كرهت حياتي و كرهت زوجي

[wafamida]

والله مالقيت منين نبدا منين نخلص انا متزوجة عندي خمس سنوات وعندي ابن عندو ربع سنين المشكل اللي عندي مرت سلفي يعني زوجة اخ زوجي عندها عام منين تزوجت بيه راهي كرهتلي حياتي تقوم باغراء زوجي بكل الطرق و انا الغيرة كلاتلي قلبي

حنا رانا عايشين في دار وحدة دار العايلة و زوجي يغيب بحكم العمل نتاعو كي يعود غايب نحس بالراحة و نكون انا وهي ملاح لكن كي يجي يروح المرا تولي وحدة اخرى تغير الملايس انتاعها في كل دقيقة و تلبس المغري و المفضوح و تتباهى قدام زوجي و تدير الاسباب باش تتلاقاه و تدير الحركات المثيرة قدامو تنحني و تمشي باغراء و تسدل شعرها و الماكياج بالرغم انو ماديرش هاذو الحوايج كي يعود هو غايب و نوليو في المنافسة انا نلبس و نعدل على جال راجلي بحكم انو يغيب ويريح معايا غير ايام معدودة و هي تعاند و تحاول تبان خير مني و الصراحة هي عندها جسم انثوي و تزيد تلبس السيري و المفضوح و انا ما نقدرش نحشم و هي جريئة جدا

و لاحظها زوجي و عاد يقولي اعدلي روحك كيفها هي راهي قايمة براجلها و انتي ماكيش قايمة بيا و انا كي الغبية قتلو راهي تزين في روحها على جالك و حابة تخرجلي قلبي و كيما يقولو ولهتو اي نبهتو لحاجة ما كانش منتبه ليها و اصبحت نحس باللي تعجبو و عدت نقولو ما تهدرش معاها يقولي ما نقدرش راهي عايشة معانا في الدار و مع العلم انو زوجها يعني سلفي غايب غلى الدار يخدم و يجي غير في الليل و ما يقولها والو على اللباس بالعكس يحب يبين روحو باللي مرتو مليحة قلت لحماتي هدرت معاها و قاتلها البسي لباس محترم لكن لا حياة لمن تنادي

وليت عايشة في كابوس احيانا كي نحس بزوجي جا نروح نلاقيه قدام الباب و ندخل معاه باش ما تلاقيهش هي لانها ادير الاسباب باش تتلاقى معاه و يشوفها و احيانا كي نكون انا و زوجي نلعبو مع بعض نشوفها تقلبت حالتها و ما يعجبهاش الحال و الله حيرتني احيانا نقول راهي تحبو احيانا نقول غيارة و الله راسي حبس و للعلم عندها عقدة من ناحية الرجال لاحظتها باللي الرجال كلهم يعجبوها كي نعودو نتفرجو في مسلسل تقولي شوفي فلان واش مليح تشوفي وليد خالي واش باهي تشوفي هذاك المغني واش يعرف يلبس و عندها مشكل مع النسا ما تعجبها حتى وحدة واش تقولو في هذي الشخصية و زيد ما تخاف ربي ما والو

و اصبحت في قلق دائم كرهت حياتي و كرهت زوجي حسيت بيه ماعندوش شخصية و ماهوش قانع بيا و احيانا كي يعود يمزح معايا يقولي راكي كبرتي وليتي عجوزة و كي قتلو راهو يغيضني الحال كي تهدرلي هكا قالي نمزح معاك برك و لازم اديري الثقة في نفسك و تقنعي انتي بروحك قولولي برك منين تجي القناعة اذا كان هو يهدرلي هكا

والله ما لقيت ماندير راهي فسدت علاقتي بزوجي و عدت ماني قادرة ندير والو ماني ناكل ماني نخدم حتى ابني مسكين هملتو

ارجوكم شورو عليا بنصائح و حلول و من الجنسين باش نشوف وجهة النظر من الجهتين وارجوكم بدون تجريح واستهزاء لانو اللي فيني مكفيني و شكراااا مسبقا

[om yaakoub]

في الحقيقة ما لقيت ما تقولك لكن اضن اللجوء الى خالقك هو الحل
يا اختاه البعد عن الله ضلال
و نزيدلك حاجة هادي مريضة مالزمش تبعيها ولا تولي كيما هي
مع ان المشكل واضح !!!!!!!!!!!!!!!!!!

[prettyangel]

يا أختي الكريمة ماعليك غير بالثقة بنفسك و التحلى بالقوة أتركي هذا الوسواس جانبا و أهتمي بزوجك و طفلك أكثر و ستعود المياه الى مجاريها باذن الله
ما عليك الى الدعاء بالهداية الى هاته المرأة ، كيف لها أن تتجمل أمام اخ زوجها ربي يهديها ان شاء الله ، لا تتبعي طريقتها أختي الفاضلة الشدة في ربي سبحانه
أما بالنسبة لكلام زوجك أنكي اصبحتي عجوزة هته مجرد مزحة كما قال فعليك أن تكوني خفيفة الظل معه من وجهة نظري عليك بالتحلي بالثقة و قوة الشخصية فان أحسسته بغير ذلك سياثر سلبا على العلاقة
كان الله في عونك و ما عليك الا بالدعاء

[bibicha]

فكرتيني في مرت سلفي والله واش نقولك يا اختي انا دير سبا و زعمة تبن روحها معاه طيوبة و حنونة من جيهتي انا ما نحشمش حابة نسقسيك و جاوبيني المرا ياك تلبس فالدار لراجلها هاو البسي و اتحفي روحك و انا وحدة من الناس نعاونك و نمدلك افكار و اذا عندك الدوارة و الصوالح نمدلك طرق باش تتغيري ما تحيريش اختي و خلي ثيقتك في روحك قوية اذا عندك س ك ا ي ب او ف ا ي س خليهولي قيس ما ندسه و نساعدك على الخاص

[مراد12345]

في مثل هذه الأمور

لا بد أن تستقلي عن بيتهم

وترحلان من ذلك البيت

وإلا ستحدث الكارثة

وكوني متأكدة إذا كان هي لفتت إنتباه زوجك

وهو قال لك ذلك

يعني الشيطان قطع شوطا كبيرا

وقادر تحدث كارثة في أي لحظة

أرحلي من ذلك البيت وأنتهى

[wafamida]

المشاركة الأصلية كتبت بواسطة prettyangel

يا أختي الكريمة ماعليك غير بالثقة بنفسك و التحلى بالقوة أتركي هذا الوسواس جانبا و أهتمي بزوجك و طفلك أكثر و ستعود المياه الى مجاريها باذن الله

ما عليك الى الدعاء بالهداية الى هاته المرأة ، كيف لها أن تتجمل أمام اخ زوجها ربي يهديها ان شاء الله ، لا تتبعي طريقتها أختي الفاضلة الشدة في ربي سبحانه
أما بالنسبة لكلام زوجك أنكي اصبحتي عجوزة هته مجرد مزحة كما قال فعليك أن تكوني خفيفة الظل معه من وجهة نظري عليك بالتحلي بالثقة و قوة الشخصية فان أحسسته بغير ذلك سياثر سلبا على العلاقة

كان الله في عونك و ما عليك الا بالدعاء

شكرا اختي على الرد الطيب و انا كيما قلت في الموضوع مانيش رايحة نعاندها لاني نحشم و لكن هي جريئة لاقصي الحدودو راني نحاول نقوي شخصيتي لكن اذا زوجي قالي كلمة تجرح نولي ننهار وكيما يقولو اذا زاد الشيء عن حده انقلب الى ضده,,,, تحملت مزحة و اثنين لكن المزاح الكثير والله ما قدرت و راني ندعي ربي يفرج عليا و ندير داري و نتهنى من هذو المشاكل

[wafamida]

المشاركة الأصلية كتبت بواسطة bibicha

فكرتيني في مرت سلفي والله واش نقولك يا اختي انا دير سبا و زعمة تبن روحها معاه طيوبة و حنونة من جيهتي انا ما نحشمش حابة نسقسيك و جاوبيني المرا ياك تلبس فالدار لراجلها هاو البسي و اتحفي روحك و انا وحدة من الناس نعاونك و نمدلك افكار و اذا عندك الدوارة و الصوالح نمدلك طرق باش تتغيري ما تحيريش اختي و خلي ثيقتك في روحك قوية اذا عندك س ك ا ي ب او ف ا ي س خليهولي قيس ما ندسه و نساعدك على الخاص

شكرا لك اختي على الاهتمام كنت نحسب غير انا اللي راني نعاني من هذي المشاكل وصدقيني راني نلبس ونتحف روحي بصح مانقدرش نوصل للدرجة انتاعها و الله حرام احيانا تلبس قنادر مفتوحين علي الصدر و احيانا تلبس البونتكور و احيانا تلبس التنورة مع الجوارب النسائية مشبكة راكي علابالك بصح ما نقدرش انا ندير هكا حتى حماتي ماشى عاجبها الحال منها و انا راني انسانة بسيطة حشيشة طالبة معيشة ما عنديش الاساليب الانثوية ما نعرفش نستت و هي ترقق صوتها في الهدرة و دير حركات دلع و الله حرت و ين راهي قارية
اختي العزيزة رايحة نحاول نتواصل معاك ونتشرف نكون صديقتك ما نقدرش نبعثلك الرسائل لانو ماعنديش عدد مشاركات كافي و ان شاء الله نلقى طريقة و انصحيني راني ما نعرف والو و خاصة هذا الزمان عاد صعيب

[maramelmess]

يا يما يا ختي لعزيزة ما عرفتش واش نقولك هاذي مشي تربية
وكلي عليها ربي، و دعي ربي يبعدها على تريقك
راجلك مشي حا يخدعك مع مرت خوه و كاينة عجوزتك
نتيا البسي لراجلك و تهلاي فيه و ماكيي و ما ديريلها كامل قصة
ما تسمعيش بيها غزليها بالسكات

[بيلسان11]

[size="5"]السلام عليكم
ما عساي أقول ربي يسترنا. لا حول و لا قوة الا بالله.
أما عنك يا أختاه فحاولي تدافعي على بيتك و زوجك بكل الطرق اللي تشوفيها مناسبة قوي قلبك و شخصيتك و كوني واثقة من نفسك هذه هي الأشياء اللي تخلي زوجك يكون معاك و ما ينظر لأي واحدة في البيت او خارج البيت. أما عن قول انك عجوزة هي من سبيل المزح لا أكثر لازم تعرفي تقلبي الوضع لصالحك بخفة روح و تتقبلي مزاحه ممكن تقولي ربي يكبرنا في طاعته أكيد راح يضحك و يعجبه الحال اولا خفة ظل و ثانيا تباني بلي راكي واثقة من نفسك و كلامه ما زعزعك. كذلك ما تبينيلوش بلي غايرة منها و ما تبينيلها والو لأنها راح تتفنن في مضايقتك. أخر حاجة الرجل يحب المرأة تكون دائما بشوشة مرحة فلذلك لازم كي يرجع المرة الجاية من غيبته يلقى انسانة مقبلة على الدنيا مرتاحة نفسيا زوجة محبة ودودة ما تتأثر بحتى حاجة و لا بأس ان تتجملي في غرفتك و تلبسي احلى ملابسك. و لا تنسي الدعاء لهذه المراة بالهداية و تدعي ربي يبعد عليك انت و زوجك الفتن. اتنمى ان اكون قد أفدتك. و ربي يفرج عليك و يسترك و يقر عينك بزوجك و ابنك./size]

[wafamida]

المشاركة الأصلية كتبت بواسطة om yaakoub

في الحقيقة ما لقيت ما تقولك لكن اضن اللجوء الى خالقك هو الحل
يا اختاه البعد عن الله ضلال
و نزيدلك حاجة هادي مريضة مالزمش تبعيها ولا تولي كيما هي
مع ان المشكل واضح !!!!!!!!!!!!!!!!!!

شكرا اختي ان شاء الله يفرج عليا و نتهنى

[دروب التابعين]

هذه السلفة لا حياء لها ولا تخاف من عقاب ربها ربي يهديها
من الافضل ماتكونش سلفتك مع الحمو يعني زوجك لان الحمو الموت
وهي عندها زوجها يعني عيب عليها هذا التبرج ونورمالمو تلبس خمار ولباس محتشم وتفهم روحها بصح ربي يهديها

[بني بلعيد]

إلى السيدة : وفاءميدة
السلام عليكم ورحمته تعالى وبركاته
لابد أن تعلمي سيدتي أن أعظم فتنة للرجل هي المرأة ، ويبدو أن زوجك قد فتن بهذه المرأة الطائشة المنحلة أخلاقيا ، ويجب أن تعذريه في ذلك.
الحل الوحيد : هو البحث عن سكن مستقل للكراء مهما كان ثمنه ، حتى يبتعد زوجك عن هذه الفتنة وتكوني أنت آمنة من شر هذه الزوجة الخائنة .
وفي الأخير أدعو لك ولزوجك بالخروج من هذه الورطة
.............والسلام

[wafamida]

المشاركة الأصلية كتبت بواسطة maramelmess

يا يما يا ختي لعزيزة ما عرفتش واش نقولك هاذي مشي تربية
وكلي عليها ربي، و دعي ربي يبعدها على تريقك
راجلك مشي حا يخدعك مع مرت خوه و كاينة عجوزتك
نتيا البسي لراجلك و تهلاي فيه و ماكيي و ما ديريلها كامل قصة
ما تسمعيش بيها غزليها بالسكات

شكرا اختي على الرد الجميل على بالي باللي زوجي مستحيل يغلط بصح المشكلة اثرت على المورال انتاعي عدت مقلقة و مانيش متهنية حسبي الله و نعم الوكيل

[sali-sali]

السلام عليك اختي
يلزم تكون عندك ثقة في نفسك وتعرفي تتعاملي معاها..هيا علابالها انك تغيري وهديك هيا نقطة الضعف نتاعك
احكي مع زوجك..وهيا ابقاي تمعنيلها بالهدرة بالاك تفهم روحها
ونورمالمو انتي تتحجبي قدام راجلها وهيا تاني توضع الحجاب امام زوجك....هدا هو الحياء لي تعلمناه

وكبري بالك شويا ماتتعانديش معاها...الاساس هو الاخلاق و المعاملة اعرفي كيفاه تكسبي زوجك

[wafamida]

المشاركة الأصلية كتبت بواسطة دروب التابعين

هذه السلفة لا حياء لها ولا تخاف من عقاب ربها ربي يهديها
من الافضل ماتكونش سلفتك مع الحمو يعني زوجك لان الحمو الموت
وهي عندها زوجها يعني عيب عليها هذا التبرج ونورمالمو تلبس خمار ولباس محتشم وتفهم روحها بصح ربي يهديها

ربي يهديها ويهدينا شكرا اختي على المساندة