معا لمحو الامية

[كاميلا]

السلام عليكم ورحمة الله تعالى وبركاته

شفت اعلان تاع محو الامية وحبيت نشارك ف يالتدريس طلبوا 40 طالبة وماش مبينين في الاعلان تجيبهم وتلمهم ولازم بطاقة التعريف تعهم او شهادة الميلاد انا كي لميت الدوسي راهو كيف الدوسي تاع الشرطة تقريبا يا لطيف كي وصلت عندهم قالك تدفعي الدوسيي مع نسخ هويات الطالبات تسمى تعجيز انا في الاول بانتلي حاجة عادية لعجايز كي تخرج برا غير هوما في الطريق يعني ماهمش ممنوعين من الخروج في بالي رح نلم 40 ليه ليه

اتصلت باستاذتي اللي درستلي في الجامع اللي قدامنا وقتلها كيفاش ندير قاتلي ارواحي نحطوا اعلان راهم جاوني بزاف يسحقوا يمركيو حطيت الاعلان وحطيت رقم الهاتف مابان والو غير اللي تعيط على جالت ولدها حابة الدخلو للمسجد يا ناس محو الامية ماشي لوليدات الصغار حبسولي راسي

ومن بعد في صلاة الجمعة رحت قلت بلاك في الجمعة يكون صيدهم سهل والله راني في مهمتي هاديك كنت كي الصياد اللي تهدر معاها تقولك راجلي ميخلينش وحدة تقولك اللي قرا قرا بكري واحدة تقولك نخمم وحدة تقولك نشوف البروقرام سع وخاصة اللي قالولي راجلي ميخلينيش اتقوا الله نهار كامل ليل ونهار هوما برا يجروا في هادوك العربات المخصصة للسوق ويقولك منقدروش المهم قلت بلاك اسيدي لمعارف يسجلوا ولا وحدة حبت تسجل

اولا خدمة هادي ماش كاتبة والله على ما اقول شهيد رغم انهم قالو باللي تسلك بعد مرور عام الخ مكانش هامني كان هامني انه نساهم في محو الامية وزيد كون جيت حابة كون راني درت ترافيك في النسخ ودفعت الدوسي لكن ما الفائدة والو

بعدها قلت في قرارة نفسي اللي قرا واللي محبش يقرا، اللي جاه النور وقفل النافذة صراحة هبطولي معنوياتي كي لقيتهم هكدا محبوش يتعلموا يكتبوا ويقراو استخسروا في روحهم يهزوا كتاب ربي ويقراوه لا حول ولا قوة الا بالله