تفشي ظاهرة تعدد الزوجات بالجلفة

[fati_fofa]

بسم الله الرحمان الرحيم

صحا يا جماعة تعدد الزوجات في وقتنا هذا ولا ظاهرة كبيرة و ماشية ياسر بين الناس و عندها اسباب كثيرة بصح الواحد ماعادش فاهم علاه هاذ الشيء قع؟
اللي يقول ماني زاهي في حياتي و اللي يقول مرتي مجابتليش الذرية و اللي يحوس على خلفة البنات و اللي يحوس على الذكورة و اللي عشق وحدة و حاس باللي حياته كاملة عقبها تعبان مع انه كان عايش احسن عيشة و اللي عشقت في واحد قد بيها و اللي تحوس على الدراهم و اللي و اللي و اللي .....
انا اللي حابة نفهموا علاه الناس ماعادش تخمم قبل لا تضر انفسها ولا بعضهم البعض
علاه الراجل ماعادش يحس بمرته ؟ و علاه المراة ماهيش حاسة براجلها ؟ و الاهم علاه الوالدين ماهمش حاسين بولادتهم ؟و خصوصا الاباء باعتبار انهم هوما اللي يعاودوا في الزواج؟
المشكلة انه ماكانش اللي راه حاس بهاذ الاطفال و المراهقين و الشبان و الشابات اللي يتاثروا بحاجة كيما هاذي و الكل حاب يعيش حياته
هو صح ربي حلل في الشرع اربع زوجات بصح ثاني ربي قال في كتابه فيما معناه شدوا نساكم بالمعروف ولا سرحوهم باحسان ،ربي مقالش اظلموهم معاكم ، ربي ماقالش عذبوا ولادتكم و زوجاتكم
علاه مايحاولش كل راجل عنده مشكلة انه يتفاهم مع زوجته ؟علاه ما يقويش ايمانه بدل ما يلجا للحرام و مباعد يقول لازم نصحح خطئي ؟ و الاهم هاذ البنات اللي راهم طايحين على رجال متزوجين علاه مايديروش لروحهم كرامة و يحافظوا على شرفهم و دينهم و يرضاو باللي كتبهالهم ربي
ولا لازم يعفسوا على بنات جنسهم ؟ لوكان تكون هي في بلاصة الزوجة الاولى وش تحس؟ تقبلها على روحها ؟ بصح خسارة مهما قلت و هدرت في هاذ الموضوع ما يفهم فيها الواحد والو
علابالي كثرت عليكم الهدرة بصح ماذابيكم تشاركوني بآرائكم لانه هاذي صح مشكلة ستاهل الواحد يعطيها من وقته و يحاول يفهمها

و السلام عليكم و رحمة الله تعالى و بركاته