تليتلي مفور بنيييين و خفيف و صحي

[*أم ثازيري*]

السلام عليكم
جبتلكم التليتلي على طريقتي يجي هاااااايل و كنت وعدت بيه طباخات الكوزينه أني نحطولكم موضوع كي نصور ألطريقه
بسم الله نبدأه
المقادير :
تليتلي من الأحسن لي شويه طويل لانو كاين الصغير
خضر و قد ماكثرتي قد مايجي بنين ( بطاطا زروديه بصل جلبانه جريوات لفت .....)
بيض للتزيين
زيت
ماء و ملح
كميه مليييييحه من الزبده
كيفية التحضير :
حطي التليتتلي + زيت و خلطي ثم اسكبي ماء سخون شويه و ملح و خليه يتشرب يطرا شويه ( هادي طريقه مليحه باه ثم ثم يفورلك و يوجد)
في هاد الوقت وجدي الخضر نتاعك
من بعد صفي التليتلي و خليه ينشف حليه بيدك و حطيه يفور
بعد ما يفور نحيه كبي عليه شويه ماء و حركيه و رجعيه للكسكاس
و كبي عليه الخضر المقطعه
خليه يفور حتان يطبو الخضر
نحيه و شوفيه اذا طرا و اذا ماطراش زيديلو شويه ماء وحركي و خليه يشرب كيما الطعام
عدليلو الملح و رجعي الكل في الكسكاس باه يفور للمرة الاخيره
بعد مايفور نحيه و ديريلو كميه كبيييييره من الزبده باه يجي بنين كيما تقول الهام ماتبخلييييش ههههه
انا نسمغ بالشويه لخاطر حنا زوج عباد برك و الباقين نخبيه بلا زبده و في الغد نفورو و نسمغو
ملاحظة : البرمه ديري فيها ورقات رند او عود قرفه للنكهة