محتاجة كلمة

مشكلتي · 2012-08-25, 13:31

السلام عليكم ورحمة الله تعالى وبركاته
ربي يحفظكم كيما راكم تنصونا وتوقفو معانا يكفيني برك كي نجي هنا نفرغ قلبي صافي بليزير والله, ربي يحفظكم
نحب نشكر كل المشرفين وكل الاعضاء والمتواجدين
نبدا نطرح مشكلتي ماذابيا تنصحوني وتدعيولي
صح الدنيا هاذي فترة نعيشوها وتنقضي وهي عند ربي سبحانو مجرد دقائق معدودة خالصين خالصين , والدنيا هاذي كيما فيها المليح فيها القبيح وياسعدو اللي فعل الخير يلقاه يلقاه عند ربي سبحانو , راني مقلقة شوية وتعبانة باسكو العام هذا مديتش الباك وخذلت والديا بزاف رغم انو كانت نافحتلي القراية بصح غمضت عينيا فتحتهم لقيت روحي نبكي مديتش الباك كي نتفكر نحب نفقد الذاكرة خير ............
كنت فتاة طموحة بزاااااااااااااااااااااف ونخمم في المستقبل بصح ذوكا والو راني نحب غير ننسا مات الطموح ومات التفاءل صح نامن بالقضاء والقدر وصح عمبالي بللي ربي مع الصابرين وقد ماتعطي للدنيا تعطيك وعمبالي بللي كل واحد يدي وش يستاهل وعلى هذا الشي راني حابة منستسلمش ونكمل قرايتي خير لانو الواد حتم عليا نكمل نقرا ومن واجبي نرضيه المشكل فيا انا كرهت القراية والله كرهت تعبت عييت تاع الصح وحابة نسجل باك حرة وندخل في كاش معهد نتعلم خياطة. عييت نفهم روحي باسكو عقلي راهو حابس قتلو التخمام
اللي مرت عليه المرحلة هاذي ينصحني ربي يعيشكم رانا قريب نسجلو وانا كل يوم نتعب كثر من اليوم اللي قبلو
شكرا

- بصمة خير - · 2012-08-25, 18:57

أختي

اذا لا يوجد لديك مشكل اتصلي معي على الخاص

و ان شاء الله خير

ربي يوفق

الواثق · 2012-08-25, 20:02

السلام عليكم ..................من كلامك واضح انك بنت واعية وعاقلة ورزينة ...........اما الباك فليس كل من فاز بالباك قد كتب الخير له ...........فالكثير من كان الباك سببا لولوجهم عالم اخر افسدهم وافسد فطرتهم خاصة البنات وانت ماشاء الله تعلمت ومستواك مقبول جدا فحاولي تطوير نفسك ..........اهتمي بالدين والمطالعة فهو العلم الشرعي الواجب ...........كرسي وقتا لحفظ كتاب الله وانظمي لاحد المدارس القرانية ان وجدت ................تستطيعن الدخول للتكوين ففيه حرف ومهن ماشاء الله وجميلة بل هي تعتبر خاصية اذا تعلمتها المرأة ....................تقدري تسجلي الباك حرة فالعام طويل

خلاصة القول الصحة والعافية والعقل هوم الاساس ولم يضع شيء ابدا بل مازلت في الطريق بل في بدايته

وفقكم الله

imi02i · 2012-08-25, 20:38

السلام عليكم ورحمـة الله
والله يا أختي وكأنك تحكي على لسانـي
أنا أيضا بعدما كنت فتاة طموحـة وهمي الوحيد هو دراستي ، بل كنت أتحصل على معدلات ممتازة وأرى نفسي طبيبة المستقبل
إنقلب حالي رأسا على عقب وماعدت أفكـر في شيء إسمه الدراسـة
إجتزت البكالوريا ولم أنجح ، طبعا لأني لم أدرس
كل عائلتي وأهلى وجيراني وأقاربي منصدمون أشد الصدمـة لهذا القرار الذي اتخدته في ذات نفسي
ومهما حاول أهلي وخاصة والداي وأخي ليعرفو سبب هذا الأمـر إلا أنهم لاحياة لمن ينادون
أنا راضيـة على مستواي ويكفيني حاليا شهادة البكالوريا
وأنا أسعى لكي أتفقـه في الدين وأقيمـه على أساس صحيح، وهذا لا يمنعني من أن أفكـر في أن أتعلم أمور كالطبخ والخياطـة وغيرها من الأمور التي تهم المرأة في حياتها ...
صح لقيت مضايقات بزاف وراح نلقاها ثاني مع بدايـة العام
إلا أنو ندير الحاجـة اللي ترضيني برك وانت ثاني، شوفي الحاجة اللي ترضيك وتنحي على خاطرك
متكرهيش عمرك،
وباش ترضي والدك تسجلي باك حرة
إذا نفحتلك أقراي وإذا منفحتلكش مكاش اللي راح يحط الموس على رقبتك ويقلك أقراي
,انا إذا قدر ربي ونفحتلي نعاود نقرا ثاني ، مكانش اللي راح يلومني أيـضا

aissa2008 · 2012-08-25, 21:34

السلام عليكم

اختي تسجلي وكملي قرايتك عادي تغمضي عين وتحلي عين تلقاي روحك ان شاء الله جبتي الباك

انا عندي اختي صرالها كما انت عاودت الباك غاضها الحال لكن العام لي موراه جابتوا بمعدل 10 عادي كملت قرايتها في الجامعة وكانت هي الاولي في الدفعة راحت قرات في الخارج و ضك راهي استاذة جامعية وتحضر للدكتوراة

المهم الطموح ثم الطموح اتكلي على ربي راه ما يخيبكش ان شاء الله

بالتوفيق

وهاب 76 · 2012-08-25, 22:19

علاش حنا العرب نقطعوا لياس بالخف؟....علاش نبغوا ننجحوا من أول تجربة؟....

عندما سئل توماس اديسون عن فشله المتكرر لإختراع المصباح ." لماذا تكرر المحاولة وقد فشلت في الكثير منها " قال لهم :

" أنا لم أفشل بل وجدت وعلمت أن العديد من الطرق لا تنجح " وواصل تجاربه حتى نجح.

أنت أيضا لم تفشلي و إنما إكتشفت وتعلمت أن الطريقة التي كنت تراجعين بها وتدرسين بها فاشلة

إذا غيري طريقتك في الدراسة والمراجعة و إن شاء الله يكون النجاح حليفك

وعلاش نمشوا لإديسون نعرف وحدين بزاف كما نت ما نجحوش في الباك وانقطعوا عن الدراسة سنوات ومن بعد فوتو الباك

كأحرار ونجحوا

بالتوفيق

nasser26 · 2012-08-25, 22:24

أختي هذا شعور ما بعد الصدمة انا تاني صراتلي مي كي بديت القراية مع بداية العام نسيت كلشي والحمدد

ibta · 2012-08-25, 22:33

fبنيتي الطريقة اللي استعملتيها ادت الى الفشل هدا ماكان يعني مزال الوقت امامك وعدم نجاحك لا يعني انك فاشلة ابدا الخير فيما اختار الله بنتي صلي ودعي المولى عز و جل ان شاء الله تكونين من المتفوقات هذه السنة بالتوفيق لك عزيزتي

عبد الناصر 17 · 2012-08-25, 22:54

السلام عليكم ورحمة الله وبركاته
ربي يوفقك اختي في مايرضي الله عز وجل ننصحك اختي بحكم اني معاود الباك مرتين والثالثة جبتو والحمد لله ادا قدرت تتسجلي في ufc وحضري للباك من تم وقراية ufc ماشي وحدها لي تكفيك لازم معها قراية الدار وربي يوفقك ان شاء الله ويوفق جميع المسلمين اينما كانو

سميحة.لد · 2012-08-25, 23:07

السلام عليكي ورحمة الله وبركاته ******
ماشاء الله الردود التي قدمت لحد الآن من الاخ الواثق و ووهاب وايمي ..........كلها ردود في القمه من اخوه واخوات يقدرون ماتمرين بهي ...أما عن ردي اود ان لا تكرري خطئي..
لما ماجبتش الباك لاني كنت مهمله زعفو الدار وبالاخص الوالدين ...عاودتو وجبتو غير علاجالهم بصح بمعدل نتاع دز برك ... وسجلت في تخصص غير هكذاك المهم راني نقرا في الجامعه ... هادي اكبر غلطه . من بعد لقيت روحي لازم نعاود ونختار التخصص الي يحققلي اهدافي ويناسبني . اختي .حددي هدفك اذا كان راح تكملي تقراي اصري على انو يكون بمعدل يفرح طول الحياة ان شاء الله ...وان كان على جانب تعلم الطبخ والخياطه ..صراحة عندك الوقت في الصيف واوقات الفراغ كيما متخليهمش هوما الاولويه اذا شايفا عندك قدرات ربي يباركلك في وقتك ووالديك ... واذا احتجتي لمساعده صدقا ستجدين الكثير يمدونها لكي

rayan mimi · 2012-08-25, 23:10

هدا اسموا المراهقة المتاخرة يعني هدا وين راكي اتعيشي فالمراهقة انتاعك ولازم تغلبيها

soso sirin · 2012-08-25, 23:14

شوفي اختي انا نهار ماجبتش الباك في عامي حسيت واش راكي تحسي لانو العام الجديد راهي قرب هذا مكان على هكا راكي حاسة روحك مخلطة و المورال تاعك هابط غدوة ان شاء الله كي يفوت عليك شهر سبتمبر و اكتوبر راح تولي مليحة و تلهاي في القرايا كملي قرايتك يا لالة و هذا العام ان شاء الله يفوت يجري و تفرحي و تفرحي والديك

~~نهال~~ · 2012-08-26, 12:28

ختي مش كيعاد مادياتيهش يعني راح تياسي حاولي لازم طيحي في حاجة تعطلك كل واحد و حسب المشكل اللي حصلو قرايتك ماطفرتيش فيها نصيحة مني لك

انجحي اطلعي تقراي و يكون diplome في جيبك

lilou f lilou a · 2012-08-26, 13:00

لا يا اختي ربي حنين كريم

محمد جديدي التبسي · 2012-08-26, 13:00

انظري إلى نعم الله عليك وأدّي شكرها وانظري للحياة بإيجابية وتفائلي وربي يوفقك لكل خير