اللي تحب الخليع هنا الطريقة تفضلو

[أم ياسين الزهراء]

السلام عليكم

بما انو العيد قريب وراح يكون اللحم امممممممممممممممم حبيت نحطل للاخوات طريقة الخليع وخاصة للي معانا في الكوزينا شحال من مرة يسقسو على الطريقة وهي جد بسيطة المهم تتهلاو فيه وتراقبو من الدبان عدو اللدود راح اشرح بالتفصيل واللي مافهمتش تسقسي وان شاء الله نوصل الفكرة ونفيدكم ودعوة خير تكفيني ولكم بالمثل

اللحم اللي تحبوه تقدرو ديريه انا شخصيا نحب الجيقو لانو فيه الهبرات والافضل يكون فيه الشحمة

بالموس شلطي اللحم يعني قطعيه بلا ماتوصلي للاخير باش كيتنشريه مايطيحش شوفو الصورة توضح اكثر


واللي دارتاو بالعضم تعمل كيشغل راح ديزوسيه بصح تنتبهلو مليح باش الدبان مايدخلش في العضم










شوفو اللحم بعد ماتشلط كيفاش يجي باش نوضح اكثر كيتنشريه مايتقطعش




وبعدها دخلولو الملح مليح مليح في كل زاوية وكل طرف الملح هو اللي مايخليهش يدود ولا يفسد















بعد مايدخلو الملح مليح ومليح ومليح كثرو ماتخافوش حطوه في باسينة وخلوه يبات في الملح هداك الصباح تلقاو طلق الماء او بالاحرى الدم عادي نحوه من الباسينة وزيدولو الملح وكاين اللي يزيدلو فلفل احمر حار انا شخصيا مانديروش لانزوجي مايحبش الخليع الحار يقلي تروح بنتو والحار يخلطلو البنة هههههههههههه وانشرو الخليع في الهواء والشمس باش ينشف مليح


ادا شفتو الطرف اللي درتوه صغير وقاد يطيح من الحبل استعملو المساكك كيشغلو نشرط القش






وخلوه بصح عسوه مليح من عدو اللدود الذبان لانو ادا تحطت عليه ذبانة راح تولد البيض انتاعها واكيد راح يوليلكم دود يعق يييييييييييي فالافضل تنتبهولو وادا حصلتو كيما صراتلي انا وقت الذبان غطوه بصاشيات ومينداك طلو عليه وكينشف عرو عليه هنا الدبان مايدورش بيه لانو نشف


اهم حاجة ديروه في بلاصة فيها الريح راح يختصر عليكم وينشفو ثم ثم ومقابلة الشميسة


بعد اينشف مليح ويشيح وماتنساوش قلبوه على الجهة الاخرى

نحوه من الحبل وديروه في صاشي واقفلو عليه وحطوه في بلاصة مغمومة باش يغوى اي يحماض ويولي جاهز للاستعمال واللي يخليه يغوى هي الشحمة عليها قلتلكم ديروه بطرف فيه الشحمة


هدي وصفة لبربوشة كنت درتها موضوع تستعملو فيها الخليع

https://www.djelfa.info/vb/showthread.php?t=1465115


ان شاء الله شرحت مليح سينو مانعاودش هههههههههههههه نتمسخر برك


راح اكون سعيدة بردودكم


وبارك الله فيكم


ملاحظة مهمة جدا


فكرتني اختي العزيزة ام محمد الله يسلكها على خير في حاجة مهمة وهي كتجي طيبيه حطيه في ماء سخون وخليه مدة باش الملح يتنحى ولا غليه غلية وحدة وارمي الماء وباش نكون صادقة انا مانغليهش نحطو برك حوالي ساعة ولا زوج في الماء السخون وحداري لجماعة لاطونسيو كيما حالتي ههههههههههههه واهم حاجة ماتملحوش الماكلى حتى تدوقو

شكرا حبيباتي


المدة باش يشيح مانقدرش نقوللكم المهم تلقاه نشف ويبس مليح مليح


هدي فكرة اختي العزيزة ليزا

بنااات كنت في موضووع ام يااسوو تااع الدباان قصدي تااع الخلييع هههه ،، و تفكرت حااجة نقولهاالكم ،، انا ولييت مؤخراا نديير قطراات من الزييت العااديي على اللحم قبل ما نملحه و نحكه بيدياا ملييح ،، الدباان ما يقربهش إطلاااااقااااا هدي قاالتهاالي أختى ربي يخليهاالي و من تما ما نستغنااااعلى هااد الحييلة راهي فعاااالة و نغطييه على جاال الغبرة فقط ،، اما البااقي فنفس طرييقة المسراارة ربي يحفظهاا

[فايزة1207]

يعطيك الصحة على الموضوع اختي يجي بالبربوشة ودشيشة فريك والعيش لديد جدا لا يقاوم
ممكن ايضا ديري ماء ماتكثريشوملح في اناء وخليه يبات فيه والصباح زيدي شوية ملح وانشريه

[nihal159]

السلام عليكم و رحمة الله وبركاته
يعطيك الصحة أختي؛ لكن شحال لازمو وقت باش يشيح مليح

[ام عبدو و ملاك]

يعطيك الصحة ام ياسين انا نموت عليه بصح جامي درتو خالتي هي تديرو و ديما تبعثلي شوي ندير بيع العيش يهبل يعطيك الصحة و الله شهيتيني فيه

[أم محمد تاج]

رووووووعة ام ياسووووو رووووووووووعة الله يعطيك الصحة ويحفظلك كل عزيز وغالي
وأكيد هذوك الهبرات راح ديريلي بيهم عيييييش كي ننفس ههههههههههههه
تسلمي حنوووونة ولك احلى تقييم مني

[سرور2]

بارك الله فيك عندي وقت نحوس على الطريقة ان شاء الله هذا العيدنجربو بحاجة قليلةواذا صلح نعود ندرهاطول

[lyzzabel]

يعطييك الف عاافية حبيبتي المسراارة نفس طرييقتناا و مؤخراا ولييت نديير فييه قطراات من الزييت العاادي ،، ما يقربهش الدباان إطلااااااقااااا والله تهنيييت منه و حتى حنا ما نديرووله حتى تواابل من غيير الملح لأن بنته فييييييه مممممممممم ،، شرحك واااافييي و كااافي يا العزييزة و أحلى تقيييم لعيووونك

[fadila34]

برك الله فيك ام ياسين نفس الطريقة تاعي تماما ربي يخليك
ويجي ايضا بيه كسكاس شيوشو وكين لقول المقفول كل واحد واش يسميه

[ام سارة18]

شكرا لكي لقيت الجواب في الشرح ممممم مع العيش والبرد هدا واش يصلح

[ام خالد اسلام]

يعطيك الصحة ام ياسو

[أم ياسين الزهراء]

بارك الله فيكم على الزيارة والرد الجميل وان شاء الله اللي راح تجربو يصلحلها

ليزا الحلو اول مرة نسنع بطريقة الزيت شكرا على الفكرة وان شاء الله نجربها في لحم العيد وراح اضيفها في الموضوع اختي شكرا

[ام سهام 02]

بصراحة احنا ما نديروش القديد او الخليع شفتووتعلمتو غير هنا في المنتدى انجربو بطريقتك في هذا العيد واذا عجب عايلتي راح نعتمد عليها شككككككككككككككككككرا بارك الله فيك يا احلى اخت مسرارة وفحلة

[ام احمدي]

يعطاك الصحة كفيتي وفيتي حنونة ميرسييييييييييييييييييي

[أم فاطيمة]

بارك الله فيك ام ياسو نفس طريقتي امممممممممممممممم نموت عليه في البركوكس

[ام ساجد]

يعطيك الصحة ام ياسو والهبرات يهبلو يمي يمي
نموت على اللحم ههههههه
قوليلي ام ياسو منين نخيو اللحمات من لجناب ولا الرجل التلانية
بقدرة ربي نديرو كانت تعملو ما ما ربييشفيها