معجون المشماش رائع جدا

[ام مهدي 03]

الصور راهى من مطبخى فى موسم المشماش وهذا وين سهل ربى باه نحط الطريقة



6 كغ مشماش منقى ونظيف
4 كغ سكر
1ل الى 1ل وربع ماء
ليمونة واحدة



نحط المشماش المنقى والمغسول والمقسوم فى برمة ولا فى كوكوط كبيرة ونضيفلو 0.5 ل ماء ونحطو فوق النار حوالى ساعة على نار متوسطة
من جهة نحضر 0.5ل الى 3/4 ل ماء مع 4 كغ سكر على شكل شاربات
بعد ساعة يكون المعجون طاب وولى ساهل باه نرحوه
نرحيو المشماش بالماء لكن بالرحاية اليدوية ماشى بالميكسور ولا الروبو لانو بالرحاىة اليدوية يبقاو هذوك الخيوط نتاع المشماش من فوق
بعد ما رحيناه نضيفولو الشاربات وحبة قارص كاملة بقشورها ونحطوه على النار باه يطيب من الاحسن فوق الطابونة وتشعلى للزوج نتاع الجنب وطفى نتاع الوسط. انا كانت بنتى صغيرة تحبى وخاوتها صغار نخاف يخلو الباب مفتوح وليت طيبت فوق الكويزينيار ونقصت للنار وطيبتو حوالى من 6-7 ساعات وكل وقت نحرك خاصة فى الساعات الاخيرة


كل مرة وانت تحركى حاولى تلمى هذيك الرغوة ونحيها لانها عبارة عن فقاعات الاكسجين وهى الى تفسد المعجون


بعد المدة اللازمة لما تحركيه تحسى بيه رجع ثقيل اجبدى شوية فى صحن وخليه يبرد راهو يبانلك اذا وجد ولا مازال


لما يوجد غطيه بقماش مقطن نظيف وجامى تغطيه بالقفال لانو راح يعمل قطرات الندى وخليه يبرد اكيد يكون وجد فى نهاية اليوم اذا خليه يبات
غدوة من ذاك وجدى العلب الى تحطى فيه المعجون .عمرى العلب ومن جهة ذوبى الشمع





وحطيه مباشرة فوق المعجون راهو يتلم بالخف ويعمل طبقة من فوق

اغلقيهم واحتفظى بيهم فى مكان بارد ماشى شرط فى الثلاجة
وهذى الكمية الى خرجتلى


واخيرا نقولكم اخواتى . صح الطريقة طويلة وشوية متعبة لكن النتيجة رائعة. يحبوه الاطفال تعرفوهم ما يحبوش هداك الى يجى بالقطع ولا بالحبيبات
المعجون يدور عليه العام وما يصرالو والو
تلقايه واجد فى عشيات الشتاء ولا مع الفطور وحتى فى الوصفات الى تبدعيهم