مقلوو بة الأرز بالدجاج و الخضر بسيطة لذيذة

[om kamilia]

هذي المرة , جبتلكم الطبق شرق اوسطي و حنا كمغاربة وجزائرين نحبوا نذوقوا من فن كل بلاد , ماخلينا حتى بقعة في عالم و درسنا كيفياتهم وحلوياتهم ان شاء الله العالم يطبقو وصفاتنا الصحية , راني درت تقرير
هي كيفية بسيطة و الكل يعرفها بصح ذقتها عند قريبة زوجي بنة رهيبة قلت هذا الاكلة نتلذذ بيه تشبعي و فمك تقولك زيدي هههه
آسفة الصورمش واضحة كفاية
بدون اطالة

المقادير
نحتاج
دجاج حسب افراد العائلة
ارز حسب العائلة وان كان اارز بسمتي احسن
بصلة كبيرة ونص للمرق
حبة طماطم او اكثر
خضر, انا استعملت باذنجان تقدرو تديرو كوسة , او جلبانة وحتى الجزر , البطاطا , او ممكن تضيفو فطر




للتوبل:
فلفل اسود
رشةقرفة
.زعفران أو كركم حسب التوابل لي تحبوها
وطبعا ملح ومكعب الدجاج و زيت والماء
بالنسبة للملح والتوابل نديرو حسابنا و نديرو فقط مكعب دجاج ولا نضيف شوية ملح الاهم ما نقعدوش نخلطو في روز

طريقة التحضير


الحاجة الاولى لي نديروها نطيبو المرق تاع الجاج , في طنجرة نحطو طراف الجاج ونص بصلة مقطعة و لآ مبروشة و التوابل وملعقة زيت ونحمس شوية كي تتدخل التوابل في الجاج نمرقو بماء سخون بكمية وفيرة بهذاك المرق لي نسقو الأرز
نخلوه يطيب على نار متوسطة 40 دقيقة على الاكثر




المرحلة الثانية
تحضير الخضر: البصلة الكبيرة نقطعوها جوانح في مقلة نحطو عليها شوية زيت وملح فلفل اسود على نار هادئة نعسوها حتى تذبال وتتكرمل نقطروه في ورق مصاص ونخلوه بجهة



البذنجان نقطعوه دوائر ونقلوه في الزيت وانا نفضل نشويه في الفور ونسح عليه شوية زيت لانويمتص بزاف الزيوت و نخلوه في ورق مصاص قدر بجهة




والارز نغسلوه عدة مرات ونصفيوه من الماء

دوك مرحلة التركيب في قطر ولآ سوتوز ما تلصقش نقطعو الطماطم دوائر نستفوها في القاع ونرشوها بفلفل اسود رشة خخفيفة مع ملح و نذرذرو عليها البصل لي حمسناه و نضيفو الخضر تاعنا و في الاخير الأرز ونزيدو رشة من التوابل وملعقة صغيورة من مارغارين نصفيو المرق تاع الجاج ونكبوه على الروز حتى يتغطى كليا , على نار هادية وكل ما نشوفو نشف نزيدو نمرقوه بمرق الدجاج حتى تنتفخ الحبات كليا و لآ ما كفاش المرق نغلو شوية ماءمع نص مكعب دجاج نضيفوه

و دجاج نحمروه ونرافق به طبق المقلوبة







كي يكمل طيابو نقلبوه بالصحة و الهناء




عن جد رهيبة و لذيذة وللتزيين نقدرو نستغناو على الخضر و نفورو جلبانة نشبحوها بيها و الفطر نحطو ساير داير
, غير البصل ضروري لانو هو لي يطلق الحلاوة تاعو
صدقوني و الله تغزو صباعتيكم هههه ولهذا طلبت الوصفة
فقط حبيت نشارككم بوصفاتي البسيطة و منها نخبيهم لان الزهايمر قتلني ههههه
تحياتي
دعوة لأخي بالشفاء