الدوناتس اللي درتهم اليوم

[نسيم الإيمان]

السلااااااام عليكم و رحمة الله و باركاته

ان شاء الله تكونو بألف خير

اليوم جربت دوناتس كنت شفتها في منتدى اخر

و الله خرج هااااااااايل بزااااااااااااف

و ماشرب حتى قطرة زيت

ماصورتش كلش خاطر ماكنتش حاطة بلي تخرج هايلة كيما هك

المقادير

بيضة وحدة

2 مغارف كبار زبدة (أنا درت مارغارين لابال)

نص كاس ماء

1 مغرف كبيرة حليب لحظة

1 مغرف كبيرة خميرة تاع الخبز

1 مغرف كبيرة تاع سكر

قرصة ملح

كاس و كاس غير ربع فرينة (كاس + 4/3 الكاس)

أنا ماكانش عندي حليب لحظة مالا بدلت (نص كاس ماء + مغرف كبيرة لحظة) ب نص كاس حليب

الطريقة

الفرينة نزيدولها الملح

و نجيبو كاسرونة ولا

و نحطو (الماء و اللحظة و الخميرة و السكر و الزبدة)

على النار بصح نقصولها

لازم نذوبو الزبدة بصح مالازمش تغلي و كي تمسي تلقايها دافية

تبدا الزبدة تذوب شوي

و نحيوها من على النار

و نكسرو بيضة عليها و نخلطو مليح

و مبعد الخليط هذا

نديروه على الفرينة لي فيها قرصة الملح و نلم

رايحة تخرجلك عجينة تلصق شوي بصح ماتقلقكش

هذي العجينة كي لميتها

تعجني شوي

وديري فرينة شوي على السطح لي رايحة تحلي فيه العجينة

ومبعد نحلو العجينة بالقنوط 1 سم

و نجيبو طابع تاع الدوناتس

ولا انا درت بكاس و بوشون

و نحطوهم في سينية و نخلوهم يخمرو ربع ساعة

بعد ماخمرو رايحين نقلوهم في الزيت بصح مش في زيت غزير

نورمال برك

و مالازمش نحمروهم بزاف باه يجيو باهيين

بصح انا حمارولي بزاف

و هذو كي خرجتهم

و هذو من داخل مش باينة مليح

بصح خفيفة بزاااااف و ماتشربش الزيت خلاص

و هذو بعد مادرتلهم السكر غلاصي

و تقدرو ديرولها غلاساج ولا شيكولا

ان شاء الله تكون عجبتكم و فهمتوني خاطر مانعرفش نفهم و نهدر بزاف

و راهي تخرج هااااااايلة هاااااااايلة

سلاااااااااااام