موراها موراها حتى جبتها مورقة الله الله

[سيرين 5]

خدمتها عدة مرات بعد ما شفت عدة مرات فيديوهات لمغربيين لكن هاذ المرة خرجت رااائعة ( راح نعاودها ان شاء الله و نصورلكم الخطوات بالتفصيل هنا ما صورتش كلش)
العجينة هي طريقتي في صنع المسمن لي معتمدتها لكن طريقة لف العجينة شفت طرق المغاربة كيما سبق و قلتلكم و النتيجة كانت راااائعة

بالنسبة للعجينة ما نكيلش لكن نقدر نمدلكم الكيل بالتقريب أنا دائما نستعمل 3 عبار سميد بعبار فرينة (الفرينة يمكن الاستغناء عليها لكن أنا دائما أضع يالوكان حفنة فرينة لتفادي الكارثة إذا ما كانت نوعية السميد ماشي مليحة أما إذا كنتم متأكدين بلي نوعية السميد مليحة فيمكن الاستغناء عنها)
و نلم العجينة بالماء و نعجنها (أنا نستعمل السميد المتوسط رغم أنه متعب على الرطب نتيجته أحسن ، على فكرة أنا عندي تجربة كبيرة في المسمن لذلك راني نمدلم في آرائي حسب خبرتي المتواضعة )

أكيد لاحظتو أنني ما حطيتش الملح ؟ ما نشيتوش بلعاني لأنو الملح يدير العلك في العجين و يصعب العجن

هنا بعد ما العجينة تتعجن و تولي بيضاء و تولي تلصق لأنو ما فيهاش الملح نحط الملح تاعي و ندخلو في العجينة مليح

بعدها نبدى نحط في الماء بالشويا و نطلق العجينة حتى تولي طرية و مطلوقة بواسطة الزيت نعمل قرصات شويا كبار على تاع المسمن و نغطيهم بالكيس نيلون و نخليها ترتاح



و نحل العجينة كيما تاع المسمن بواسطة الزيت و نرش داخلها مارغرين التوريق ذائبة (أنا استعملت لذيذ) و نرولي حتى نتحصل على حربوش طويل و نلف العجينة كيما نعملو المحنشة و نخليها ترتاح ، نكمل كل القرصات بنفس الطريقة لما نكمل بواسطة الزيت نبسط أو نطرح القرصات و نرش عليها سميد رطب و نطيبها فوق طاجين تاع الحديد أو المدلة من الجهتين





و قدميها بالصحة و الراحة