بالله عليكم من منا غير طبيعي ؟

[مشكلتي]

بداية احبتي في الله احييكم بتحية الاسلام فالسلام عليكم و رحمة الله
مشكلتي أنه و بعد خطبتي لرجل رؤية ثم عقد شرعي ... كان شرطي الوحيد ان يكون متق الله و لا نأكل الا حلالا و لو مت جوعا وافق و عادي
احنا ما نحكوش كثير لكن كل ما نحكي معاه نكتشف عدة تناقضات مثلا مرة قالي : خوك ما تذكرنيش تلاقيتو مرة قتلو وين قالي كان خارج من المستشفى يبحث على دم لوالدك و انا رفضت بحجة واهية * و فعلا والدي كاين دايما يزيد الدم *سكتت فهم سكوتي و نظن فهمتوه رد قالي لالا ربي يسامح راها غير صغر
في يوم آخر قتلو بمزحة تبان كنت شقي في الصغر قالي لوكان تشوفي مرة كان صاحبي يبيع و فاست ما بغاتش تتباع طلعت في الثمن جا شيخ كبير قاسها ما جاتش قدو قعدت غير نمدح و نقولو راهي هايلة عليك و أصلية علا بيها غالية قال بيعتها في لحظة و ماهيش حتى مقاس الشيخ ربي يغفرلي برك مرحلة صغر ..............؟؟؟؟؟؟؟؟؟؟
نجو للحاضر هو عندو دار قديمة رفض نسكنو فيها و قال سلفلي صاحبي دار حتى نبيع لقديمة من بعد غلق فيها نافذة قتلو كيفاه تخدم دار ما راهيش ليك و احنا ياربي نعيشو فيها مدة لقالي حجة و سكتت ايا عرفت لي راه عندو دار ثالثة ملكو و كي لمحتلو قالي راني شريتها انا و صاحبي شركة و راح نخلصو فيها و نديها و نسكنو فيها يعني 3 ديار ؟؟؟؟
يرفض اطلاقا انو عندو صاحبو مقرب قال عندي واحد و ماهوش أنتيم عادي هو دائما يكمل الخدمة يروح عندو صباح وعشية و دايما معاه ؟؟ و مرة كلمني بالمساء سمعت صوت التلفاز استغربت قتلو محل و الا ؟؟ قالي لالا راهي غرفة داخل المحل لداخل و فيها سرير و تلفاز و يرتاح فيها صاحبي **ياك ماراهوش انتيم ؟؟** قلبي انقبض كيفاش هادي غرفة بمحل و هو بمدينة صغيرة و خطيبي عندو سيارة ماراهوش بعيد على دار والديه ؟؟؟؟؟ و كالعادة رفض المناقشة
كل أسبوع يروح لولاية اخرى نهاية كل اسبوع و سألتو قالي آه عندي صاحبي خدام في و لايتنا و كان مقاطع والديه و انا اصريت عليه و راني نديه لدارهم بالسيارة كل اسبوع و نتعشاو لتما و نجو ..؟؟ هو يفرودي بالسيارة لكن هل يعقل مثلا يروح معاه و يقعد معاه و كل اسبوع
هل هي أمور عادية عقلي يقلي الدار خباها ؟؟ ....... و الغرفة داخل المحل و فيها كلشي و هو القيلولة فيها ؟؟و ماراهوش صاحب انتيم ؟؟؟؟؟؟؟؟ و و و و و كالعادة يرفض يحكي و يلق اي اسباب
هل أنا أبالغ بتحليلي للأمور هكذا أم ......
للعلم حاولنا نسألو عليه قالولنا راه ناس ملاح لكن سرو عندو وحد ما يحكي حتى الواحد غير بينو بين صاحبو الأنتيم ؟؟** لي قلتلكم عليه **
نوروني جزاكم الله كل خير لوكان مكاني تخمو لوين راني نخمم ؟؟؟

[/زهرة عصفور الجنة/]

والله الامر غريب رأيي ان تسألوا عليه اكثر من جهات اخرى او ان تتبعوه اشم في الامر رائحة ان والله اعلم.نصيحة استخيري اله قبل ان تقدمي الى خطوة جديدة معه

[هند222]

والله المشكلة تحير ماعليك سوى غاليتي ان تضعي واحد تثقين فيه مثل اخوك وتخليه يتبعه

والآن خير من غدوة

وربي يسهل عليك

[*نآدرة~]

غريب والله،كاين واحد الاشياء تبان عادية كيما يكون عندو ثلاث ديار بلاك ربي رازقو من عنده بالصح واحدة اخرى لا كيما يروح كل أسبوع لدار صاحبو ما تدخل خلاص في العقل،وزيد صح كان طايش بزاف في صغرة باش يبيع فاست بهذيك الطريقة اللاشرعية عرفي بلي هذا داهية ونجيك الصح ينخاف والله
زيدي سقسي عليه ياختي مليح مليح وماترميش روحك وخلاص،انت أصلا قلبك ماراهوش مطمنك معناها اتبعي احساسك وخلي واحد من العايلة يسقسي عليه ولا استدعى الامر حتى يتبعه ويشوف واش كاين
ربي مافيه غير الخير ياختي،ماتظليش توسوسي في روحك وثان ما تكونيش غافلة بزاف،ربي يقدر لي فيه الخير وان شاء الله تكون غير وساوس وربي يتمملك بالخير ان شاء الله

[انغام المنى]

عاودي سقسي عليه الامور الي قلتي عليها غريبة شوية واعيدي الاستخارة وربي يجيب الي فيها الخير

[primrose1]

السلام عليكم
اختي الحكاية ما هيش واضحة خلااااااااااااااااااص
ننصحك ما تزربيش بالعرس, احكي لوالدك و لا خوك كبير, هوما يعرفوا كيفاه يزيدو يسقسوا عليه,

ربي يسهلك ف اللي فيها خير

[مريم الصابرة]

السلام عليكم اختي
نقولك الصح هذا غامض وباين مخبي امور بزاف واللي متقي ربي عمر وولا يخدع الناس في صغرو او في كبرو و3 ديار هذي واعرة وغرفة في محل كل شي باين باللي كاينة حاجة يعني اختي لازم لما تسأليه ما تخليهش يتهرب من النقاش كوني حادة معاه ولازمك تسقسي مليح مي راكم عقدتو يعني لو سالتي عليه مليح وعلاه يسافر انا سامحيني قريت الموضوع بانلي راجلك داير امور كبيرة وإسمحيلي لازمك تتحقي منها ربي معاك.

[soha1987]

صح كيما قاتلك مريم راجلك يخوف ولي راه مخبيه الله يعلمه حاولي تعرفي السر

[اية الرحمن1988]

السلام عليكم
أختي حبيت نقلك كلمة واحدة عن تجربة
سقسي مليح مليح قبل ما تندمي
وخلي كلشي واضح راهي حياة ماشي لعب
وتريحي نفسك وتنحي عليك الوسواس
راح تمرضي إذا راح تبقاي في شكوكك
لأنو ممكن تكون طبيعتو هكذا ميحكيش بزاف
ولا يحس بلي حوايج تافهين وانت عندك مهمين
وإن شاء الله ربي يسهلك طريق الخير

[Ouided]

أختي إذا كان في لارمي بكري ولا خدام بعيد بالاك تكون عندو مراة أخرى سقسي عليه وديريلو واحد يتبعو يشوف اسراره قادر يكون يخدم في حاجة غير قانونية الله يبارك 3 ديار وكل أسبوع في بلاصة بالاك خدمتو يوصل كاش حاجة ما تربطيش روحك حتى تعرفي وين رايحة

[lilou f lilou a]

بطلي وهني روحك

[* الحلم سكر *]

هي بصراحة اختي تبان امور غير طبيعية و الله اعلم
اسالي مليح هذا زواج ماشي لعب و ربي معاك

[zahra souf]

استخيري اختي

[khadidja master]

السلام عليكم شوفي اختي لازم تستفسري عليه مليح كاين بزاف طرق باه تعرفي الحقيقة مثلا بعتي خوك يسول على صاحبه لانتيم ابالاك يتوصل من خلالو لحقيقته وربي يجيب لخير

[جيهان86]

نقللك الصح اختي راجلك قلقني سقسي مليح عليه