش السترة مليحة وإلا واش راي وسامحيني كان هذا تدخل مني

ام نسمة · 2013-05-14, 14:02

شكرا مريم الصابرة ربي يشفيك ويعافيك يارب راح انتظر ناس الجلفة يتدخلو ويساعدوني وراح احرص او ابي يحضر المناسبة ونركب معاه طول الطريق قريب خمس سوايع مع بعض هكا نحكي معا مليح ونشبع من شوفتو وبالنسبة للصورة راها بنت اخي بسومة نحبها بزاف زادت قبل ما نتزوج انا وكنت مربيتها كانت تاديني ماما وانا ياعزيزتي ما عنديش بنت راح اموت على بال ما نجيب بنت نموت على البنات ادعيلي ربي يكون عندي في المستقبل ان شاء الله اذا كتب ربي وحاضر يا ستي راح اغيرها

مريم الصابرة · 2013-05-14, 14:15

اقتباس:

المشاركة الأصلية كتبت بواسطة زهورالفل

شكرا مريم الصابرة ربي يشفيك ويعافيك يارب راح انتظر ناس الجلفة يتدخلو ويساعدوني وراح احرص او ابي يحضر المناسبة ونركب معاه طول الطريق قريب خمس سوايع مع بعض هكا نحكي معا مليح ونشبع من شوفتو وبالنسبة للصورة راها بنت اخي بسومة نحبها بزاف زادت قبل ما نتزوج انا وكنت مربيتها كانت تاديني ماما وانا ياعزيزتي ما عنديش بنت راح اموت على بال ما نجيب بنت نموت على البنات ادعيلي ربي يكون عندي في المستقبل ان شاء الله اذا كتب ربي وحاضر يا ستي راح اغيرها

السلام عليكم اختي
والدك راح يروح اكيد وتقسري معاه وتشبعي وخلي الأفعى تموت بحسرتها المهم إنت قربي من والدك قد ما تقدري
ربي يخليهالكم اكيد بنت ختك يعني بنتك كيفكيف وربي يرزقك يا رب عن قريب عرفت إنك متزوجة إن شاء الله يا ربي ترزقين بفتاة يا رب ونجي ناكل الطمينة ربي يكمل لخوك يا رب إن شاء الله
بارك الله فيك وشكرا

z.abdo · 2013-05-14, 14:23

لي عودة بإذن الله .............................

ام نسمة · 2013-05-14, 14:31

مريم مرحبا بيك في داري بلا ما نولد والله راني بصح راح نحطك على راسي اضربي عندي سمانة ولا زوج نقلشك تاع الصح راني طلبت من سالي سلمى باش نتبادل انا واياك س ك ا ي ب سيرمو راها نسات عاودي قوليلها نتي في خاطري نتعرف عليك عن قرب حنونة ادخلي الى بياناتي

انانيس · 2013-05-14, 14:35

السلام عليكم
الحمد لله خبر سار لك ولنا جميعا
ربي يدوم فرحتكم وان شاء الله تكون هذه الخطبة سبب في عودة المياه الى مجاريها
ربي يفرحكم ان شاء الله
لست من مدينة الجلفة نتمنى الاخوة يفيدوك بعاداتهم
الف مبروك عليكم

مريم الصابرة · 2013-05-14, 14:47

اقتباس:

المشاركة الأصلية كتبت بواسطة زهورالفل

مريم مرحبا بيك في داري بلا ما نولد والله راني بصح راح نحطك على راسي اضربي عندي سمانة ولا زوج نقلشك تاع الصح راني طلبت من سالي سلمى باش نتبادل انا واياك س ك ا ي ب سيرمو راها نسات عاودي قوليلها نتي في خاطري نتعرف عليك عن قرب حنونة ادخلي الى بياناتي

السلام عليكم اختي
ربي يخليك ويهنيك يا رب
راني ندير دورة حول أعضاء المنتدى وعلاه لالا لما نزور سلمى ومن بعد إن شاء الله نزورك كان ربي كتب
راني بعثتلك دعوة لل سك ايب ننتظرك ونحكو لا والله خديجة بلغتني السلام وصلني بارك الله فيك نستناك شكرا

ام نسمة · 2013-05-14, 16:05

شكر عزيزتي انانيس

sstolga · 2013-05-14, 16:54

الحمد لله خبر سار لك ولنا جميعا

sali-sali · 2013-05-14, 17:20

اقتباس:

المشاركة الأصلية كتبت بواسطة زهورالفل

مريم مرحبا بيك في داري بلا ما نولد والله راني بصح راح نحطك على راسي اضربي عندي سمانة ولا زوج نقلشك تاع الصح راني طلبت من سالي سلمى باش نتبادل انا واياك س ك ا ي ب سيرمو راها نسات عاودي قوليلها نتي في خاطري نتعرف عليك عن قرب حنونة ادخلي الى بياناتي

راني هناااااااا
مبروك صديقتي ربي يهني خوك
ان شاء الله ناس الجلفة يفيدوك
ولا مافادوكش عادي اختي تقاليدينا في المناسبات كيما هدي ملاح

منهاج · 2013-05-14, 18:20

السلام عليكم

مبروك ان شاء الله تكون حلالية فيما يخص تفاصيل الخطبة ننصحك تدخلي منتدى شقائق الرجال قسم تجهيز العرائس وطرحي عليهم يفيدوك اكثر

هدى الجيجلية · 2013-05-14, 20:56

السلام عليكم
خيتي
مبروك اعليكم
بالبركة والهناء
يارب
إن شاء الله
إخواتي في المنتدى
يساعدوك
بما طلبتي
مبروك مرة ثانية

ام نسمة · 2013-05-16, 07:30

زعمى حطيت الموضوع في قسم المجتمع باش يلقى تجاوب ساعا يظهرلي كل واحد راهو لاتي بهمو .................. يا وين راكم انا كملت القاطو والسبت نروحو ان شاء الله ونتوما حتى واحد ما جاوبني

اميرة الجلفة17 · 2013-05-16, 13:07

مساء الخير ان شاء الله نقدر نجاوبك
الخطوة اللي درتوها هي الاولى يعني روحتو وش فتو العروسة وهناوكم
الان رايحة تتأكدي من التفاصيل مش مهم واش تدي معاك ياك هدية منك كيما تحبي
ما نظنش تدو مصروف الخطبة الان خلوه من بعد بعد ما يتفاهو الرجال
ونهار الخطبة راه وحدو تدو اللبسة والخاتم و الدراهم