روطي الدجاج ( وصفة ماما الشهيرة )

[إلهام07]

البسملة1



مساء الخير طبايزاتي

هبلتوني على هذي الوصفة منين نحطها مع صور طياباتي تطلبوها وكتبتهالكم 77 مرة في رسائل خاصة وفي ردود بصح واقيلا ماشفتوهاش قلت نكتبها باش نهني راسي والله كرهت من المعاودة نتاعها .

توبة هاني مانسيتكش وهاهي الوصفة بالاكي ماديريهاش ضرك ماعندك حتى سبة




المقادير :

قطع دجاج حسب أفراد الأسرة( ياخي الجاجا راهو رخيس .. أبروفيتيو )
بصلة مقطعة شرائح
بطاطا حسب أفراد الأسرة
2 حبات جزر ( الجزر هنا ضروري ويعطي بنة تهبل إذا ماعندكش طبطبي على جارتك وسلفي عليها زوج حبات )
شوية زيت للتقلية ، 3 فصوص ثوم مقطعين ، أوراق رند ، فلفل أسود ، ثوم بودرة ومعدنوس فقط ماتزيدو تخربطو في الوصفة والو من عندكم بنتها في بساطتها .


الطريقة :

1- نقشر البطاطا ونقطعها دوائر وماتقطعوهاش رقيقة باش ماتتفتش قطعوها متوسطة السمك ونقليها عادي .
ملاحظة : الجزر أيضا تقطعوه دوائر وتقليوه مع البطاطا يجي يهبل بصح ماترميوهش من الاول في المقلاة كي طيب البطاطا نص طياب باش تلوحو الجزر لاخاطر يتحرق بسرعة لأنه حلو .
ملاحظة أخرى: البطاطا والجزر حمروهم في القليان باش يجيكم الطبق بنين لازم يتحمرو ( ماقلتش يتحرقو أهااااااه ماتقولوليش من بعد قريناها يتحرقو نونونونو قلت يتحمرو )

2- في الوقت اللي تقلي فيه البطاطا تكوني فحلة في الكوكوط تحطي شوية زيت وقطع الدجاج على نار متوسطة ( أنا نستعمل دائما الكانون الصغير نحب الحاجة طيب براحتها باش جي بنينة )
نقلي الدجاج بدون أي إضافات باش مايتحرقوش التوابل .

3- كي تشوفوه الجاج بدى يتحمر نضيف شرائح البصل والثوم ونبقى كل شوية نحرك باش مايتحرقش .

4- كي يتحمرو نضيف الملح والثوم بودرة والفلفل الأسود فقط ماديرو حتى توابل أخرى مفهوم ؟

5- نضيف الآن ماء ساخن ومانكثرش بزاف قيس مانغطي الدجاج هذا الطبق مايجيش فيه صوص بزاف ونزيد أوراق الرند.
ملاحظة: إذا حسيتي الجاج عندك قليل بزاف تقدري تضيفي مكعب مرق دجاج عموما الوصفة بنينة وماتحتاجش إضافة مكعب ماجي بصح إذا عادت الحالة مشومرة ....

6- نضيف أوراق الرند وسيقان نتاع معدنوس يكونو مربوطين باش نقدر ننزعهم فيما بعد ( اختياري إضافة السيقان ) نغلق الكوكوط ونحطها على نار قليلة طيب بعقلها .

7- كي يطيب نفتح الكوكوط وننزع سيقان المعدنوس ونضيف البطاطا والجزر المقليين طبعا يجيكم مستوى البطاطا قدقد مع الصوص مالازمش تنشف الصوص بزاف ( البطاطا كي تقليوها حطوها فوق ورق ماص باش مايجيش الطبق مزيت بزاف )

8- نغلق الكوكوط فقط 10د أو أقل على نار هادئة .

9- نطفي ونقدمها مع رشة بقدونس وراهو ضروري المعدنوس هنا ( إذا مالقيتيش عاودي طبطبي على جارتك خخخخ )


أحسن حاجة تتقدم مع روطي الدجاج هي السلطة الخضراء جي معاه روعة ( إذا ماعندكش ماكلاه تزيدي طبطبي على جارتك .. بزاف )

صدقوني إذا جربتوها إن شاء الله رايحين تعتمدوا الوصفة لأنو كل من ذاقها عجباتو وطلب الوصفة وراهو تسمى الطبق على اسم ماما يقولولو "الروطي نتاع ......." هههههه لاه تحوسو تعرفو اسم ماما ؟.... بركاو تقرعيج

قبل ما نخليكم مع الصور حبيت نوصيك تبعثي صحن لجارتك آآآآآآآآآآآآآو الزرودية من عندها والمعدنوس وبلاك الجاج والبطاطا ثاني بزاف كثرتي ....باش تبقى تسلفلك مرة أخرى ..سياسة













وهذا تطبيقي أنا للوصفة ( وااي أنا الأولى هههه)
نضحك برك ، طبعا تعلمتو من سنين لازم الميراث نتاع ماما واحد مانخليه يديه قبلي

هذي في عزيمة




نسيت نقوللكم باللي ماما كي يطيب الجاج تنحيه من المرق وتقطرو مليح وتعاود تحمرو في المقلاة في شوية زيت أو زبدة


هيا تصبحو على خير ....