ممكن مساعدة في خبز الرخسيس

nawelz · 2013-04-22, 15:14

السلام عليكم يا شطرات
عجبني خبز الرخسيس كي رحت للشرق بنين بزاف يا ريت تعطوني وصفة ناجحة و نوعيه السميد المستعمل وادا نقدر نطيبو في طاجين الحديد و شكرا

أم محمد تاج · 2013-04-22, 15:24

حبيبتي شوفي كيلي الدقيق تاعك مثلا لقرصة رخساس ديري مغرف صغيرة سميد وشوية برك خميرة الكسرة وشوي سينوج ولا جلجلانية و2 فناجل زيت ولميها بالماء وأعجني حتان تولي طرية وماتكثريش الما باه ماتجيكش جارية المهم تجي طرية وسخني الطاجين تاعك مليح وحطيها تحمار من الجيهتين
والدقيق الممتاز حبيبتي كل منطقة واش الدقيق تاعها حنا هنا في باتنة كاين دقيق التل ولا تاع قسنطينة ولا بن عمر ولا تاع سطيف
نشالله نكون وفيت حنونتي نشالله هاذ اليومين نحطها موضوع وتستفادي انت والأخوات والأخت غزة في عيوني.

ماجدة ميمي1 · 2013-04-22, 15:27

مساء النور
انت تقصدي خبز الرخسيس هو الكسرة نتاع الرخسيس لي نديروها نحن في الشرق
نحن في سطيف نديروها كالتالي:
سميد ممتاز + ملح حسب عدد الكسرات + زيت + خميرة الخباز + الماء وتلم ماتكونش يابسة وماتكونش جارية حطيها في ساشي بلاستيك باه تجي ساهلة للعجين وتتركيها في مكان دافئ لمدة نصف ساعة او ساعة
حطي طاجين المطلوع يسخن ويكون من الطين احسن لانو هو بعد يزيد في بنتها
جيبي العجينة وقسميها على حسب عدد الكسرات لي درتي وحليها بالحلال كيما الكسرة العادية وحطيها تطيب من الجهتين وما تنسايش تثقبيها
انا نحب الرخسيس بزاف لانو صح بنين
ادا كان عندك اي سؤال راني هنا

*بيتي مملكتي* · 2013-04-22, 16:00

عزيزتي الكسرة نتاع الرخساس كيما نقولولها حنا في بسكرة تكون كالآتي

بعلبة الطماطم نتاع كيلو الفارغة نقيسو الكمية
علبة و ربع تعملك 2 رخساس متوسطين +1 م ص سكر + 1 م ص خميرة الخبز الفورية + 2 م ص ملح + 2 كاس شاي زيت
أخلطي الكل بالماء حتى تحصلي على عجينة طرية أعجنيها شوية بدون ماء إلا إذا شفتيها قاسحة شوية زيديلها شوية ما تكون طرية ماشي كيما نتاع المطلوع المهم تدخل بعضاها مليح و ما تعملش شقوق
ثم قرصيها و أثقبيها بالشوكة و طيبيها كيما تحبي سواء في طاجين الحديد أو الطين المهم تسخنيهم من قبل

zahra30 · 2013-04-22, 16:31

ما شاء الله ... هذي كل ولاية عندها الرخسيس انتاعها سبيسيال هههههه ....

*بيتي مملكتي* · 2013-04-22, 16:39

اقتباس:

المشاركة الأصلية كتبت بواسطة zahra30

ما شاء الله ... هذي كل ولاية عندها الرخسيس انتاعها سبيسيال هههههه ....

علابالك يازهرة في كل ولاية كل عائلة عندها طريقتها الخاصة في الطبخ و في العائلة الواحدة كل يد عندها طريقتها في الطبخ كذلك ما تستغربيش

عروبتي · 2013-04-22, 16:48

اقتباس:

المشاركة الأصلية كتبت بواسطة أم إياد أحمد أمين

عزيزتي الكسرة نتاع الرخساس كيما نقولولها حنا في بسكرة تكون كالآتي

بعلبة الطماطم نتاع كيلو الفارغة نقيسو الكمية
علبة و ربع تعملك 2 رخساس متوسطين +1 م ص سكر + 1 م ص خميرة الخبز الفورية + 2 م ص ملح + 2 كاس شاي زيت
أخلطي الكل بالماء حتى تحصلي على عجينة طرية أعجنيها شوية بدون ماء إلا إذا شفتيها قاسحة شوية زيديلها شوية ما تكون طرية ماشي كيما نتاع المطلوع المهم تدخل بعضاها مليح و ما تعملش شقوق
ثم قرصيها و أثقبيها بالشوكة و طيبيها كيما تحبي سواء في طاجين الحديد أو الطين المهم تسخنيهم من قبل

نفس طريقتي
يعطيك الصحة ام اياد ونطيبها في طاجين الطين بعدما يسخن مليح يجي هايل وطري

*بيتي مملكتي* · 2013-04-22, 17:00

اقتباس:

المشاركة الأصلية كتبت بواسطة عروبتي

نفس طريقتي
يعطيك الصحة ام اياد ونطيبها في طاجين الطين بعدما يسخن مليح يجي هايل وطري

الله يسلمك عزيزتي أكييييييييييد في طاجين الطين تجي أروووووووووووع

أم أسامة 07 · 2013-04-22, 17:09

ماشاء الله يعطيك الصحة

aynechamse · 2013-04-22, 17:16

شوفي اختي الفاضلة
السر في العجينة الطرية و الممتازة هو انك تتركيها تترتاح مدة معينة بعدها سوف تجدينها طرية قابلة للطهي

oum tessnim · 2013-04-22, 20:21

حنا في عين فكرون ولاية أم البواقي نديروها كالتالي
دقيق مليح المهم ماش خشين +تبسيها بالزيت +ملح+سينوج أو جنجلان أو الإثنين معا +الخميرة تاع الكسرة+شوية سكر باش تطلع الخميرة والكسرة تجي حمراء
تبليها بالماء دافيء أو سخون شوية وتعجني مليح وما تجريهاش كي المطلوع مايابسة ما جارية تغطيها بالكيس تاع البلاستيك حوالي ساعة
تنحيها من الكيس وتديري قرصات ملاح وتحلي بالحلال أو الرولو وتخليها تزيد ترتاح فوق الطرشونة النظيفة في هذه الأثناء تكوني تسخني في الطاجين إذا كان ما عندكش تاع الطين ديري تاع الحديد أنا كي تتحتم عليا الظروف نديرو حتى في مقلة تيفال ثقيلة وأتمنى أني ساعدتك وشهية طيبة

همسة مشاعر · 2013-04-22, 20:50

حنونة راهم حطولك البنات الطريقة لخبز الكسرة تاع الرخساس رانى الكل نعملوها في الشرق هكا تجيك قاطو ومتنسيش السميد لازم تختاري سميد مليح مثل سميد بن عمر راهم احسن نوعية

nawelz · 2013-04-22, 21:51

شكرا جزيلا للنساء الشرق الفحلات يعطيكم الصحة جميعا عاونتوني اكتر من اللازم ربي يحفضكم

أنآحلُم · 2013-04-22, 21:51

ختي هدا موضوعي نتمنى يفيدك بالخطوات المصورة

https://www.djelfa.info/vb/showthread.php?t=1237380

nawelz · 2013-04-22, 21:59

اقتباس:

المشاركة الأصلية كتبت بواسطة أنآحلُم

ختي هدا موضوعي نتمنى يفيدك بالخطوات المصورة

https://www.djelfa.info/vb/showthread.php?t=1237380

شكرا اختي ربي يحفضك