اجرو ليا بليز

[سعيدة8888]

صباح النور بنات
الله يخليكم
حابة طريقة اللوبيا البيضاء و العدس
زوجي كيما نطيبها ماتعجبوش
وروني السر نتاع طيابهم
ماتقولوليش بالبقري و اللحم هاذ الحوايج مش متوفرة
بليز ساعدوني وماتضحكوش عليا وتقولو ماتعرفش طيب اللوبيا

[سعيدة8888]

وعلاش ماكانش لي رد عليا ولا ماكمش طيبو في اللوبيا و العدس

[ام محمد و ملاك]

انا من تجربتة اختى اللوبيا ما تحبش الطماطم بزاف و تانى لازم طيب مليح في الكوكوط انا ندير فيها نص مغرف طماطم الباط و بصلة متوسطو و هريسة و راس الحانوت و شوي فلفل احمر و من بعد ما نحل عليها الكوكوت نزيد نخليها تتغلى باه تجي ثقيلة و لازم الحبة تكون طايبة ياسر و الصوص تاني يكون فيها ياسرر زوجي يقلي كيما هك نتاع الريسطورا

[أم ريتاج زهرة]

علاش نننضحكو عليك حتى حد ما زاد متعلم و راني حاسنة عونك مع الراجل الصعيب و طريقتي أنا ساهلة نفخ لوبيا نهار من قبل و غدوة نطيبها ندير كلش بارد في بارد و نبلع لا كوكوت المقادير حبة بصل 2 حبات زرودية كرافس حرور زعفران طماطم الباطة شوية زيت و ثوم و نبلع عليها و نخليها طيب و منديرلهاش اللحم و تجي تهبل و ربي يوفقك

[أم ضياء عبد الرحيم]

صباح الخير اختي سعيدة علاه نضحكوا رانا كامل نتعلموا و اظن انه الاطباق البسيطة الي بلا لحم هي الي صعيبة باه تجي بنينة لانه مكنش اللحم يغطي على البنة
بالنسبة ليا انا عمري ما طيبت العدس باللحم و الوبيا معظم الوقت بلا لحم
بالنسبة للوبيا نديرها ليلة كاملة في الماء و غدوى من ذاك نغسلها مليح في الماء و نغليها شوية في الماء حوالي 15 دقيقة باه تنقص شوية من غازاتها و ما توجعش في الكولون
و من جهة اخرى نحضر الصلصة ندير بصل مرابي رقيق نقليه على نار هادية ونزيد الثوم ديري كمية مليحة لانها تعطي مذاق هايل للاطباق و كرافس مقطع رقيق خلاص و تقدري اديري فرع ميش مقصوص يدير البنة و من بعد نحيه و ندير حبة طماطم اذا متوفرة نقليهم مليح على نار هادية و من بعد كي اللوبيا يدخلها الطياب يعني كي تمسي حبة تلقايها طرية شوية نصفيها من الماء الي غلات فيه و نضيفها و نحرك بلعقل بلى ما نزيد الماء و ندير التوابل شوية فلفل ابيض او اسود و راس الحانوت و ملح و اذا تحبي اديري معاها مكعب مرق دجاج يدير بنة مليحة لكن نقصي الملح و هريسة و نحل ملعقة طماطم في شوية ماء و نصبها عليهم و نحرك و نخليها حوالي خمس دقائق قبل ما نمرق بالماء السخون نزيد نحركها بالملعقة و نغلق عليها الكوكوت اطيب و كي الطيب نزيد انحي عليها الغطاء و ندير رشة كمون نخليها تغلي شوية و نطفي
انا هكذا نديرها و تجيني بنينة لاني جربة نمرق او تغلي المرقة و حدها ومن بعد نضيف اللوبيا تجيني صامتة ندير المرقة اطيب وحدها غير كي ندير اللحم لانه يحب وقت باه يطيب لكن كي نديرها بالزيت ندير بهذه الطريقة
و بالنسبة للعدس حتى انا يجيني شوية ناقص ميش بنين بزاف زوجي يقولي كي تحبي تعاقبيني ديري عدس :d
ان شاء الله نكون فدتك

[selma2013]

شوفي أختي أنا كنت نديرو سامط ومنين شفت طريقة تاع الأخت خربشة ناعمة هكذا اسمها هههه وتبعت طريقتها الحمد لله عاد يجيني بنين ياسر حتى زوجي عجبو بالبزاف وراح ننقلك الطريقة حرفيا كيما كتبتها وأنا زدت طبقت نفس الطريقة على اللوبيا جاتني روعة طبعا الوبيا تبيتيها فالما وتقليها مع التوابل بعد ما تصفيها

شوفي اختي راح نقولك على طريقة جربيها و ادعيلي
حطي العدس بعد ما تنقيه مليح
حطيه في شوية ماء يغلي وارمي معاه 6 او 5 سنات ثوم مع وريقة رند لمدة 5 دقايق او حتى تشوفيه بدا يغلي
بعديه على النار وزيديلوا شوية ماء بارد و ديري يديك فالزوج في القدرة و بداي تحكي
في العدس بين يديك راح تشوفي باللي القشرة بدات تتنحى
هكداك زيديلوا الماء و بداي تصفي و ترمي في القشرة


و العدس راح تلقايه بدى اصفر و فيه حبات بقشورهم عادي


راح تقوليلي بلي القشرة فيها الفايدة راح نقولك الفايدة في الحبة الصفراء اكثر
كيما قشور البطاطا فيه الفايدة نرميوه و ماناكلهوش قشور التفاح كدلك قشور الجلبانة والفول فيهم فايدة مع ذلك نرميوهم
العدس كدلك

و دركا نجيوا للطياب والله صدقيني تبعي هاد الطريقة و رديلي الخبر
انا العدس راجلي يقولي في حياتي ما كليتش عدس بنين كيما هدا
و تعلموها جاراتي من الشرق و من الغرب و من الصحراء
و حبوه بزاف و مرة راجلي بعث لصحابوا الغداء و كنت مطيبة العدس للان يشكروا فيه
دركا كل واحد تميتا يعني تبدلوا المدينة اخرى .كي يهدروا معاه في التليفون

يقولوا كاش ماكاين شوية عدس ههه

السر راهوا كامل كي تنحي القشور


المهم رابي هاديك الثوم اللي غلات في الاول مع حبة طماطيش
و ننصحك ماديريش البصل.العدس ما يحبش البصل كيما اللوبيا وهادي المعلومة متبعينها من زمان
و ماني ربي يطول في عمرها تعلمتها من عند الروميات في وقت فرنسا

بعد ما حطيتي الثوم والطماطيش ورقةرند دديري الزيت الملح فلفل اكحل كمون فلفل عكري و الحرور
قليهم مليح و زيدي ديري العدس معاهم يتقلى مع شوية كرافس او معدنوس
و مرقي ضربةوحدة بلاك تزيديلوا الماء من بعد راهوا يجيك صامط و غلقي الكوكوت
و كي تعاودي تفتحي في نص الطياب زيدي ديريلوا مغرف طماطم مع شوية هريسة ادا تحبوا الحار
و غلقي الكوكوت وحد العشر دقايق او ربع ساعة وطفي عليه.يعني وقت الطياب كامل هو 25 او 30 دقيقة لان العدس منحي ا و القشور و مرة على مرة طلي على العدس لانك لوكان تغفلي عليه تلقايه دايب
وطفي عليه
راح تلقايه
المرقة خاثرة وتقيلة متوازنة و اللون يشهي و يفتح النفس و البنة ما نقولكش كيفاش روعة
و الريحة تشميها من بعيد

ملاحظة
ادا حبيتي ديري معاه حبة بطاطا قطعيها في الاول مربعات صغار تتقلى مع الثوم والطماطيش
البطاطا راهي تخرج بنينة مع العدس
و قدميه مع البيض المغلي و الشلادة

جربيه و رديلي الخبر

وراني ديما ندعيلها بالخير على الطريقة

[امازيغية وفتخر]

اختي راح نقلك على لوبيا تونسية تاكلي صباغك وراها
شمخي اللوبيا ليلة منقبل في المء وشوي كربونات فتيتة مش بزاف
الغد من ذاك صفيها واشليها مرة وحدة برك
حطيها في كوكوط مع الماء غير كيما تتغطى
حطي معاها زيت 4 مغارف عصرة قارص
راس الحانوت مغرف صغيرة كمون
راس بصلة كيما راه ما تقطعيهش
راس ثوم كيما راه ما تقشريه ما تقطعيه
فلفل اسود مغرفة كبية طماطم مصبرة اذا عندك لحم او كرعين بقري او خروف حطي اذا ماعندكش عادي ما تحطيش
اغلقي عليخ الكوكوط او حطي على نار قاوية لما تبدا الصفارة ادور نقصي النار وطيبي نصف ساعة
حلي الكوكوط اذا طابت اللوبيا ديري الملح خليها نزيد اطيب او تتجمر
لما اطيب تماما لوحيلها كمون و كسبر مقطع وعصرة ليمون اوالفلفل حار او لهريسة طفي النار قدمي
في صحن مع مغرفة زيت زيتون او قارص رووووووووووعة جربي او شوفي واش ايقولك سي السيد
حقى ما تنسايش تنحي البصلة والثوم قبل ما تسقي وشهية طيبة

[قمر 77]

اختي سعيد ة السؤال نتاعك انا دائما نطرحو رانا كامل فالهوا سوا ايمالا اليوم جربت الوصفة اللي قالتلك عليها سلمى نتاع خربشة ناعمة نتاع العدس و الله عجبتني اما اللوبيا انا رجعت ما نحيرش فيها بعدما رجعت نطبها هاك شوفي اختي نبيتها ليلة كاملة و الصباح نديرها فالكوكوطة و نديرلها ما بارد و زيت و ملح و رند و ربطة زعيترةو الريحان رجعتها طليانية ههههههههههههههه و كي تعود قريب تطيب ندق الثوم مع الكمون و الفلفل حار و عكريو نزيد مغرف طماطيش كونسونتري و نخليها تعقد و الله تجي روووووووووعة

[ام رشدى]

بارك الله فيكن على هده الوصفات والتعليماتالقيمة انشاء الله قيد التجريب

[fati 17]

بارك الله فيكم خياتي كل وحدة وطريقتها ويبانولي كامل هايلين

[ام رشدى]

راني جربت اليوم العس انتاع الاخت سلمى 2013والله جاء رائع اما الريحة عندو رائحة خاصة وسي سيد عجبو بزاف مع اني انطيب فيه وراني خايفة من النتيجة ماتعجبوش ولكن الحمدلله واللللللللف شكر ليكي اختي الكريمة وربي يجعلها في ميزان حسناتك لبنات روحو جربه واش راكم تستناو انا سي سيد علقلي نجمة هههههههههههه

[أم تسنيم 2017]

سلااااااااام عليكم اختي ليام لي فاتو جربت هاذ اللوبيا وعجبت زوجي بزاف
https://www.djelfa.info/vb/showthread.php?t=1219620

[imanaz]

أنا نطيب اللوبيا كيما الأخت قمر 77 صح تخرج هايلة خاصة في هذا البرد هذا واش اليق

[ام رشدى]

..........................

[ام سوهيل]

https://www.djelfa.info/vb/showthread.php?t=1746855

تفصلي اختي هدي طريقتي وكي نطيبها ميخلو ولو في الطجين