راني حاصلة ساعدوني

omar_moubarki · 2012-07-28, 11:39

ساعدوني راني رايحة نبكي كي عدت نحشي في الدولمة لحم مفروم وروز بقاتلي الحشوة ياسر واش ندير بيها ربي يعيشكم

omar_moubarki · 2012-07-28, 11:45

لوجه ربي القاولي حل راني رايحة نطيبها للفطورررررررررر

عروبتي · 2012-07-28, 11:45

اختي ماتتقلقي ماوالوا الحشوة لي بقاتلك ديريها دي بول واضيفيها للمرق راها تجيك هايلة

ام قصي · 2012-07-28, 11:50

كيما قاتلاك الاخت ولكن مرريها في شوية شابلير واقليها وزيديها للمرق او تقدري اتحطيها في علبة محكمة الاغلاق في الثلاجة اتزيدي تخدمي بها gراتن باضافة بيض وجبن ......

omar_moubarki · 2012-07-28, 11:54

ممشكورين لقد دعيت لكم دعوة خير وسؤال الدولمة نديله الحمص واذا تقدري تقدميلي وصفة gراتن

لينا11 · 2012-07-28, 11:57

اقتباس:

المشاركة الأصلية كتبت بواسطة omar_moubarki

ساعدوني راني رايحة نبكي كي عدت نحشي في الدولمة لحم مفروم وروز بقاتلي الحشوة ياسر واش ندير بيها ربي يعيشكم

ماتخافيش حنونة
شوفي موضوعي
https://www.djelfa.info/vb/showthread.php?t=1031470

omar_moubarki · 2012-07-28, 11:59

ووووووينككم

ام قصي · 2012-07-28, 12:02

ايه واشي هذا لفحالة يا لينا شهيتينا اما باخصوص gراتن تقدري تفكري كيما حبيتي اديري طبقة انتاع الحشوة فوقها فرماج وبيض واتزيد طبقة اخرى حشوة من فوق بيشمال +فرماج او اخلاص وموفقة ان شاء الله وصحا افطورك

عروبتي · 2012-07-28, 12:02

بلا مزية اختي اما الدولمة يجيها الحمص

عروبتي · 2012-07-28, 12:04

اما عن الغراتان فانا نديرها بالبطاطا واللحم المفروم ولاصوص تومات والباذنجان وتقدري تسيبدلي الباذنجان بالكوسة(جريوات)
تقطي البطاطا دوائر ماشي خشان بزاف وماشي رقاق بزاف يعني متوسط وتقليها في الزيت وتقطعي الباذنجان دوائر وتقليه ايضا في الزيت بلاكي تنساي الملح وتخدمي لاصوص تومات
وتجيبي اللحم المفروم وتضيفيلو الملح الفلفل الاسود وبصلة صغيرة مقطعة وتقليه في المقلاة ثم تجيبي صينية الكوشة الخاصة بالغراتان(نتاع زجاج) تحطي طبقة بطاطا وفوقها طبقة باذنجان ثم اللحم المرحي تم لاصوص تومات واخر طبقة تكون نتاع البطاطا ثم تدربي البيض+شوية ملح+شويةكسبرة مقطعة وتكوبيه من فوق وتخليه ختى يطيب البيض وراه يجي هايل وبنين
انا مانديرهاش بالباشاميل على خاطر دارنا مايحبوهش
نتمنى اني قد افدتكي

omar_moubarki · 2012-07-28, 12:10

مشكورين يااخوات الحبيبات على المساعدة لان مروركم عسل وياربي يحققلكم دعواتكم وصح فطوركم واسمحولي على التعب

pharmajsk · 2012-07-28, 12:46

اعتدر اختي معندي حتى فكرة اخوواتي ممكن تتفاعلو معايا راني حابة وصفة الكورجات معمرة في الكوشة راني حوست عليها وملقيتهاش

عاشقة الوفاق · 2012-07-28, 12:49

انا اليوم رايحا ندير غراتان يجي وتقدري ديري فيها الكفتة لي فضلتلك

اولا في المول ديري طبقة بطاطا مقلية دوائر

ومن بعد طبقة كفتة لي فضلتلك بشرط انك تقليها شويا حتى تنضج

وفي الاخير طبقة بطاطا وديري البيشاميل وتقطعي في داخلها شويا جبن

ومن فوق تقدري تزيدي شويا جبن وتشوفي المداااق اكثر من رائع

عاشقة الوفاق · 2012-07-28, 12:50

اقتباس:

المشاركة الأصلية كتبت بواسطة pharmajsk

اعتدر اختي معندي حتى فكرة اخوواتي ممكن تتفاعلو معايا راني حابة وصفة الكورجات معمرة في الكوشة راني حوست عليها وملقيتهاش

للاسف منعرفهاش نعرف اللي تطيب في لاوصوص والي تجي في اكياس الشواء فقط

pharmajsk · 2012-07-28, 12:59

اقتباس:

المشاركة الأصلية كتبت بواسطة عاشقة الوفاق

للاسف منعرفهاش نعرف اللي تطيب في لاوصوص والي تجي في اكياس الشواء فقط

ايه قصدي لي تجي في اكياش شواء تجي محشية