موقف صعب

مشكلتي · 2012-09-06, 18:24

السلام عليكم و رحمة الله تعالى و بركاته راني في مشكلة عويصة و الله مالقيت كيفاه ندير
تعرفت على شاب في الجامعة و عرفتو مدة خمس سنوات و درك جاء و خطبني و الحمد الله و المشكل راهو في أمو لي ماهيش حابة هاد زواجا من قبل كي عرفت بلي راني في حياتو دارت حالة و تقابضت معاه و قاتلو غير هادي لي ماتديهاش و تبعثلي لي ميساج تقولي و الله ماني جايباتك مع العلم انو هو في ولاية و انا في ولاية يعني متعرفنيش و حكمت عليا و مابغاتنيش و هو كيعاد متمسك بيا حاول مع امو و تقابض معاها و حكا معاها يعني دار الوسائل كامل باه يقنعها بيا و هي كانت السبا نتاعها راهي بعيدة عليك...واش من بعد حكاية ساعة ..ساعة و نص إذا كثرت. زعما قنعها و جات باه تخطب و جات مشنفا حتى فاقت بيها ماما و قاتلها نتي جاية على أساس تخطبي وحدة تديها كي بنتك و تحترمك و تحترميها و لا جايا على جال ولدك قاتلها على جال ولدي مام كي دخلت ماشافتش فيا مليح المهم بلعتها هادا كامل على جالو كيعا و الله يستاهل و يستاهل كل خير و كيعاد حارب على جالي و زيد يحبني و متربي و مرتاحة معاه هنا كانو الرجال يحكيو سقسا بابا خطيبي قالو قاداه في عمرك؟قالو خطيبي العمر تاعو مع العلم انا اكبر عليه ب5أشهر و هو علابالو و راضي و قانع نورمال كي خرجو روحو.. دارنا معجبهمش الحال كيفاه جاية ماماه مشنفا و ماهيش حابة المهم دارولي حالة و هو كي روح عرف باباه بلي راني كبيرة عليه قالو لا حطيت رجلي في دارهم و تقابض مع دارهم و خرج و درك راني في حصلة أنا دارنا لوكان نحاول معاهم قادر يقبلو و خايفة لوكان يقبلو هوما مايحبوش يجيو و أنا دارنا راني نهرب منهم مانيش حابة نقابلهم باه مايقولوليش واش قررتي؟ و دارنا معلبلهمش بالمشكل تاع خطيبي تاع العمر و نسيت ماقوتلكمش ماماه راهي علابالها و قالت نورمال مع اللول و درك ولات ماعجبهاش قولولي كيفاه ندير و كيفاه يدير خطيبي و الله رانا في حالة و راني صليت صلاة الإستخارة... و إذا سقساوني دارنا واش رايكم واش نقولهم؟؟؟؟؟؟؟

سميحة.لد · 2012-09-06, 21:25

جارتنا صرالها نفس الموقف هي تمسكت بيه وهو تمسك بيها لاخر لحظه والحمد لله هادي ليام العرس .بصح مرت عليها مشاكل غير ربي الي يعلم بيها من تحت راس امو . ...استخيري الله وتكلمي مع داركم وحاوريهم في الموضوع ..راهم هوما تاني معذورين كي يخافو ويتقلقو .. وشوفي معاه تاني ..وربي يجيب الي فيه الخير

abdel02 · 2012-09-06, 21:41

من ألأاحسن أنه يوفرلك سكن مستقل من أول وهلة...ماعدا ذلك فالراجل نتحيلو بصح يماه صعيب الحال معاها.
الله يسمعنا عليكم الخير.

داعي الله ياسين · 2012-09-06, 22:45

إدا مكانش مفاهمة بين العائلات من اليوم غير خليكم
ياختي لهناء والراحة هو سِر السعادة الزوجية
ولو سكنتوا و وحدكم .. العائلتين ماش متفاهمات " واش من حياة "
ياختي غير شوفي معاه إدا راح تكون مشاكل مستقبلية ..غير ضحّوا مع بعض
ونساوا كوووولشيء ((في هاد الموضوع استعمال العقل وليس العاطفة))

والزواج بلا رضا الوالدين ((سواء والديك أو والديه )) راني انشوف متروحوش بعيد

فكروا مليح قبل متتصرفوا

رب ايفرج

AMINA.Z · 2012-09-06, 23:43

و الله يا اختي المشكل تاعك يشبه لتاع وحدة فاميلتي
زوجو و امو و باباه ما ش قابلين بيها
و وحدها بدارها بالصح
امو حطتها في راسها حتى طلقها قبل ما تزيد
و درك السيد عاود الزواج و هي مسكينة راهي بطفلة محطمة ما عندي ما نقولك
والديها و والديك ما كانوش راضيين و هادي كانت النتيجة
الطفل جنتو راهي في والديه المراة ما تنفعوش خلاص يطول و لا يقصر راح يرجع لوالديه
غير اخطيك يا اختي
نصحتني هاديك الطفلة و قاتلي الحب ما هوش كلش
الزواج قبل ما يكون بين راجل و امراة راهو يكون بين عايلتين ما هوش لعبة
و راح ربي يعوضك غير ان شاء الله

YARMORACEN · 2012-09-06, 23:54

ما عندي ما نقولك سوى راكي طحتي في راجل ، لزمك تشدي فيه مزيان لخطر راه يحبك ، ماشي دايما قصص الحب تنهي بهاد الإخلاص .

lilou f lilou a · 2012-09-07, 08:55

ربي يفرج عليك اختي
ودامك تحلبيه ويحبك ربي يدير فيها خير

الدكتور سام · 2012-09-07, 10:17

انا راني نخمم كيفاش رايحة تعيشى مع يماه.انا متاكد تنوض الحرب من تاني يوم زواج.لدى انصحك انك تخممي مليح
و رب يجيب الخير

~~مريم تعود~~ · 2012-09-07, 11:15

السلام عليكم اختي
راني نشوف هو متمسك بيك وعلى جالك دار امور بزاف إنت ثاني ديري حاجة على جالو وتمسكي بيه وكل زواج قبلو مشاكل وفيما يخص مسألة السن عندنا عباد معقدين هوما كيما الرسول الكريم تزوج بالسيدة خديجة وشعال كبيرة عليه لكن مجتمعنا مجتمع متخلف
المهم اختي إنت قولي لداركم على قبولك وما راهش لازم تحكيلهم على مشاكل خطيبك مع اهلو خلي شويا خصوصية وشدي اسرارو هذا راح يكون زوجك انا من رأي اوقفي معاه لأانو متمسك بيه ووالدتو تربحيهل بالملاحة من بعد وتعرف باللي غلطت في حقك وما تلوميهاش هذي ام وتحب كل خير لوليدها والله مانت صديقتي كيفك ومن بعد رجعو اهل زوجها يحبوها لأانها عرفت تكسبهم موفقة ربي يهنيك

~~أسـماء~~ · 2012-09-07, 11:16

سبحان الله فعلا قالوها راحت الرجولة كيفاه يحارب امو على جالت فتاة ؟؟ لي خلقها خلق غيرها

~~أسـماء~~ · 2012-09-07, 11:17

ياختي كي تعودد ماتحملش بعضاهم قبل الخطوبة ونتي كبيرة عليه كيفاه راه تحملك يماه وراء العرس خصوصا اذا تسكنو معاها

بسمة العمر · 2012-09-07, 11:23

لازم هو يهدر مع اهلو........ماهيش سبه انها ترفض بدون سبب و العمر ماهوش مشكل....حاولي تعرفي عقلية امو ..ادا ماكانتش واعرة شوفي كيفاش توصلي ليها و تهدري معاها

fatix · 2012-09-07, 11:42

يا اختي غير اخطيك واحد مادارش الخير في يماه مش رايح ايدير فيك الخير نزيدلك بديتيها بالمعصية مش رايحة تتهناي نعاه يجي نهار و يدور عليك نهار يجيب اولاد و يحس واش كانت تحس يماه

سجل أنا جزائري · 2012-09-07, 11:42

نتي مش لولة و مش لخرة اللي يصرلهم هكذا

هذي نتيجة تدخلو في علاقات طويلة الأمد و محرمة و ما تفكروش لعاقبة الأمور و مبعد كي يلحق وقت صح تلقاو روحكم مش متفقين كامل لا نتوما لا عائلتكم , و تولي تتحتمي يا تخسرو والديكم و تكمولو مع بعض و في هذي الحالة راح تواجهي كثير من المشاكل و ديري مليح في راسك الراجل مش راح يبقى دايما يحارب والديه على جالك

يا تحبسو و هنا تلقاي روحك خسرتي قلبك و سمعتك و و 5 سنين من حياتك !!

علابالي مش راح يعجبك هدرتي مي حبيت برك االي تقرى قصتك تفكر مليح مليح قبل ما دير علاقة مع شاب

الحب مش كلش في الزواج

*عاشقة الجنة* · 2012-09-07, 12:00

اختي ما لقيت وش نقولك غير ندعيلك بهاد الدعاء في متل هدا اليوم المبارك

والساعة المباركة

اللهم اني أسألك بكل اسم سميت به نفسك او أنزلته في كتابك العزيز ان تنير درب اختنا

وتيسر امورها وترزقها ما تحب وتحفظها من كل مكروه وشر يا رب يا رحمن يا رحيم

يا مجيب الدعوات