هل كرهي لوالدي عيب ام حرام.....

[wiza19]

ااااه من سارق ايامي وفرحتي و شبابي و سعادتي.....انا بابا سرقلي كاااامل ايامي الباهية....خوفني بلا حنية فالصغر...زيرني بلا لطف في المراهقة...حرمني من الخروج بلا سبب....ماخلانيش نروح للجامعة مع اني تحصلت على الباكالوريا غير زكاااارة....ذلني قدام خاوتي اللي خلاهم يقراو....حرمني من اي منبع للسعادة...( لا زيارة للاقارب و لا حضور افراح.....))) ورغم هذا سامحتو و ما درتش في بالي....واخر حاجة دارهالي.... انو حرمني من اني افرح بفترة خطوبتي ما خلانيش نخرج نشري حوايجي احبسني فالبيت بحجة اني امانة مع انو خطيبي قلو خليها تخرج تشري حوايجها... انا نقول هذا بابا لازم نستاحملو مي ....شكون يرجعلي شبابي شكون يرجعلي عيد ميلادي 18 اللي فات عليا و انا محبوسة فالدار شكون يرجعلي فرحة العروس اللي ضيعهالي شكون يرجعلي فترة الخطوبة اللي لبنات كامل يستناوها.......اسمحول اسمحول طولت عليكم مي والله قلبي راه معمر و منحبش نحكي لعائلتي باه منحيرهمش عليا....وانتم راكم كي عايلتي و اعز

[madoucha]

ااااااااااااه يا ويزا راني نحس بيك لاني جربت مما جربتي راكي تعرفي ابي انا ايضا واعر اكثر من باباك و افهم معنى انك جيبي الباك وما تقرايش في الجامعة
انا عانيت ايضا من بعض ما عانيت لكني تحديت وقريت وجبت ديبلوم وراني استاذة و الكل يقدرني لا تحزني مابقاش و تتزوجي تتهناي مع زوجك الي سيعوضك و يخرجك تحوسي ان شاء الله
نزيد نقلك انا ايضا ابي ما يخلينيش نخرج نشري بصح مزية ندير السبة بالخدمة ونشري حوايجي درقة والتقي بخطيبي درقة تاني وحد المرة شافني معاه دار لي شرع مزية هدر معاه خطيبي و قال له جبتلها حوايج
ما تتقلقيش كاين لي كيما انت عندي بنت خالتي ايضا ما يخليهاش ابوها تخرج واختها هي لي جهزلها

احمدي ربي لانه بعث لك هذا الرجل الي ممكن تلقاي فيه الزوج و الحبيب و الاب و الاخ وسامحيه فلاب يبقى اب

[wiza19]

والله كنت علابالي تفهميني لانك تعرفي الحقيقة المره اللي رانا نعيشو فيها....شكرا بزاف والله خففتي عليا....والله راني نتقلق ونولي نقول الحمد لله كي جابلنا ربي مكتوب نروحو لديارنا نتهناو.....والحمد لله كي لقيت خواتاتي اللي راهم يشريولي...يا طفلة والله طلعتيلي المورال بكلامك...شكرا بزااااف
ربي يهنينا ان شاء الله

[النجمة القطبية]

شوفى يا اختى الاب نعمة
وعلكيى ان تلتمسى له الاعذار صحيح ربما لم يحسن تقدير بعض الامور وربما اخطا فى حقك فى بعض الامور لكن يا اختى تبقى وجهة نظره واجتهاده وتقديره للامور هذا هو قالك انتى امانة كلمة لها ثقلها
ربما والدك تفكيره محدود او يخاف عليك اكثر من الازم قدرى وتفهمى
توصل بيك تكرهى باباك كبيرة والله تذكرى قدر الله وماشاء فعل
والدراسة واى شئ يتعوض والعمر قدامك لكن ابوك شكون يعوضو يا طفلة
ولا تعقدى مقارنة ظالمة بين زوجك وابوك على اساس ان زوجك سيكون جنة الخلد وابوك ذاك الرجل اللى رباك وحافظ عليك اصبح القاسى
شكون كبرك شكون لبسك شكون وصلك تكونى مرا وخلاك امانة يفتخر بيها زوجك
شكون قدرك شكون صانك
افطنى لنفسك زوجك هذا بسم الله مزال متعرفى عليه والوا اسال الله ان يكون نعم الزوج
بصح مكانة الاب ميعوضها حتى مخلوق
مكانة الوالدين
فكرى مليح وسامحيه وبوسى راس باباك واسمحى خلى قلبك طيب ومليح
راح تتفكرى كلامى نهار تفارقى باباك وتعرفى قيمتو
معليش اعذرينى ان شفتى فى كلامى قسوة شوية لكن صدقينى الاب مهما كان نعمة
حابة تقدريها الان قبل فوات الاوان ومازالك صغيرة بسم الله واش من عمر اللى راح
وربى يوفقك فى الجاى

[عبد الرؤوف24]

السلام عليكى اختى
اختى الدنيا فانية تخيلى نفسك انك مريت وتمتعتى بشابك ....ومن الاشياء التى حرمتى منها ....يعنى نفس الشىء الحضات الحلوةتمر ونفس الشىء اللحضات
السيئة تمر ...افتحى صفحة جديدة بزواجك وانسى الدى فات لانو هدى حكمة رب العالمين ان يكون اباك من هدا النوع رب الاعالمين كان قادر ان يضعك فى اسرة
اخرى واب اخر هدهو قسمك فى الدنيا وهو ابتلاء من رب العالمين اليس احسن لو انك تصبرين ولك الاجر والنعم فى الاخرة فكم من مراة ابوها صالح جدا و
يعاملها بلحسنى ولكنها فاجرة مصييرها النار ..ارجو ان لاتستمر فى العتاب وان تفوضى امرك لله وتسالى الله ان يعوضك وفقط فهناك من هم اسواء منكى ابوهم
ابوهم يعمل فواحش ولا ينفق عليهم ويوجد حتى الذى لايعترف حتى بابنائه..

[* الحلم سكر *]

السلام عليكم
اختي دون مقدمات راح نقلك اطوي صفحة الماضي و ما تبقايش تتحسري و تقولي لوكان و لوكان ..... اللي صرا صرا اذا استمريت هكذا عمرك ما راح تتهناي راح اي مرحلة مليحة تمزجيها بماضي سيئ
قولي ربي يهدي والدي و ربي يعوضني خير من اللي فات و احمدي ربي انت خير من ناس اخرى
ان شاء الله ربي يكتبلك حياة افضل من اللي متمنية و متوقعة
و ربي معاك اختي

[مسلمة انا]

ابوك من خوفه الزائد عليك فعل ذلك كالذي لديه جوهرة غالية يريد ان يحفظها

قد يكون اخطا الطريقة في الخوف عليك هكذا هم الجيل السابق لم يتربو على الحنان والعاطفة ليس كلهم لكن اكثرهم
لكن يبقى ابوك هو سندك في الدنيا وما تقوليش يجي راجلي يسلكني منو من معيشتو يجب نهار تحسي ولا واحد في الدنيا هاذي يحبك قد امك وابوك وان كان زوجك محب وعاشق وحنون

[wiza19]

والله يا خاوتي انا عمري 25 سنة و تحبست فالدار حوالي 5 سنين مي والله بابا عمرو ما سمع مني كلمة ماش مليحه انا دايما حاصرة في قلبي و ساكتة و راضية بقسمة ربي مي والله اني حابه نفرح بمرحلة الخطوبة ونحس روحي عروس و والواحد كي يتقلق يتفكر لحوايج اللي مش ملاح كاااامل...حبيت نفرغ قلبي و نتقاسم غضبي و ذيقتي معاكم و الحمد لله والله خففتو عليا جزاكم الله خيرا.....شكرا بزاف على الردود و رايحه نحاول ندير بنصيحتكم و ننسى مع اني حاولت و كان كل مرة يديرلي حاجة تزيد تبعدني عليك....مي ربي يجيب الخير ان شاء الله....شكرا بزاااااااف عالردود

[nebbacheanis]

ما يلفظ من قول إلا لديه رقيب عتيد

[ام نسمة]

ياريت لو كان غير جا عندي اب مثل ابوك لوكان نحكيلك انا تهبلي من راسك عشت طفولة لاباس بها وكان مقلشني ويموت عليا ويصرف عليا بالملايين واقصد جدا ما اقول وقراني ويدافع عليا من خوتي والريح مايقيسش شعرة من راسي ونهار اللي حبيت نتزوج بكى عليا بالدموع وترجاني مانتزوجش والله على ما القول شهيد بابا لوكان مايكلش معايا ماتجيهش المكالة خلاص خاصة العشا لانو كان يظل طول النهار خدام كل افراد عائلتي على طابلة وحدة وانا وياه على طابلة وحدنا واش نقولك راني نكتبلك ونبكي ........على بالي دوركا راكي اتقولي كامل هاد القلاش وراها تبكي لانو يا اختي بابا كان خاطي الطريق واخذته منا ومني بالاخص فتاة شارع راني نبقى بالشهور ما نشوفوش وقلبي محروق ويتقطع ونبات نبكي خطراتش وصورتي معاه تحت مخدتي وهو نساني ورجعت يتيمة بالرغم من انو ابي عايش حي يرزق شحال من خطرة تمنيت لو انه مات وماصراش هكذا لذا اختار اب متشدد ونبقى معاه دائما خير من اب موجود وهو غير موجود اللي موالفة الحرمان من بكري بمجرد انها تتزوج تنسى اللي فات وتعيش حياتها واللي مثلي انا عذاب مابعده عذاب احبه بجنون لكن لا استطيع مكالمته ورؤ يته متى شئت ابوك عزك وراه خايف عليك انا كنت حاقدة على ماما للي حبستني الدراسة من خوفها عليا لكن بعد ما تزوجت طلبت منها السماح وعرفت شعورها اكثر بعد ما صرت ام ربي يهديك

[bibicha]

يا اختي حابة نسقسيك زعمة كون تمرضي ولا كاش ما يسرالك باباك يسمح فيك؟راكي كبدتو و خوفو عليك هو لي خلاه يكون هكا و زيد يا حبيبتي فالوقت لي رانا فيه لازم تنوضي صباح تبوسيلو راسو لانو شافك انسانة نية و خاف عليك من تاثير الناس و زيد ما خلاكش تعيشي فترة خطوبتك من جيهة ما غلطش شبان اليوم يديرو علاقات مع بنات الفاميليا و يحكي معاها و و و و فالاخير ينسحب و تبقى الهدرة عليك اللهم تروحي ليه صح صفحة بيضاء و تتأقلمي مع الوضع لي تكوني فيه ننصحك بحاجة انساي هاذ الصوالح و احمدي ربي

[سَـآجدة]

اختي خليه لربي

خاطراه وصانا بطاعة الوالدين

ووصانا بحقوق الابناء فقد كان رسول الله صلى الله عليه وسلم خير خلق الله يداعب اولاده ويحبهم المهم انت قريب تتزوجي وتتهناي ان شاء الله

ممكن مالقيتيش الحنان عندك باباك راح تلقايه عندك زوجك الصبر مفتاح الفرج
ممكن زوجك ايعوضلك كلش

[الناسكة المتعبدة]

لوكان عاشلي بابا و هاد الدنيا منحتاجهاش، احمدي ربي يا أختي.

[wiza19]

الله يرحم جميع الوالدين اللي ماتو ام او اب....و انا اني حكيت غير شوي اللي يخصني لانو ابي هكذا تقريبا معنا كاااامل صح درجة تعاملو معايا زايدة شوي مي الاخت اللي قالت باباها داتو بنت شوارع(((ربي يرجعولكم و تحل عليه هاذ المراة ان شاء الله و يرجع كي بكري و زمان)))انا بابا راه ثاني قاسي مع خواتاتي و مع خويا و خاصة امي اللي مايخليهاش تشوف الهوا ما يخليهاش تتهنى لا بفرح و لا بقرح...و شحال من مره و هو يهددها قدامنا بزواج ثاني ووصل حتى لدرجة الطلاق الرجعي.....ان شاء الله ليامات الجايين يكونو خير علينا كامل لانو اللي والدها متوفي الله يرحمو و اللي غايب ربي يرجعو و اللي مغرور بيه من طرف نساء او رفاق سوء ربي يهديه ان شاء الله....

[azhars]

كامل مرينا بهذا الشي وانا حسبت روحي راني وحدي انا دايما نقول كن الاب تاعي دارلي هكا معليش بابا معندي ماندير نسمحلو
بالصح انا حقرني خويا ومنسمحلوش ونتيربييهنيك وديري واش كان فيخاطرك عند راجلك