الدار

[مشكلتي]

ارجوكم ساعدونيي راح نطول عليكم شوية مي نتمنا تابعو الموضوع


انا عمري 16 سنة الحق الحمد لله متحصلة على شهادة البيام بمعدل 16 و الحمد لله وكنت في الفصول نجي 18 وهاد العام انا راني في سنة اولى ثانوي ديت 14 في الفصلين والدار دركا ولاو يضغطو عليا في القراية وكامل وعادو حابيني نرجع لل18 والناس كامل عارفة بلي الجو تع اللليسي راح يتبدل عليا وماشي كيما كنت في السيام بصح الدار ربي يهديهم موالاوش يفهموني وبابا مولاش يحب يشوف كشف النقاط نتاعي قالي حتان ترجعي للمعدل لي كنتي فيه وانا والله مجهودي كامل راني نبذل فيه غير باه نجيب وش حابين هوما والناس كامل قاتلي بلي راكي 44 في الليسي كي جبتي 14 والله انا المعدل جاني عادي والله ماعرفت وش ندير ومن قوة الخوف نهار الامتحان اني منجيبش النقطة وليت نحل السيجي وانا ميتة بالخوف من الدار ونهار نجيب المعدل يبداو يحاسبو فيا وانا ربي لي يعلم بيا وش كاين في قلبي وزيد انا حبيت واحد مي جامي خليتو ياثرلي على قرايتي والله والله والله ربي لي يعلم هو لي معاوني في قرايتي او هو لي مساعدني يمات الامتحانات او كي عرفت اختي بهادل الشي قاتلو بلي نتا لي راك ملهيها على قرايتها وقاتلو ايلا هادل المرة ماجابتش 15 ولا 16 رايح تشوف واش يصرالكم في 2 والله تعبت ومع انا حساسة بزاف وليت ليلة منفوتهاش غير وانا نبكي او واحد ماراهو حاس بيا في الدار وزيد تانيك درك نقوللكم وعلاه تعلقت بالطفل هذاك تحملوني شوية مكانش غيركم لي نفرغلهم

حنا في الدار عندي 2 خاوتي بنات كبار عليا او ماما كانت تخدم ودركا حكمت الدار وبابا خدام في التلفزة ملي يروح الصباح ميرجعش لل 8 تع الليل يتعشا ويرقد ويعاود صباح كيف كيف وماما كي قعدت في الدار مولات لا تخرج لا والو بويسك لافامي تاعنا بعاد بزاف علينا ولات همها الوحيد حنا عادت تعس فينا في كل صغيرة وكبيرة حرمونا من التلفزيون وحرمونا من كل شي حتا النت راح تكمل هادل المرة ومش رايحين نرجعوها وليت غير القراية وخلاص ماما منقعدش نحكي معاها بزاف من غير القراية بويسك لكان نحكي معاها في موضوع اخر رايحا تقيم القيامة وبلاك جي نهاري وتتهانا مني ماما ماعندهاش العقلية تع الامهات لي يسمعو لبناتهم ويعاونوهم وينصحوهم حتا اني كرهتها والله كرهتها لرجة متتصوروهاش وبابا لي نحبو وانا الوحيدة لي يتفاهم معاها من بين خاوتس ونحب نحكي معاه ملي يخرج مايرجعش وخاوتي لبنات ربي لي عالم نحس روحي مع ولاد وحدة ما تتفاهم مع لخرى او وحدة تخلق الماشاكل للخرى تصدقو جامي حكيت معاهم ولا جامي قعدت معاهم قعدة تع خواتات ونحكيو وش كاين في قلوبنا ولا حاجة وانا مالقيت لمن نحكي ولي نفرغلو قلبي بويسك يجي نهار وقلبي يتفجر من هادل المشاكل مالقيت غير الطفل هاذا لي كنت معجبة بيه نحكيلو بويسك رتحتلو وفتحلي قلبو وهو الوحيد لي واقف معايا في مشاكلي


والله تعبت القاول يحل يا خاوتييييييييي

[chouchousword]

السلام عليكم اختي و الله انا نفس المشكل تاعك مع ماما و بابا و خواتاتي مي الله غالب معاندنا مانديرو ابار ندعو ربي يهدينا و يهديهم و على القراية حاولي تبرهنيلهم بلي الغاشي كامل مابقاش كي اللول الحال تبدل المهم ربي يكون معاك

[sali-sali]

السلام عليك

حاولي تتقربي منهم اكتر باي طريقة

[ريم الفلى]

انا معندي ما نقولك غير ربي يهديك انت تاني رانا في دزاير متنسايش مناش في فيلم ولا فيالخارج وعقليات الاسر اكل كيف كيف ما لا كان لازم تثبتي انت وجودك ومتنجريش وراء هدا الشاب اللي ربي يهديه هو تاني علاقة معاه حراااااااااااااااااااااااااااااااااااااااااااااااا ااااااااااااااااااااااااااااااااااااااااااااام خليه وادعي ربي يفرج همك بواشمن وجه تدعي ربي يقم الاحوال في داركم وانت تديري في معصية وهدرتك معاه معلابالكش وين رايحة تديك مالا انصحك كيما اختي بويسك راكي في لاج ديالها خليه وكوني مع ربي يكون معاك وتشوفي كيفاش تتبدل الاحوال ومتديريش مشاكل الدار سبة باش تكوني في معصية واذا قالك علاه جبتي روحك ومكيش حابة تحكي معايا قوليلو بالي الحمد لله دارنا ولاو لعقلهم ولاو يسقسو عليا واتفهموني مالا مولا عندي حتى مشكل يعطيك الصحة كي وقفت معايا والله مننسى خيرك وخليه من بعد تبقالك مسألة القرايا عادي راكي في سن المراهقة وعادي باش تتبدل عليك الاحوال من السيام لليسي مالا اقراي قدر المستطاع وركزي متديريش كامل صورة عائلتك في بالك جاوبي وحطي الثقة في نفسك اللي اجتهدت في القرايا وهوما اكيد رايحين يتفهمو برك يبينولك القسوة باش متتهاونيش في القرايا ومتنسايش باللي مكان حتى وحدة تحبك اكثر من امك اللي حملتك تسع شهر وولداتك بالسيف حياتها كانت بين يدين ربي روحي شوفي لي فيديو برك تاع الولادة وتشوفي المعانات اللي عاناتها امك باش تحصلت عليك مالا مكانش وحدة تحبك وتخاف عليك من نسمة الهوى قدها مالا غير حبيها من قلبك على خاطر قد ما تحبيها مكيش رايحة تكفيها
وربي يهدي القلوب ويألف ما بيناتهم وفيما يخص خواتاتك حاولي انت تجبديهم وتحكيلهم وابداي من اختك اللي تعرف الشاب اللي راكي معاه

[maghili]

ههههه كنت كي نجيب المعدل فوق 10 يفرحو بيا والحمد لله تخرجت من الجامعة ومكان والو
جامي في حياتي قالولي روح تقرا ولا هز كراسك

[طيبة نفس]

لو كان ما يحبوكش و يخافو عليك من غدر الزمان ما يبقاوش من موراك على قرايتك على خاطر هما راهم كبار عليك و مجربين هذي الدنيا و عارفين من غير قرايتك حاجة ما تنفعك وعارفين تاني معدل 14 في هذ الوقت في الباك ماراكيش رايحة ديري بيه حاجة مليحة ماشي كما زمان جيب الباك وخلاص واذا بغيتي حاجة تقدري عليها علاش لي جابو 18 في معدلات الباك خير منك صح العلم درجات بصح تعب تنال وهما لو كان ما تهمهمش حياتك وسعادتك ما يخمو فيك عائلتك هي الصح قراي مليح وجيبي معدل يرفع الراس لان النجاح سلم يصعد وليس بابا يفتح اذا ماشي على جالك انت على جال داركم وعلى جال باباك لي يروح الصباح ميرجعش لل 8 تع الليل وهذا كلشي حتى يوفرلكم حياة كريمة اخطيك من العلاقات لي يدوك للتهلكة ولي يحبك صح ما يديرلكش حاجة تضرك هذا رايي فاقبلوا مروري سلام

[doba]

ربي ينجحك أختي وربي يكملك نشالله

[كغومة]

السلام عليكم

والله موفقك صعيب مع الدار فهميهم بلي راكي ديري كل المجهودات نتاعك زيد الي يجيب 10 يطلع والي يجيب 14 يطلع والي يجيب 18 يطلع ياك وراكي مليحة كي راكي تجيبي 14 مشي كيفي انا ++ أخواتك تقربي منهم شوفي واش يحبو واش ميحبوش هكا شاركيهم في فرحتهم خفي عليهم الحزن يعني هكا وزيدي ماماك هيا كلشي لازم تقربي منها وتعامليها بطريقة جيدة بزااف وراح تشوفي ردة فعلها وابتعدي عن هذا الشاب لا تشغلي بالك الا بدراستك وصلاتك وعبادتك فكل مايحزنك هو تقصيرك اتجاه ربك وأنصحك باتخاذ صديقة من لافامي اذا كنتين تثقين فيهم اذا مكانش ثقة مكان لاه تقوليهم باسكو ينجمو يبيعوك وهاذي مراهقة وراح تعدي تحسي بلي قاع والديك راهم جايين ضدك وهوا راهم حابيين غير مصلحتلك ..بالتوفيق لكِ

[Blue*flower]

السلام عليكــــم

اعتقد انه مهما كانت خبرات الناس .. لن يستطيعو ان يفيدوكي كثيرا و انا من بينهم .. كما يقول المثل ' الي يده ف الما ما شي كيما الي يده ف النار ' و خصوصا فتره المراهقة ...
الامر الذي اتفق فيه مع اخواتي في المنتدى هو التقرب الى الله و طلب العون منه لانه سبحانه و تعالى الوحيد القادر على فهم ما بداخلك حتى اكثر منك ... لدا اكثري من الصلاة و الدعاء و ركزي في دراستك. و تاكدي من حب اهلك لك .. بالنسبة لنقاطك كانت مثل نقاطي تماما و التغير من المستوى المتوسط للتانوي نفس الشيء بالنسبة لي .. لكني كنت في النظام القديم لذا لا استطيع ان اقارن .... لكن عموما نسبة كبيرة من الطلبة ينزل مستواهم. لان الامر يختلف .. و يجب ان يسأل اهلك عنك ف التانوية ليعرفو انك تبذلين ما بوسعك ...
اسفــــــــة على الاطالة ... ان شاء الله ربي ينورلك طريقك و يفرحك =)