عيد ميلاد ابنك قريب و محتارة واش تعمليلو ادخليي

[omhanine]

السلام عليكم يا احلى عضوات
اليوم حابة نويلكم طورطات خدمتها لاعياد ميلاد
الحقيقة ابني يموت على سبيدرمان و احترت كيفاه نديرهولو في عيد ميلادو
شريتلو كل شيئ سبيدرمان حتى اللباس و بقاة الطورطة
بديت عملية البحث و التنقيب لقيت بللي كاين صور يحطوها فوق ليتارت مي يجيو واجدين وكاين طابعات خاصة بيهم كاين محل هنا فالبرج يخدمهم يسموهم imprimés alimentaires المهم انا الغالي ما ندورش بيه امالا جاتني وحد الفكرة خممت في القلاصاج نتاع المخبز ياك ييبس و كنت شفت وحد الاخت في منتدى شرقى خدمت ميكي بالشكلاطة امالا قلت نفس الفكرة شريت الملونات المختلفة و اول حاجة جربت فيها هي السنفورة
خدمت جينواز و كريم شانتييه و ديكوريت الطورطة و بقات السنفورة جبت ورقة شفافة اللي يديروهم التلاميذ فالبحوث و طبعت صورة السنفورة في ورقة عادية حطيت الورقة البلاستيكية فوق الرسمة لصقتها باللاصق باه ما تتحركش
خدمت القلاصاج و حطيت في فناجل و لون فنجان بالازرق و اخر بالاصفر و الاخر خليتو ابيض و فنان اخر جمعت فيه الالوان اللي عندي كامل باه يعطيني الاسود ما لقيتوش يتباع
خدمت 4 اقماع بالورق و في كل قمع حطيت لون و بديت نرسم السنفورة
اول حاجة رسمت الحدود كامل و من بعد لونت الباقي الخطأ اللي درتو اني ما خليتش الحدود ينشفو و هذا عطالي درس
رسمتها وخليتها نشفت كي القلاصاج

و في المساء كي روحت مالخدمة ما عليا غير حطيت الرسمة فوق الطورطة و شوفو النتيجة



يتبع



و طبعا بعد السنفووووورة كل الشخصيات رجعت ممكنة

فاجأت ابني في عيد ميلاد بطورطة غلفتها بعجينة المارشميلو و حطيت فوقها صورة سيبدرمان و كانو الاطفال فرحانين و هوما ياكلو في وجهو هههههههههه





و هاذي درتها لوليد صاحبتي