مشكلتي مع عائلتي

مشكلتي · 2012-07-13, 18:07

السلام عليكم
قبل عامين عملت جاهدا لاقتناء جهاز حاسوب خاص بي بعد ان امتنع واداي عن اشتراءه لي
و الحمدلله
لكن الان أصبحت العائلة كلها تعمل به و يشدوه ساعات ساعات و ديما كي نسحق نخدم بيه يبداو يعيطو و لا احترام و لا هم يحزنون و كأنني لست أنا مالكه
المهم عندما تشاجرت معهم درتلو mot de passe
لكن الوالد قعد يعيط عليا
حتى و حاولت نفهمو محبش يفهم
قتلو ياك حاسوبي جبت بعرق جبيني علاه راكم تتحكمو فيه ضرك قعد يعيط و هو من النوع المسيطر اللي يحب يكون هو دائما اللي عندو الحق
البارحة كانت أختي تعمل بيه
قتلها نوضي قعدت تعيط في وجهي ولا احترام
قتلها ياك حاسوبي و أنا الان مسحقو قعدت تخلط في الهدرة و زادت كملت عليها والدتي و والدي
أنا كرهت ماحابو يشرولي ما خلاوني نتحكم في حوايجي
صراحة حسيت نفسي ماعندي لا كلمة و لا قيمة فهاديك الدار
رايو عليا خاوتي و ليكن في علمكم حاولت ناقش الموضوع باحترام معاهم و درت لكل واحد حصة خاصة بيه تتلائم مع وقتو لكن بدون فائدة
ديما كي نسقو لازم نستنى الدور
شغل الحمار حماري و أنا راكب من اللور

سارة البوسعادية · 2012-07-13, 20:08

وشحال في عمرك؟؟؟؟؟؟؟؟؟؟؟؟؟؟؟؟؟
باش نقدر نعطي رايي

أم لجيـن · 2012-07-13, 20:14

على حاسوب راك داير منه مشكلة .....ربي يحفظلك عائلتك

wafa16 · 2012-07-13, 20:31

يا اخي حنا صاريلنا العكس بابا شرا الجهاز بطلب و الحاح مني بصح الاخ تاعي راهو مستعمرو واحد ما يقعد فيه حتى يصرا مشكل ولوكان غير بالفايدة راهو يلعب من الصباح حتى لعشية
بابا فكر باش يقطع خط الانترنيت بصح شافني نسحقو في الدراسة ديالي
يعني كي نلقا حل راني نعطيهولك

soha1987 · 2012-07-13, 21:33

هادا ماهوش مشكل في اي دار تكون كيما حكايتك وحتا حنا مرات تنوض حرب علا جالت لميكرو وينوض بابا يطفيه ويحوزنا كامل ولي تمسو تاخذ طريحة ههههههههههههه باباك وخواتك ماتزعفش منهم تكبار وتنسى

hamsa1987 · 2012-07-13, 22:06

السلام ،
البعض سيقول لك عادي و هاذي عائلتك انا بكل صراحة كون شريتو بدراهمي نخليهم يستعملوه تاني بصح كي نسحقو انا ينوضو لانو ملكي و شريتو بدراهمي و ما دام اك تقول ما يخليوكش خلاص دير بيه و راهي تنوض مشاكل بسببو بيعو و تهنا

meriem hanin · 2012-07-13, 22:45

ربي يحفظلك عائلتك لانها اغلى بكثير من الميكرو الي شريتو بعرق جبينك
ادعي ربي ان شاء الله يهديهم يااااااارب

~~أم البشائر~~ · 2012-07-13, 23:52

انا شريت ميكرو

دارو فيه اولاد اختي الباطل

عطيته ليهم

وشريت واحد احسن

حبو يدورو بيه درتلو كلمة سر

ومع ذلك يحتاجو حاجة نخليهم

اللي يروح في اهلك ما يغيض

خاوتك ووالديك تصرف عليهم وماشي عيب

المهم بعد مده راح يحسو بفضلك وانت تاني ما تتخشنش معاهم في الهدرة

السعاده في العطاء وليس في الاخذ

وبعد مده ترى النتائح

ربي يطيب بيناتكم

بلسم الجراح · 2012-07-14, 14:40

خليلو الموت باس ولا اخزنيه عليهم
ولا العبيها بعتيه اكيد راح يشرو واحد اخر وتتهناي

Lydia istanboul · 2012-07-14, 14:55

بيعو و اشري ايفون دير فيه النت ههههههههه امزح...عادي يا اخي او اختي رانا كامل صرالنا هاك في الدار.قبل ما نشري المحمول كنت نضال نتسابق انا و اختي لي راهي متزوجة و بعيدة الان,,,,كنا دائما متقابضين عليه و زعما نحقدو على بعضنا هههه و جرح مشاعر و بطاطا...كلها الان ذكريات حلوة و لو ترجع ختي للدار نعطيها الميكرو و الهاتف و بوسة مالفوق و ما نقولش لالا...راك برك من كثر الضغط تشوف فيها كبيرة و اهانة وووو و يا رب يرزقك ربي و تشري واحد جديد او يشري خوك واحد جديد و تولي غاير منو هههه ربي يفرحك عاجلا غير اجلا

abdoustar · 2012-07-15, 07:49

بيعوا و اشري واحد بورتابل

loutsse · 2012-07-17, 17:29

هههههههههههههههههه حنا تاني عندنا نفس المشكل
الحل الي درتهولهم قسمتلهم كل واحد ساعتين في اليوم كي يخلصوا نقفلو بالمودباس فالعطلة
مي فالوقت لقراية درت بروغرام وحدو بالنص ساعة يخدمو فالويكاند 3 ساعات

yesican · 2012-07-18, 18:42

سمع مليح ............. تفاهم مع صاحبك وجيبوا للدار قدام اهلك و دير بلي راك ماشي تبيعهولو علاخاطر راك محتاج للدراهم و رفد الحاسوب و مدهولو بشرط يكون صاحبك الي دير في الثقة .لانو باين على اهلك بلي متمسكين بالحاسوب و مايقدروش يصبرو عليه...............اكيد ثم اكيد مايصبروش اهلك عليه و دوك يشريو واحد اخر و كي يجيبوه للدار جيب انتا الحاسوب نتاعك و قوللهم شريت واحد اخر و هدا الي يبدي ينوي يقعد فل الحاسوب نتاعك قلو بدي تعطي الريح لكرعيك هههههههههههههه راه عندكم الحاسوب نتاعكم ..........و بهده الخطة تتحصل على حاسوب اخر في البيت و نلاحض انخفاض نسبة التعياط في الدار و راحت البال