لمن تبحث عن عجينة الرشة

الامل نور · 2012-12-03, 08:37

السلام عليكم
كيف حالكم ان شاء الله تكونوا بالف خير
اختي العزيزة بالنسبة للعجينة تاخدي 1كلغ من الدقيق الرطب +ملح + الماء ديريها يابسة ثم اعجنيها (انا نعجنها مليح)
ثم حطي قدامك صحن فيه الفرينة او المايزينة
اعملي حربوش قطعيه ثم نشفي هدوك الدوائر ب الفرينة و حليهم في المشينة رقم 1 ثم +اعمليلهم الفرينة و+حليهم في رقم 4 و خليهم يريحوا 10د ثم +حليهم في رقم 6
خليهم ينشفوا (مشي حتى ييبسوا )
كي تحسي بيهم نشفوا جوزيهم في المشينة في الجيهة الرقيقةتع الرشتة قبل هذا حطي قدرة تع الكسكاس فوق النار بش تفوريها
اخدمي غير بشوية
كي تقطعهم ادهنيهم بشوية تع الزيت و حطيهم يفوروا ثم زيدي اخدمي شوية يكونوا لولين فاروا نحيهم على جهة و كملي العملية حتى تخلصي كي تكملي الكل خليها تبرد
اذا حبيتي طيبيها في هداك النهار طيبيها و لا تقدري تحطيها في الثلاجة و طيبيها في اليوم التالي كما تقدري تحتفضي بها في المجمد
ان شاء الله نكون افدتك (اذا ما فهمتيش اي حاجة قوليلي)
لا تبخلوا علينا بدعائكم

سمراء الدنيا · 2012-12-03, 09:39

بارك الله فيك على الشرح الوافي

feuilleblanche17 · 2012-12-03, 09:48

بارك الله فيك كنت نحوس عليها
شكرااااااااااااااااااااااااااااااااا

ام يمينة · 2012-12-04, 10:17

مشكورة اختي على طريقتك مفهومة بدون صورة

nadira12 · 2012-12-04, 10:33

يعطك الصحة كنت النحوس عليها لك منى الف شكر

ملاك الحياة · 2012-12-04, 10:39

بارك الله فيكي - - - جارتي راهي غير تحوس عليها باش تخدمها و تبيعها مسكينة راجلها معاق
ربي يجازييك اختي الكريمة
تسلمي

الامل نور · 2012-12-04, 12:08

اختي العزيزة ملاك الحياة ربي يحفضك
قولي الى جرتك اذا ما فهمتش رني هنا
ربي يقدرها على الزمان ويكون معها واذا حبت دير التريدة نعلمهالها واش تحب تقلنا ربي يكون في العون