سؤال مصيري حول رتبة عون في الحماية المدنية لحامل شهادة ليسانس

islammedia · 2012-08-09, 19:14

السلام عليكم

خاوتي كرهت من الشوماج كيما كل الشباب هدا الادماج راهو مليح وزاد غلقوه الى اجل مسمى هدا لارمي يحاوز فينا و ... و......وهاد العام راح يفتجوا مناصب في الحماية المدنية بما ان رتبة الملازم راهم غير 50 على المستوى الوطني ...مكلاه نشقي روحي ....قلت نهبط النيفو ونعفس على قلبي واش ندير ونشارك في رتبة عون بالرغم من انها بها بعض الامتيازات كالعمل في الولاية ويومين بيوم و الراتب لا بأس به وافضل من بعض المناصب الاخرى و خير من والو بصح خايف نولي نندم على القرار أم نصبر الى ان يجعل الله لي مخرجا وبيني وبينكم مانيش حابها راني معول على جال الشهرية والترسام فقط فقط لاغير ... اعينوني برايكم اخواني في اتخاد القرار ولكم اجر المشورة

sourour2300 · 2012-08-09, 19:19

يا خويا حتان تصحلك حتى هي وربي معاك ان شاء الله وتوخذ رايي احكم بيها يدك احسن من لا شيء جرب حظك وشوف وكيما قلتي الخلاص تيعها مليح المهم الانسان او خدام بالحلال وربي يوفقك ان شاء الله صح فطورك

ALIDZ89 · 2012-08-09, 19:23

انا كيفك
ماستر وقيلا نشارك

sourour2300 · 2012-08-09, 19:26

ياو غير شاركو اي مسابقة تجي شاركو فيها ويااربي وربي يوفق الجميع ان شاء الله

المرسم · 2012-08-09, 19:30

خويا انا نعرف صخابي ليسانس كيما انت هبطو النيفو دخلو اعوان الراي رايك ايلا راك مضمن الدخلة غير دخل زيد شحال في عمرك عندك سورس اخبرني

khelil89 · 2012-08-09, 19:34

يا أخي توكل على ربي وشارك ، الخبزة صارت صعيبة ، ليسانس وراهم يخدمو في الشانطي ، إذا جاءتك فرصة عمل في الدولة ، لا تفوتها مهما كانت الرتبة

star_123 · 2012-08-09, 19:49

31.000دج شكون لي يعطيهالك في الهشر + نهار بيومين

الله يسهل خويا ... ليسانس لي ماتوكلش الكسرة نعل بوها

ala_mobile · 2012-08-09, 21:23

صلي صلاة استخارة ولي جات مرحبا بيها

fr95 · 2012-08-09, 23:19

رانا كامل يا اخي راح نديرو كيفك بالرغم من حصولنا على الليسانس خير من اللي تحط في رتبة ملازم اللي ماليها محددين منقبل

ha91 · 2012-08-10, 03:41

السلم عليكم أود المشاركة في رتبة ملازم هل توجد فيها معرف كبيرة جدا وشكرا ؟؟

islammedia · 2012-08-10, 06:19

بارك الله فيكم وبالتوفيق للجميع

rafik_234 · 2012-08-10, 11:15

salem ya akhi roh adfa3 dossier ta3ek wa rabi ynajah ana rani ingénieur mais 27 ans wa koun jit na9der ndir a3wan rani dert walaw fi para par ce que bled hathi tfout 25 ans rak périmé wa en + na3tik example sahbi lécence dkhal himaiya wa ftah rabi 3lih aprés une anné et demi charek fi ta3 motaserfin fi wilaya wa njah wa douk rah fi wilaya alors tente ta chance fi aya haja wana rani bled ta3na dert 3liha croix rouje waq rabi ysahell

الاجتهاد · 2012-08-10, 11:21

اقتباس:

المشاركة الأصلية كتبت بواسطة islammedia

السلام عليكم

خاوتي كرهت من الشوماج كيما كل الشباب هدا الادماج راهو مليح وزاد غلقوه الى اجل مسمى هدا لارمي يحاوز فينا و ... و......وهاد العام راح يفتجوا مناصب في الحماية المدنية بما ان رتبة الملازم راهم غير 50 على المستوى الوطني ...مكلاه نشقي روحي ....قلت نهبط النيفو ونعفس على قلبي واش ندير ونشارك في رتبة عون بالرغم من انها بها بعض الامتيازات كالعمل في الولاية ويومين بيوم و الراتب لا بأس به وافضل من بعض المناصب الاخرى و خير من والو بصح خايف نولي نندم على القرار أم نصبر الى ان يجعل الله لي مخرجا وبيني وبينكم مانيش حابها راني معول على جال الشهرية والترسام فقط فقط لاغير ... اعينوني برايكم اخواني في اتخاد القرار ولكم اجر المشورة

السلام عليكم يا اخي لا تتردد تستطيع المشاركة في نفس الوقت عون و ملازم ادفع وصلي صلاة الاستخارة .......................اللي جات مرحبا بها .............مع العلم اني عون متربص بالحميز وعندي bac+3 زد على ذلك 90% من المتربصين كلهم جامعيين ............عندي 2اصدقاء الاول مهندس دولة في الاعلام الالي والثاني في التخطيط والاحصاء راهم معانا اعوان ............؟ الخبزة ولاة صعيييييييبة الله يوفق الجميع...................

redooane · 2012-08-10, 11:23

ما تهبط النيفو ما تعفس على قلبك
راهم معانا ماستر 2 و ماجيستير
وين بانت لاليسونس تاعك

mohamed-23 · 2012-08-10, 11:25

وااش معناااها هادي يا جمااااااااااعة : les diplômes supérieurs au niveau exigé par la réglementation en vigueur ne seront pas retenus
تسمى لا زم ندفعو غير بمستوى الثانية ثانوي !!!!!!! منين راح نجيبها الثانويات كلها مغلقة ! نقدر ندفع بمستوى جامعي ولا لااا ؟؟