****بوريه محشية باللحم المفروم و طاجين الجلبانة من مطبخي بنة لا تقاوم****

[ابني نور عيني]

اهلا بيكم غالياتي ان شاء الله تكونو كامل بخير وبصحة وعافية
كنت حطيت موضوع فيه بعض طياباتي و الاخوات طلبو مني وصفة طاجين الجلبانة و بوربه محشية باللحم المفروم
علابالي كامل عندكم طريقتكم الخاصة في طهي طاجين الجلبانة بصح معليش نحطلكم طريقتي خاطر جيني بنينة عسل و تحمر الوجه

1-طاجين الجلبانة:





نقلي حبة بصلة مع الزيت و الدجاج مليح حتى يدبال البصل و نضيف الملح والفلفل الاسود و قلييل جدا من القرفة ونمرق حوالي كاس ونضيف الجزر مقطع دوائر و نخليه يطيب وبعدها بعشر دقائق نضع الجلبانة و القرنون اذا كان متوفر و نضيف 2 سنينات ثوم و معدنوس مغسول و مربوط بخيط و نغلق على الكوكوطة ونخليها حوالي 20 دقيقة يكون كلشي طايب و بعدها نفتح الكوكوت و ننزع الدجاج ونقليه و نرجعو للصوص ونقدم الطبق برشة من المعدنوس يممممي بصحتكم
ملاحظة :تقدري ما تديريش الجزر انا كي ما يكونش عندي القرنون ندير زروديه باش الطبق يجي زاكي شوفي هنا غير الجلبانة والقرنون امممم




2-بوريه محشية باللحم المفروم :



نبداو اول شي نقشرو البطاطا انتوما و عدد افراد عايلتكم و نغلوها في ماء مملح مع سنينات ثوم باش تعطيها بنة و ماتملحوش بزاف و من جهة اخرى نقلي البصل مع شوية ثوم في الزيت ونضيف اللحم مفروم و كي يبدا يكتسب اللون البني نضيفلو الملح رشة خفيفة مع الفلفل اسود و شوية قليييلة هريسة والزيتون ادا عندك ماشي شرط و قلي مليح وضيفي كاس ماء وخليه يتجمر شوية و طفي و هداك الكاس تاع الماء هدفو انو جينا صوص خفيفة تبنن البوريه تاعنا
كي تطيب البطاطا ميكسيها في هاد الطبق تجي بنينة اكتر كي تتميكسا وادا حبيتي معليش ارحيها بالرحاية اليدوية و اضيفي ملعقة كبيرة زبدة و شوية حليب ادا ميكسيتيها و حطي في صينية طبقة بطاطا مرحية و فوقها حطي اللحم المفروم و قطع جبن كيري و فوقها فرغي بطاطا الباقية و زيني من الفوق كيما حبيتي مثلا انا مرة درت شوية لحم مرحي متبقي في الوجه مع جبن مبشور و مرة زينت بشوية زيتون وجبن مبشور او قطع مثل ما هو في الصورة



وتقدرو تخلطو حبة بيض مع جبن مبشور على الوجه وتجي البنة راائعة
صدقوني نموت على الطبق هادا بنين بززززاف مانشبعوش 44444

انشاء الله يعجبوكم والى اللقاء