ارواحوا فهموني

حنين الوطن · 2013-03-11, 21:07

سلام عليكم
انا جربت هاد طارت و من هذا المنبر اشكر الاخت على وصفه يعطيك الصحة
https://www.djelfa.info/vb/showthread.php?t=1152353
طبقتها خطوى خطوي ما فوت حتى ملاحظه في طريقة الجنواز
المهم نحكيلكم
انا طبقت كلش و انا متاكدة بلي ما غلطتش
دخلتها لفور شعلت النار غي على التحت و خليتها طيب لحد الان راني مليحة
ايا جنواز طلعلي فرحت طاليت عليه غي من زاجة نتاع الفور و عيطت الماما تشوف قاتلي مليح جيبتيها
ايا طفيت عليه تحت و بغيت نشعل الفوق باش الطيب شعلت فوق
ايا هنا المشكلة
الجنواز كان منفوخ و يهبل و حده وحده هود و لا طبقة الرقيقة
ما فهمتش علاه انا واش درت
زعما ضربته بعين بصح انا عيني ما تخرجش هههههههههههه
و الله ما فهمت فرحتي قاع مشات
قوليلي فاش غلطت زعما علاه جنواز هودت ماولاتش منفوخه ياك راكو فاهميني

الكروان الجريح · 2013-03-11, 21:47

مساء الخير اختي من تجربيتي الضئيلة يمكن نجوبك لما دخلي الجينواز الفرن ما تفتحيش عليها خلاص حتان طيب
ضعيها في الوسط و اتركيها راح تحمار وحدها انا هكا نعمل موفقة

لميس اميرة · 2013-03-11, 22:03

المفروض تسخني الفرن مليح فالبداية و تخليه على درجة عالية و من بعد حطي الكيكة و لا الجينواز 10 دقائق على الدرجة العالية و من بعد نقصي النار 180 او 150 حسب الفرن نتاعك و خليها طيب فالرف السفلي حتى تحمار الحواف زيدي شعلي من فوق و عموما الكيكة كي تكون مخدومة مليح رح تحمار من تحت و من فوق حتى لو شعلتي من تحت فقط

و حاجة تاني اختي

الكيكة هبطت ممكن كانت ناقصة فرينة

ماشي الوصفة لما تحكها اخت طبقيها و تقولي ما صلحتش
مثلا الملعقة لي استعملتي ماشي كيف كيف مكن الكاس
ممكن حجم البيضة
ممكن نوع الفرينة

mounia hse · 2013-03-11, 22:07

اختي الجينواز ماتحليش عليه كيكون يطيب حطيه في الفرن على درجة حرارة 180 حت يطيب خرجيه خليه يبرد شوية وحطيه فوق شبك حت يبرد خلاص

atin · 2013-03-11, 22:52

asalem aliki oukhti ana 3la hsab wache 9olti moumkin tkouni tefifi l fourn min asfal w 3adjna mzel matabetche mel dakhel ya3ni kanet mnfoukha mlih wa lakin kan lazem tkhliha heta lchoufi atraf el3adjina bdat tahmar mel atraf bach tedemni bel tabet men dakhel w tefi men taht w tcha3li men fok wikoun lfourn bin 180 ila 200 daradja miawia ardjou an akoun kad afatouki waasifa liani katebt 3ababia bi hourouf latin le pc diyali mahbooooooooooooool

amirati · 2013-03-11, 23:11

جنواز متحليش عليها الفور بلا ماتشعلي عليها من فوق وحدها تحمار غلطتي كي حليتي عليها و مكنتش خلصت طيابها

شهرزاد أم التوأم · 2013-03-11, 23:14

اختي الجينواز و الكيك ما شعليش عليه من الفوق راح يحمار وحدو خليه على 180 و بعديه على النار وقبل ما تحطيه سخني الفرن على 240 مدة 15د

ام غالية · 2013-03-12, 08:46

لازم تخليها فى الفور ما تفتحيهش باش ما تتفشش معليش زيدى جربيها باش نشوفوها

*ام رامي* · 2013-03-12, 10:07

افادوك الاخوات
الجينواز تطيب من تحت حتى تحمار من فوق ما تفتحيش الفرن وتشعلي من فوق كي تشمي ريحتها بدات تخرج نقصي للحرارة برك باه ما تتحرقش من تحت و تنشف من داخل وتبقى طالعة وتطيب مليح بلا ماتفتحي عليها

ام رنا · 2013-03-12, 10:13

حنونة خلي ماتشعليلهاش من فوق غير من تحت وتحمار من فوق ولكن اظن انتي ماخليتيهاش طابت عليها هبطت يعني لما تفتحي تهبط مي قلتي انتي ولات رقيقة خلاه يعني الله اعلم اظن مكانتش طابت مليح
عاودي جربيها حنونة حتى تنجحي شكون الي نجحت في حاجة غير بعدما فرغت محتويات الكوزينة ههههههههههههههه الله يعينك حنوننة

حنين الوطن · 2013-03-12, 11:07

شكرا على ردودكم
راح نعاود نجربها و نطبق نصائحكم بالحرف
و ان شاء الله تخرجلي مليحة و نجي فرحانة نوريهالكم

the kindest · 2013-03-12, 14:43

انا من خلال تجربتي اول حاجة البيض كي طلعيه بالباتور دوري جيهة وحدة فهمتي ياليمين ياليسار تاني حاجة طلعي البيض مليح حوالي 10 د تالت حاجة15 د قيقة الاولةمتحليش الفور تصلحلك

OU SS AMA · 2013-03-12, 15:19

جربي هاد النصائح بحدافيرها ورايحة تشوفي النتيجة مبهرة وهاكي. قطعة من جنواز عملتها صدقيني جات هايلة والنصائح خبيتهم في المفضلة وربي يجازي مولاتهم لي كتبتهم
- اولا نصائح خاصة لنجاح تارت الجينواز [IMG][/IMG]
- و ثانيا شرح مصور لعمل تارت جينواز بنكهة الحامض و هنا لكي الاختيار في التزيين هي الاساس راه في تحضير الجينواز

1/نصائح لنجاح كيكة الجينواز
1-الجينواز تعتبر من الكعكات الاساسية لتحضير معظم الطورطات و هي خفيفة لعدم احتوائها على دهون ( لا زيت ولا زبدة)
2-قبل البدء في تحضيرها يستلزم اخراج البيض من الثلاجة ساعة قبل التحضير أي يكون بدجة حرارة الغرفة
3-يستحسن فصل الصفار عن البياض و هي باردة حتى يسهل عملية الفصل
4-في الاصل جينواز تخبز بدون خميرة كيميائية لكن نضيفها للاحتياط
5-نقوم بنخل ( غربلة) الفرينة مع رشة الملح و خميرة الحلوى مرتين لاعطاء نتيجة افضل
6-عدد ملاعق الماء = ½ كمية البيض
7-خفق الصفاراولا مع كمية السكر ثم خفق البياض مع كمية السكر المتبقية لاننا لو قمنا بخفق البياض في البداية ينكمش مع الوقت و درجة الحرارة المرتفعة في المطبخ
8-كيس فانيلا نضيفه للصفار و للبياض للقضاء على رائحة البيض
9-بعد الانتهاء من خفق الصفار نغسل مضربي الخفاق الكهربائي جيدا و نمسحها قبل خفق البياض
10-يسخن الفرن على 180 درجة قبل البدء في الخفق
11- ندهن الصينية بالزبدة و نرشها بالفرينة مع نزع الفرينة الزائدة
12- يجب الا يتجاو خليط الجينواز ½ ارتفاع الصينية ولا يجب الفتح على الكيكة قبل نضجها
13-الحشو يكون حسب اختيارك ممكن تحشى بالكريمة شانتيي او كريم باتيسيار او كريمة الزبدة و من الاحسن سقي الكيكة بالسيرو حتى ماتبقاش ناشفة وكذلك بالنسبة للتزيين لك الاختيار
14-ضروري باش نخليها على الاقل ½ يوم في الثلاجة قبل التقديم حتى تبرد و تشرب كل المكونات فيها و تعطي ذوق رائع

ملاحظة
- نفس الشيء بالنسبة للبيسكوي رولي ( gateaux rouler) نتبع نفس الخطوات الفرق فقط في صينية بحيث يخبز في صواني المستطيلة الشكل او المربعة و هنا خليط جينواز يكون سمكه قليل وليس ½ ارتفاع الصينية
- مدة الطهي في بيسكوي لا تتجاوز من 10 الى 15 د

sakura be · 2013-03-12, 15:24

انا ثاني كانت عندي نفس المشكلة شكرا اختي على الموضوع ولبنات على الاجابات

manal01 · 2013-03-12, 15:27

مثل ما افادوك وكلهم قالوا ليك تقريبا نفس الملاحظة