ياناس سلفتي رايحا تهبلني

امينة مناد · 2012-07-24, 01:44

صحا فطوركم
اقراو مليح ومن بعد احكموا اعليا ونشالله نلقا الحل عندكم
انا نسكن مع سلفتي في الطابق الثاني وعجوزتي في الاول .........انا عندي زوج ابيوت وكوزينا وسلفتي بيت وكوزينا راهي امهبلتني متحبش تخدم دالتها تع الميناش خاصتا الددروج حالفا اعليهم غير انا الي نخدمهم وهيا مدير والو مينداك تمسح الكولوار برك بصح انا مفهمتش كيفاه ااندير منقدرش انقوللها نوضي وخدمي ماشي انخاف منها وانما مرانيش حابا لقدر ايطيح ونداوس امعاها
مينداك منحبشس انسيق ونستناها ادير دالتها ومن بعد كي نشوفها حابسا ونشوف ادنيا ادودت انوض ونخمل كع الحالا
اما اعجوزتي هيا متحبش ادخل روحا الا في حالا وحدا ادا سلفتي مكانتش في ادار وانا مخملتش الحالا يعني الدروج اتنوض وتقولي وعلاه الدنيا هكا .............واش اتفسروا هادا
الله يستركم اعطوني الحل
وقولولي الله يستركم كي راني نخدم في دالتها اسكوا راهم دايريني جايحا ولا وشنوا خاصتا ان عجوزتي اجي وتقولي اخدمي هادي وديري هادي ومسحي امليح وهيا ماتقوللها والوا ....واش راهم دايريني

sarl02 · 2012-07-24, 01:49

ها كبري قلبك واربحيهم بالنية حتى يفتح ربي وشتا اديري.

ريم رنيا · 2012-07-24, 08:37

اخدمى الخير تجدى الخير إن شاء الله وربى ميضيعش اجرك

faty05 · 2012-07-24, 08:54

شوفي كيما تقول يما ربي يحفظها
الدروج حبيتي اديريهم ديريهم راهي دارك اذا راكي حابة تشوفيها نظيفة ما حبيتيش خليهم راهي دارك اذا راكي حابتها تدوود
بصح يا اختي ما تهدري معاها لا والو
ربي يقدر الخير

evaevalle · 2012-07-24, 09:39

الحل ساهل جدا كي تكون دالتك اخدمي خاطياتك خليهم من بعد ابن كل شيء
حاجة وحدة إذا هدرتي تقلقي و كل الناس معاك تتهول و زوجا ايضا
و إذا سكتي تقلقي انت برك و الناس الباقي لا ركزي على زوجك
شوفي في اي دار مشاكل انتاع الخدمة موجودة ادعي في رمضان ربي افرج علينا اكل
خلي قلبك بيض ترتاحي

**نعم أطيعك ياربي** · 2012-07-24, 14:00

حبيبتي كاين مشاكل اكبر من هادي لدا حبيبتي الله يكون في عونك ونقولك اخدمي ما تبخلس لا البالي ولا النشاف رايحين يلسقو في يدك دقيقة ونتي مكملة وخلاص ونحيها من بالك
وربي يفرج عليك والديري الدار

عاشق تراب بلادي · 2012-07-24, 14:40

يا اختي هاد المشاكل موجودة في كل بيت
شوفي نتي كبري قلبك و وسعي خاطرك و مديريش عليهم و في الاخير راح تكسبيهم كلهم اولهم زوجك و عجوزتك هادي راي في عوض يماك و دعوتها تشوى الدنيا و مافيها
و نقولك بلي هادي ماشي جياحة بلعكس نتي راكي ديري فيهم خير و ربي يعوضك عليه متنسيش بلي راكي تنظفي الدار و النظافة من الايمان
شوفي ختي ديري بلي سلفتك قاع مراهيش كاينة و قضي كي شغل راكي في دارك و صبري يجي نهار لي ديري دارك وحدك
و حاولي تقربي من سلفتك و ديرها كي ختك و تشوفي كيفاش راح تعاونك بلا متقوليلها
اما عجوزتك راهي كيما يماك لي تقولك عليه قوليلها واه و خلاص
نصيحة من ختك طبقيها و تشوفي كيفاش يروح عليك التقلاق

جسر الأمل · 2012-07-24, 22:33

شوفي اختي انت ديري تورتك ونقي نورمال
وهي الله يسهل عليها ماديريش تورتها باش ماتتكلش عليك وتقيس عليك كل شي
وربي يحفظك ويسترك هدو هوما عربنا المغشاشين ربي يهدينا

مريم الصابرة · 2012-07-24, 23:00

السلام عليكم اختي فالحقيقة والله الحل عندك ما تتقلقي ما والو ديريها ماكانش واخدمي إنت واش راحا دري معليش خليك خير منها كان هي معفونة راحا تكوني كيما هي سور لالا وإنت في كل هذا رضي زوجك وبعدها امو يا اختي لقطي دعاوي الخير وخليك منها
ما تعريش راسك كامل واخدمي لدار راهي دارك ديريها دائما في بالك شكرا وبارك الله فيك

ام نسمة · 2012-07-25, 11:11

مرحبا اختي شوفي احنا في كلامنا انقولو الدراع الوافي ما يحافي خليها في حالها بلاك تحشم على روحها بلاك زوجها يلاحظ انو كامل الشغل عليك ويكلمها تسقم روحها وزيد حتى وان ما بينولكش تاكدي انهم يحبوك اكثر منها ويحترموك اكثر منها لانك عاقلة ورزينة وصبارة حتى هي تاكدي انو ضميرها يكون ماشي مرتاح بلاك مسكينة جايحة وما كبرتش على الخدمة بزاف في الدار وزيد شحالها عندكم عروسة ماعليش يجي النهار وين تفهم روحها وتحشم وتنوض لدالتها غير اصبري عليها شوية وجامي تخلي الدار مدودة على جال هي ماناظتش ادا كنت الكنة الاولى يعني اقدم منها تاكدي يدخل اي واحد للدار يلقاها مدودة يحط اللوم فيك انتيا ماشي هي ادن تحلي بروح رياضية وحاولي تتقربي منها كما قال الاخ عاشق تراب بلادي وشوفي النتيجة ومافيها والو علميها تدير الشغل غير بالحنانة والمسايسة واجرك عند ربي كبير ماشي عند العباد وصح رمضانك انت وسلفتك

عذراء الجبل18 · 2012-07-25, 13:01

انتي حسبي روحك راكي تخدمي في دارك , وكبري بالك برك
ربي يفرج عليك

عربية الهوية · 2012-07-25, 18:58

السلام عليكم
اختي سيقيهم وين راه المشكل ديريهم دروجك وحدك وسيقيهم
لوكان تبقاي تخممي هكا غي انتي تتغصي وتسودي معيشتك
كبري بالك رمضان كريم

Lydia istanboul · 2012-07-25, 22:37

ديري روحك راهي دارك وحدك و اخدميها و خلاص...خدام القوم سيدهم...نتي راكي لالاها كي راكي نظيفة و نقية و مرا فحلة و ما تخليش بليس يجي يوسوس و يقولك نتي نية و جايحة و راهم لاعبينهالك...ااقتليهم بالقدر يعني عامليهم بالحسنى و نقي دارك و يجي النهار و يحسو شحال راهي ديك فنيانة و بلاك يهديها ربي و تعاونك..حنونة ما تقلقيش روحك راه بليس يحب يعذب بن ادم و يكرهو في روحو و في لي حولو...ماتكبريهاش و نقي دارك و ربي يسهل على الباقي

مزالنا واقفين · 2012-07-26, 19:07

السر راه البيت الزيادة الغيرة واعرة سيرتو بيناتكم نتوما نسا

شوفي حق لي عندك بيت زيادة عليها خلصي الضريبة ههه و نقي درج وحدك
هنا تولي نتي رابحة بيت و خاسرة فالتسيق و هي خاسرة بيت و رابحة لهنا من تسياق

خير ما تبقي معاها في مشاحنات و بلاك تكيدلك نتي كبري عقلك و خدمي وبيني شطارتك بلي تستاهلي ونص

صاي : )

امينة مناد · 2012-07-26, 23:21

سلام اعليكم وصح فطوركم
شكرا لكل من تفاعل نعي في الموضوع وصح خويا العضو مازلنا واقفين هي غايرة من البيت الزيادة لخاطر قبل مانبني صرا الشونتاش اعليه خاصتا وان سلفتي هي لعروسة الاولى وعندها زوج ابنات اما انا الثانيا ولكن انا ابنيت بدراهمي اما هيا القات كلش واجد بصح انا صح اسمعت كلامكم وعندكم الحق باش مانعندهاش بصح بزاف هي فنيانة غير في دالتها تع الدروج لولين ولفوقانين بصح في دارها لا لا شغلها مفحفح وانا واقيل راهم دايريني كوسيرجا
اسسمعوا هدي المرا ولله غير احلفت غير قلبي ما يكولني ومنخدمش ليكتا نقعد ساكتا
اسمحولي راني نقلق فيكم بصح ما عندي ليمن نشكي