هل انا ام غير حنونة اجيبوني

[امونة الشاوية]

السلام عليكم افيدوني اني في حيرة من امري ذهبت يوما الى زيارة ابنة عمتي فوجدت عندها جارتها فبقينا نحكيو نحكيو حتى خرجنا على الاولاد سالتني اين ينام اولادك فاخبرتها انهم ينامان وحدهما (ولد 6 سنوات و بنت2سنة)فصرخت في وجهي و قالت باني لست حنونة على اولادي و انها هي كون ما ترقدش اولادها جنبها ما تنامش فقلت اني قبل ما يكمل اولادي عام نرقدهم وحدهم و نفرشلهم مليح و نحوطلهم بالمخاد و انهض كم من مرة انا و زوجي نتفاقدهم و نخلي الضوء تاع الحمام شاعل *ومن هناك وانا نخم اذا كان هذا صحيح و اسال من ينام عند اولاده لما نجي نفرشلهم نتوسوس افيدوني بارك الله فيكم و كل واحدة تقول اين ترقد ولادها

[مريومة دودي]

صباح الورد حبيبتي انا نقولك راي هادي ماعندهاش علاقة بالحنانة بالعكس طريقتك هي الصحيحة و مادامك تامنيلهم الفراش و تتفقديهم هاديك هي الحنانة ما توسوسي ما والو هاك باش يتعودو من الصغر نتي تصيبي راحتك و هوما تاني و ربي يحفضهملك

[salima14]

السلام عليكم أختي ماتخمي ما والو جارتك كي يكبروو تعول ترقدهم وحدهم
تحصل فيهم هاكا خير يوالفو وحدهم حتى أنا ولادي واحد6سنين وزاوج3سنين
منكان في عمرهم عامنرقدهم وحدهم

[ام امجد14]

لا لا جارتك ما عندهاش الحق
انا ايصا تعرضت للهجوم من المقربين و لكن ما تاثرتش بكلامهم

عندى 3 ذكور اكبرهم عندو 12 عام و من صغر سنهم ينامو وحدهم و الان عندى بنات و رانى عملتلهم غرفة خاصة بيهم و عندما نفطم بنتىصغيرة نرقدهم وحدهم

[أم أمين2007]

لا لا اختي لاتتاثري بكلام الباس ثقي في نفسك
انت على حق فمشاركة الاطفال غرفة النوم مع ابائهم فيه مشكلة كبيرة
كما انهم لن يتعلموا الاستقلالية
امضي في طريقتك فهي الافضل

[rimora]

لا لا اختي طريقتك انت الصحيحة وهي الغالطة وكي يوالف الطفل يرقد مع الام راهو صعيب باه يرجع يرقد وحدو

ماتعبيش راسك بكلام الناس

نقولك وكون قلتيلها نرقد معايا ولادي قادرة تاني تكون ضدك هههههههههه

ديري وش يخرج عليك

[ايمان نور الجزائر]

احسن طريقة لتربية الاولاد بعد ما يفطمو
انهم يحطوهم في غرف لوحدهم
ماشي كيما شي ولاد يوليو 15 سنة وهوما راقدين مع والديهم

[بني بلعيد]

السلام عليكم
أختاه الفاضلة
واصلي ...............................، هذا هو الصح
لاتلفتي إلى غيرك
.والسلام

[دعاء القلوب]

يا ختي يعطيك الصحة والحنانة ما عندهاش علاقة بالنوم

[ام العباس]

السلام عليكم ورحمة الله
يا اختي امونة أنا وحدة نرقد اولادي معايا،ولقيت انا وأبيهم مشكل كبير، نمارس حرية ضيقةوخانقة،استطلاعات في الجوار منقلكش
تحسبا لوقوع امر محرج لنا وصادم للابناء. ونحن نعلم أن السنة في نوم الاطفال لوحدهم لكن واش تحبي الظروف وليست الحنان

[امونة الشاوية]

يعطيكم الصحة راكم هنيتوني لاني كنت مهمومة و موسوسة الله يباركلكم و يخلينا لبعضانا ننصحو بعضانا

[monitaa]

حنونة طريقتك هي الافضل طبعا هكدا مليح باه ميتولفوكش و منبعد تحصلي فيهم حتى انا كي كان عمري عام ماما رقدتني مع اختي حتى راني مولات 23سنة ههههههههههههههه و الحنانة هي طريقة التعامل و الاهتمام مش النوم

[salam algeria]

هاذي المخلوقة كون تسمع باولادي واحد ثلاثة سنين و تسع اشهر و الثاني ثمن اشهر يرقدو وحدهم واش تقول انا اصلا مازلت حاصلة مع وليدي لكبير لاني ما قدرتش نحطو وحدو حتى نهار جاء خوه
اصلا الحنانة مش رايحين يحسو بيها و هوما راقدين

[أم ياسين الزهراء]

جارتك قديمة بزاف بوه عليها انا مع نفطمهم يروحو يرقدو وحدهم عيب عليها وين الخصوصية والحنانة في الرقاد راكي مليحة كملي هكى انا بنتي الصغيرة ملي رقدتها مع خياتها ولات ترقد مليح وماتنوضش في الليل وعمرها 9 شهر كيديتها ترقد بعيد علي

[aryèm]

.......................