حب ام انتقام ....؟؟؟؟؟؟؟؟؟؟

[مشكلتي]

السلام عليكم و رحمة الله و بركاته ...
لا أعلم ان كان في هده المرحلة من حياتي لازلت املك عقلا يفكر ام لا و لهذا ليس لي الا ان استنجد بأىائكم اخوتي في الله .....
تربيت في عايلة كلمة علاقة فيها من المحرمات و معناها شيئ واحد الفتاة قيمتها تروح و ثقة والدها تخسرها و ووو المهم الحمد الله عمرها واحدة فينا ما غلطت و الكل محتار في سر ربايتنا مع انا ماديا و مستوانا الاجتماعي جيد
المهم و انا في الابتدائي اراد ابن الجيران اظهار حبه لي و طلب التقرب مني -- الم اقل لكم فيلم -- رفضت و بحدة و ظل ورايا حتى في المتوسط و الثانوي و بما انو ابن الجيران كلما نتلاقو يظهر حبي نتهرب و نصدو من الاول حتى لا تبدا الكلمة و تبدا الطريق الخاطئة و بعد الباكالوريا انا سلكت طريقي بالجامعة و هو قالي و انا ماشية مرة في خاطرك رايح للأمن و ندير مستقبل ليا و ليك ما رديتش لأني ما نحكيش مع اي رجل مهما كان
اتخرجت و جات اخته تقلي راه حاب يخطبك و راه يحبك من الصغر وافقت لكن قبل ما يجو اهلو رسمي لقيتو بين ليلة و ضحاها اسلوبه انتقامي نوعا ما و شرحتلو اني عمري ما رفضتو لكن رفضت العلاقة الخاطئة
و تماطل في فتح موضوع خطبتنا رسمي عدة اشهر و كل يوم يجي بحكاية ... صارحتو قتلو راك راح تجرني لعلاقة بطريقة او باخرى عندك اهلي اما تقدم او لا تحجج بعدة حجج واهية
و صدفة التقيت بصديقتي قاتلي ما علابالكش راه كان يحب فلانة -- حتى هيا جارتنا -- من مدة طويلة و خلاته و تزوجت و وصــل مــرض علاجالها ...؟؟؟؟و انا بحكم ما نخالطش ماعلاباليش ؟؟؟؟ حسيتو كذب عليا عمـــر كامــل و تــأكدت انو فعلا رجع ينتقم لأني رفضته و انفصلت عليه و نسيت الموضوع خاصة انو كان كل يوم بحكاية
تخطبت لغيرو بعد مدة و ما كتبش المكتوب بطلت
و رجع بعد سنوات يطلب نفهمو و بـــلــــوم لاني بنـظـرو كنت حادة و حقرتو و بذات الوقت يطلب الصفح و اعطاءه فرصة لي و له
المشكلة كذبته حسيتها كذبة عمر .... يوهمني انو يحبني و هو يمرض على غيري و جارتنا ؟؟؟؟؟؟
يا تــرى عنــدي حــق نلــومو ؟؟؟؟؟؟؟؟؟
يا تـــرى انا كنت كـــــذبـــــــة ؟؟؟؟؟؟؟؟؟
و المـشـكل لليوم يلومني لي خليتو و قالق مني مع انو هو الغالط و بذات الوقت يطلب فرصة ؟؟؟؟؟؟؟
جـــوبوني قادر الراجل ينتقم من وحدة مثل حكايتي ....؟؟؟؟ يعني عــلاه متمسك بيا ؟؟؟؟ انتـقام ؟؟؟

راح تقولو في اطار الشرع راني نحكي شرعا قادرين في 2 ننسو كذبة و نكونو اسرة مستقرة ....؟؟؟
خاصة انو هو ثاني نفسيا تعبان و تصرفاته متناقضة لليوم ؟؟؟
يا ترى نقدر نسيه الجرح و ننسى معاه و الا استمرارانا و بداية حياة جديدة راح يفتح دايما جرح قديم لينا الزوج ...؟؟؟؟


نرفض مرة اخرى ........؟؟؟؟ نجـــرحــــــو ....؟؟؟؟ و الا نوافق مع كل التناقضات اللي داخلو ...؟؟؟
حاساتو ناقــــــــــــم لكن يا تــرى مني او منها ..؟؟؟
واش ندير .... يا ريت الرجال يفهموني هل الرجل عحب بطريقة مختلفة ...؟؟؟
هل المرأة بامكانها تغيير طباع في الرجل ...؟؟؟؟ يعني هو يكذب و فيه طباع صعيبة و يتحجج بالظروف اللي مرت بيه ...؟؟؟ اذا خفت من اللي داخلو و رفضتو ممكن نزيد عليه ...؟؟ و اذا كملت راح نبقاو دايما في ذكرى مجموعة كبيرة من الجراح ؟؟؟؟؟؟

ما رأيكم بالحكاية لأني لا اعلم ما اقول و ما الذي يحدث بالتحديد

(يا ليت للمشرفين و ان كنت سأثقل عليكم احذفو موضوعي عند غلقه)

[assia81]

السلام عليكم ورحمة الله وبركاته
اختي بديتها مليح الله يبارك وحابة تخلصيها العكس اختي استخيري الله ولكان فيه الخير او قدمو ربي ولكان مافيهش الخير او يبعدو عليك انت لست مسؤولة عليه حتى تراعي مشاعره وليس زوجك وبيناتكم ولاد حتى تشوفي لكان يغضب ولا يرضى وبلاك تصبري على جالهم لكان حاب الحلال يجي من الباب والزواج مودة ورحمة وليس انتقام ولكان حسيت منو هذا لكيديه عليك وربي يرزقو من بلاصة اخرى

[نسمة تفاؤل]

استخيري اختي ومن بعد الطريق الي ينشرح ليه صدرك هذاك هو ربي يوفقك اختييييييييي

[أمة الله 12]

حكاية تحبس المخ, الاستخارة ثم الاستخارة

اختي لم تقولي لنا ما رأي والديك فالموضوع, و هل استفسرتي اكثر عن صحة الكلام الذي نقلته اليك صديقتك؟؟؟؟؟؟؟

[محمد جديدي التبسي]

والله يا أختي هاذ النوعية من الرجال تجنبهم أحسن
المفروض أن المرأة تريد رجل ثقيل رزين واعي اما حكايات الحب والغرام والانتقام فهذي أمور تافهة في الحقيقة الأهم من كل ذلك أن ترتاحي للشخص لما يأتي لخطبتك بالطرق الشرعية وليس عن طريق كلام الهاتف والأخذ والرد فهذا لن يجدي .. ربي يفتح عليك

[mitrochka]

اختي
هنا سؤال واحد يتبادر إلى ذهني
هل يعتبرك المرأة التي تركته و يحاول ان يقنعك بالزواج ثم يتركك ليرضي رغبة في نفسه بأنه قادر على جعل إنسانة تحبه ثم يتركها ببرود؟؟؟؟؟؟؟

أختي العزيزة دعك منه
ربي يشفيه

[~ ســارة ~]

حب غرام انتقام مسلسل تركي من نوع اخر؟؟؟؟؟؟؟؟؟؟؟؟؟؟
قصتك قصة أخطيك منو ........

[chahrazed chocho]

رأي انا تصلي صلاة الستخارةو ربي يهدي ما خلق (عسى ان تكرهو شيئاو هوخير لكم)

[salim789]

على حسب كلامك هذا الإنسان يحبك بصدق، لأنه منذ الإبتدائي و هو يريدك و هذا أمر نادر الحدوث على حد علمي، أما مسألة حبه لجارتكم فلماذا تلوميه و أنت كنت بعيدة عنه، أظن أنه كان يتعذب لأجلك و ربما أراد حبا ينسيه حبك أنت، ممكن كان يتصور أنك احتقرته أو تكبرت عليه، حاولي أن تفهميه أن تربيتك هي ما منعك من إنشاء علاقة معه و أنا أحترم فيك هذه الصفة كثيرا.
اطلبي منه أن يخطبك رسميا و لي مكتبها ربي تجي، انزعي من رأسك حبه لجارتكم و مرضه بسببها، فربما كنت أنت سبب مرضه الحقيقي، فالرجل يحبك و الله أعلم.

[المنديل الابيض]

بعيد عن كونه انو حبك من الصغر
هل فيه المواصفات اللازمة حتى تقبلي بيه
اذا كان متخلق و متربي و يعرف بينو و بين ربي وو لد فاميليا و خدام و تع مسؤولية علاه ما تقبليش بيه
انساي حكاية جارتكم ...اصلا الانسان يمر بكثير من الاشخاص حتى يوصل للشخص المناسب ..عادي
انا من رايي اذا فيه الشروط اقبلي بيه خاصة ان البنت الاخرى تزوجت
ومع الوقت راح يبان الصح ممكن مرض على حاجة اخرى الله اعلم
ربي يسترك و ينور طريقك

[sstolga]

حكاية تحبس الراس استخيري هذا واش قدر نقلك

[sstolga]

انصحك بالاستخارة

[doba]

كلش بالمكتوب نتاع ربي

[homme libre 05]

السلام عليكم
فعلا كل شخص و مشاكله سبحان الله
اولا استخيري المولى عز وجل وتوكلي عليه
ثانيا اذا كان فعلا يريد التقدم لخطبتك فأنصحك ان ترسلي احد اخوتك او احد المقربين ليسأل عنه و لتعرفوه جيدا وبذالك تستطيعين ان تتخذي القرار
بالتوفيق

[sali-sali]

سقسي عليه مليح و اداهو متربي ووليد ناس ومشصعيب تعرفي عليه لانو جاركم
بعدها ادا كان قبول مبدئي حاولي تحكي معاه وتفهميمنه
+ صلي استخارة
وربي يجيب الخير