رجاء

ام ايمان1 · 2012-10-03, 12:57

السلام عليكم ورحمة الله اريد منكم الطريقة الصحيحة لصنع الشاي وخاصة تاع الصحراء

ryma la cool · 2012-10-03, 13:19

nshalahh lebnett yfidoukkk

liliane24 · 2012-10-03, 13:42

تاي اخضر ذات نوعية جيدة 2 كسان من كاس التاي. نفس الكاس بي 10 ماء . كمية من النعناع الاخضر . وكمية من النعناع اليابس . و السكر حسب ذوق كل عائلة.
طريقة التحضير.
نحط الماء على النار حتى يغلي. ثم نحيه و نحط فيه كمية النعنتع اليايبس. و زريعة التاي. ونخليه لمدة 10 دقائق. ثم نبدى نخلط فيه حوالي 15 مرة لانو كلما نزيد نخلط كلمل يزيد يثقال. ثم نصفيه بالصفاية تع التاي. ثم ندير كمية من السكر العادي حسب ذوق كل عائلة و نبداء نخلط من كسرونة الى كسرونة اخرة حوالي 15 مرة حتى يذوب السكر بالاضافة تولاحضون الرغاوي البيضة في التاي ايي لكشكوش تع التاي. ثم نزيد ندير كمية من النعناع الاخضر في كسرونة و نخلط التاي من كسرونة الى اخرة لمدة حوالي 10 دقائق حتى التاي تعود فيه رائحة النعناع الاخضر و الطعم كذالك .

ام ملاك. · 2012-10-03, 17:08

تجيبي قيس لتر ماء و2 مغارف كبار لاتاي ونعناع يابس قيس 5 مغارف كبار ولا زوج كمشات بيدك
تغلي الما ء وكي يغلي اغسلي لاتاي والنعناع وارميهم داخل الماء وخليه يغلي بلعقل نقصي عليه النار وخليه قريب 20 دقيقة يغلي بلعقل وديري السكر معاهم قيس 3 او 4 مغارف سكر (كيما تحبي ) وخليه يغلي مليح قد مايغلي يطلق لاتاي ويولي ثقيل
وفي الابريق نتاعو حطي نعناع يابس ولا عادي بعد ماتغسليه حطيه داخل الابريق وكي يطيب خلاص لاتاي فرغيه داخل الابريق وخليه ييرد شوية واذا تحبيه سخون نورمال وكي تجي تفرغيه في الكاس فرغي بشوية وابداي طلعي في الابريق بلعقل للفوق حتان تولي عندك رغوة
كي تجربيه قوليلي
انا هكذا نديرو(بابا صحراوي) دار اللي تزوجت عندهم قبايل قع يحبوه ويشكروني

ام ايمان1 · 2012-10-03, 19:11

شكرا اخواتي وجزاكم الله كل خير زيدو اعطوني نوع الشاي اللي تستعملوه وشكرا

ام ملاك. · 2012-10-04, 08:41

انا ندير الشاي والله نسيت اسمو بصح بواط نتاعو تجي خضرة ومكعبة الشكل بالاك نتاع الجمل تلقاي مكتوب بالشينوية
وكاين واح ثاني وسمو الراقي بواطتو تجي قهوية بالذهبي
على حساب مانعرف قع ملاح ورخاس في السومة وشنو ماتديريش لاتاي لحمر ديري وين تلقاي شاي اخضر صيني
وان شالله يجيك مليح

ام ايمان1 · 2012-10-04, 09:56

ربي يسترك ويهنيك

ام ظافر · 2012-10-04, 11:13

نعطيك طريقة ولاية النعامة الصحراوية وتايهم لايعلى عليه
طريقة بسيطة جدا
لازمك نوعية التاي تكون جيدة ويكون مبروم مليح
حطي الماء يغلي في اناء من جهة
وحطي التاي في ابريق من جهة اخرى واغسليه بشوي ماء وخليه
لما يغلي الماء صبيه على التاي ومن بعدها حطي الابريق فوق نار ذليلة جدا حتى يتجمر فقط يعني يفيض وكانو راح يسيح على برى
وضروري في مرحلة التجمار هذه يكون ماء وتاي فقط
من بعدها ضيفيلو نعناع اخضر مغسول وقطع من السكر وابداي خلطي في اناء او ابريق اخر الى ان يذوب السكر تماما وبالهناء والشفاء
كنت زمان نستعمل طريقة اني نغلي التاي ولكن صدقيني لما تزوجت ورحت للنعامة شفت بان طريقتهم صحية وساهلة وما تاخذش وقت كبير كل ما في الامر نغلي الماء ونصبو على التاي ومن بعدها نحطو يسخن شوي وننزعو من فوق النار ونزيدلو بعدها النعناع والسكر المحجر
والسر هنا في السكر المحجر لدرجة انهم يصنعو سكر خاص بالتاي ويكون خفيف جدا مع التاي عكس السكر العادي
والسكر المحجر يصنعوه برش السكر بالماء قليلا جدا ثم وضعه في قوالب خاصة وتعريضه للهواء يوم كامل ينشف ويخبأ للمناسبات او يشريو نوع المهراس تاع زمان الي تديه العروسة معاها وهذه صورتو يقطعوه اجزاء ويستعملوه

ام ايمان1 · 2012-10-04, 21:21

يعطيك الصحة اختي ام ظافرويخليلك وليداتك مافهمتش مرحلة التجمار يعني نطفي النار مجرديغلي التاي او نخليه يغلي مدة طويلة ثم نطفي النار

ام ظافر · 2012-10-07, 17:18

لا اختي تجمري التاي يعني تخليه فوق نار هادئة جدا لمدة قصيرة حتى تشوفي بلي التاي طلع قريب يسيح من الابريق طفي النار وما تنسايس انو الماء المستعمل كان يغلي يعني مدة قصيرة فقط راح يتجمر ولكن قبل ماتزيديلو السكر لانو كيما يقولو هنا راح يتحرق التاي

ام ايمان1 · 2012-10-07, 19:21

شكرا اختي وربي يجازيك