طريقتنا الرائعة في صنع معجون التشينة

[خربشة ناعمة]

السلام عليكم و رحمة الله و بركاته
بما انه البرتقال راهوا متوفر حبيت نحطلكم طريقتنا و هي رائعة والبنة روعة وجي عاقد
اولا نجيبوا التشينة نغسلوها وكي نجيوا باش نقشروها لازم نقشروها بشكل خفيف يعني لازم تبقى فيها هاديك الغلاف الابيض
و مبعد نحطوها تفور في كسكاس لمدة 20دقيقة والماء اللي فارت عليه نحتافظوا به
منبعد كي تبرد شوية نحكموا بالحبة نقسموها كل برج وحدوا عادي
منبعد نجيبوا قدرة شوية عريضة نحطوا فيها هادوك لبراج كامل و نفرغوا عليهم السكر
و نزيدوا نفرغواا عليهم هاداك الماء اللي فارت عليه التشينة مع حبة قارص مقسومة على زوج
ونديروا يطيب على نار قليلة حتى هادوك الابراج يدبالوا و الماء يعقاد ويثقال
و الشكل انتاعوا روعة مع هادوك لبراج

اما المقادير عيني هي ميزاني
تقدري ديري كيلوا برتقال يكيلوا سكر
و ادا جاك خفيف زيدي حطيلوا شوية سكر
و البنة واش نقولك روعة على خاطر التشينة مفورة و ماطابتش في الماء
على خاطر التشينة فيها الماء و لوكان تزيد طيب فالماء راهي تروح كامل في الماء
و الطريقة معتامدينها من زمان ناس سهل متيجة و البرتقال و المندرين
جربوها ماتندموش



ملاحظة
في مرحلة الطياب انتاع المعجون ما تغطيهش كامل لانه راح يفيض لك
و الطياب على نار قليلة ولمدة ساعتين

و ادا كانت نوعية البرتقال مرة وحسيت بللي المعجون كي تدوقيه بلي راهوا مر .زيدي حطيلوا السكر
حتى يرجع الدوق حلو مع بنة خفيفة انتاع حموضة