حائرة في أمري

[صفاء نور اليقين]

السلام عليكم

مساء الخير جميعا

والله راني حاسة بحزن كبير

حاب واحد يجي يخطبني هو إنسان مليح ويعرف ربي ومتربي وحلم كل فتاة لكن قالي حبيت نعترفلك بحاجة قبل مانتقدملك قالي محبيتش نحرجك من بعد قتلو ايه خير معليش قولي قالي بلي انا منقدرش نجيب لولاد ...صراحة غاضني وطاح عليا الخبر كالصاعقة قتلو هي معطاة ربي قالي انا منحتمكش خممي ورديلي والله احترت في الأمر صح صح قطعلي قلبي وش ذنبو هو مسكين انا بالرغم من اني ديما نحلم نكون أم وديما عندي شعور الأمومة بصح في هذيك اللحظة كنت حابة نجاوبو ونقولو ايه نورمال مكان حتى مشكل بصح خفت من بعد يكونوا مشاكل والله معرفت كيفاه


نتمنى تعاونوني ياريت تنوروني بآرائكم




تقديري

[فانيسا]

يا اختي خممي مليح وصلي صلاة الاستخارة ومتجريش وراء العاطفة لان الامر حساس هادي حاجة ربي لكن لازمك تقتنعي و ميجيش نهار وتندمي ولا تلوميه الامر صعيب لان المال ةالبنون زينة الحياة الدنيا وهو ايزيد ايشوف الطب تطور بزاف وربي ايجيبلك لي فيه الخير

[nouna l maghbouna]

اختي لعزيزة
شوفي 1: ديري صلاة استخارة
2:كاين اللي تزوجو و امبعد باه عرفو بلي مايجيبو الاولاد و هدا راه صارحك (حاجة فوور)
3:كاين اللي اتزوجو و جابو الاولاد و ميش متهنيين
4:قادرة تزوجي بيه و تفرحيه ربي يفرحكم و يجيب اولاد و عادي (ربي على كل شئ قدير) و هدي صرات بزاف
5:شوفي قلبك وش راه يقلك
6:المهم لهنا و الله الاولاد ميش كلشي كي تكوني انتي و راجلك متهنيين الدنيا و مافيها

[mina18]

والله موقف حساس
والراجل مادام صارحك يعني نيتو معاك مليحة
انت استخيري ثم استشيري وخممي مليح مليح مليح وزيد هذا مكتوب ربي لان غريزة الامومة موجودة في اي وحدة فينا وكل وحدة تتمنى الاولاد لكن اي وحدة سواء عزباء والا مخطوبة والا مزوجة تقدر تكون عقيمة والا زوجها او خطيبها هكديك لان هذا علم الله وغير ربي يعلم وربي الي كتب الاولاد المهم استخيري وقولي للخاطب هذا يعذيك فرصة باش تفكر وتستخير ورديلو بعقلك لاداعي للعجلة فب امر مثل هذا

[tarek1987]

اتخذي قرارا لا تندمي عليه ابدا ......

[امونة الشاوية]

يا اختي والله هي صعيبة خلاص باش تتخذي قرار الزواج و انت علابالك بلي من الاول ما تكمليش الحلم التاني في حياتك وهو حلم الامومة اول حاجة انت استخيري
الله في صلاتك ثم استشيري اهلك المقربين واذا كان الراجل اهل للخير و يعني ما يترفظش انا يظهرلي عادي يمكن ان تقبلي و تخيلي نفسك انت في مكانه اول حاجة الصدمة انو عاقر و تاني صدمة الرفض وما تدري يمكن انو الله يجيب الشفاء من عندو و تانيا انا احيي الراجل لانو شهم و خبرك من الاول و عطاك حرية الاختيار لو كان جاء احد خبيث او يقولك نديها ومن بعد خلاص ماتقدر تدير والو و ربي يجيبلك اللي فيه الخير

[zima2012zima]

ربي يهديك للصواب

[صفاء نور اليقين]

ربي يخليكم والله أرحتوني بكلامكم

نزيد نفكر ونصاي صلاة الاستخارة ولي جابو ربي فيه الخير

تقديري

[نورسين.داية]

السلام عليكم

أسألكي سؤال عزيزتي : لو نقلب الأدوار يعني العكس أنتي التي لا تستطيعين الإنجاب ....هل كان سوف يتزوجكي ؟؟؟؟؟

و سوف أضعه في قسم الحياة الزوجية و أقرأي الردود بنفسك .........................و سوف ترين أنانية الرجل الجزائري إلا من رحك ربي
عزيزتي مجتمعنا يمشي بمنطق .....نوض بحملك و لى طيح ........................معنى المثل مشكلتك تحملها لوحدك الله إسهل عليك ..........................بالتالي فكري جيدا قبل أي خطوة

وفقكي الله أختي

[صفاء نور اليقين]

شكرا أختي على رأيك واهتمامك

وساتاعبع الردود بإذن الله


شكرا

[ريم الوداع]

حنونه انا نقلك وافقي ما فيها والو حنونه فايده تتهني تقدري تتكفلي بيتيم وتربحي اجر عظيم منو وبلاك ربي يعطيك لانك قبلتي بحرمان .......... طممنا ياااااااااااااااااك وقلينا واش جاوبتي مدبيا تفرحنا هههه

[feriel farawla]

ماتشوفيش درك من بعد الزواج درك تحسي بنعمة نتاع الاولاد

اذا كنت كبيرة في العمر بلاكش

اما كون راكي صغيرة في رايي ترفضي

و القرار ليك

[جمال الدين الأفغاني]

السلام عليكم

والله اختي الكريمة لو انت مستعدة للتضحية

التي امامك في حالة قبولك اعلمي

أن الله يمكن أن يجازيك بقبولك به فينزل رحمته عليكما

ويشاء تعالى أن ترزقا بالذرية وذلك ليس على الله عز وجل بعسير

فإن أراد شيئا يقول له كن فيكون

وإما أن تجازين بها في الآخرة ووتتنعمين بجنات الخلد على ما قدمتي في دنياك

بقبولك به وقليل من الناس من فيه روح التضحية من أجل الآخرين

وفي حالة رفضك اعلمي انك ايضا قد تواجهين احتمالات

وارى انه عليك ان تتوقعي الاسوء لا قدر الله حتى لا تنصدمي ان وقع

فمثلا لو رفضت يمكن ان يتزوج هو باخرى ويقدر الله ويرزق بالاولاد

ساعتها كيف يكون حالك او انك انت لا يقدر لك الزواج من بعده

فكيف يكون حالك ؟؟؟

لذلك انت استخيري الله اولا واستشيري والديك

واسألي الله أن ينير بصيرتك ويرشدك لما فيه الاصلح لك وله

واذا تزوجتو ندعو ربي يرزقكم من فضله

وينعم عليكم بالاولاد بنات وبنين ولكل المسلمين

اللهم آمين اللهم آمين

[صفاء نور اليقين]

ربي يخليكم وينوركم والله ردودكم كامل ريحوني

ولحد الآن عييت نقرر

وأكيد كي نتخذ قرار راني نخبركم




ربي يجازيكم كاااامل



تقديري

[mitrochka]

بارك الله فيك اختي و يسر لك حلا من لدنه
أنصحك بلإكثار من صلاة الإستخارة