بيتزا تقليدية

[ريحان الجزائر]

السلام عليكم و رحمة الله تعالى و بركاته

اليوم يا لبنات و يا خواتاتي جبتلكم وصفة بيتزا أنا نسميها بيتزا تقليدية عيينا من البيتزا لي باللحم و الدجاج مالا ماما قالت لي بكري لما كنت نخدم كنت نشري بيتزا من واحد المخبزة يخدمها غير بالطماطم و كانت بنينا مالا أنا غيرت فيها شوية و جبتهالكم باش جربوها و أكــــــيــــــــد راح تعجبكم

نبداو بسم الله

أولا : العجينة راني ماصورتش الطريقة لاخاطر باينة أنا عيني هي ميزاني كيما يقولو ههههههههه في قصعة درت الفرينة و مغرفة سكر و الملح و خميرة الخبز و الزيت و لازم تكثري الزيت لأن سر عجينة هذه البيتزا هو أنها جي مبسسا و لما تضيفي الزيت حكيها بيديك باش يتخلط مع الفرينة مليح ثم أعجنيها بماء دافئ و لما تعجنيها حطيها ترتاح و لما تخمر عاودي أعجنيها و قسميها على حساب العدد تاع السنيوات لي راح ديريه يمكن وحدة أو 2 أو 3 على حساب عدد العائلة و لما تقسميها زيدي خليها ترتاح أبعد شدي السنيوة تاع الفور طبعا و دهنيها بشوية زيت و حلي فيها العجينة و أتقبيها بالفرشيطة و إلى الفرن لي تكوني شعلتيه من قبل خليها داخل الفرن 5 دقائق حتى لما تعمريها بالخضار من فوق ماتكونش معجنة
ثانيا : الصور راح تبين المقادير لي تحتاجيها


هذه صورة العجينة لما حليتها و درتها في السينية و تقبتها بالفرشيطة




و هذه صورة المقادير و هي عبارة عن فلفل طماطم و بصل و جبن و زعيترة و زيتون و بالنسبة للخضار لما تقطعيها ضيفي لها الملح و فلفل أسود و كمون




و هذه عبارة عن طماطم مصبرة و هريسة و ملح و فلفل أسود و كمون تخلطيهم مع بعض و تضيفي لهم القليل من الماء





ثم تدهني بها العجينة لي تكوني طيبتيها شوية كيما وضحت مع الأول



ثم تحطي الطماطم و الفلفل و البصل و الزيتون و الجبن و الزعيترة و إلى الفرن




و لما يحمارو الطروف ماعنتها راهي طابت و لما تخرجيها إيلا كان عندك fromage gruyére ديريلها




و هنا قطعتها و حطيتها في طبق التقديم




أتمنى أن الوصفة تكون عجبتكم و تجربوها
ملاحظة :
لما تقطعي الخضار و تضيفي لهم الملح و الكمون و الفلفل الأسود راهم يطلقو الماء تاعهم خاصة الطماطم مالا ماضيعيهش و لما تخرجي البيتزا تاعك من الفور أسقيها بهاداك الماء و هي سخونة
و تستطيعي أن تضيفي les anchois لي يحبهم و بالنسبة لي حاب الخضار تكون طايبة بزاف تقليهم في المقلاة ثم تبعي نفس الطريقة


شهية طيبة