يريد التقدم لي وانا قابلة بيه بصح ......

[مشكلتي]

سلام الله عليكم


تقدم شاب لخطبتي وقابلة بيه وهو بغا يتقدم يحكي مع اهلي هو مشي خدام يعني رايح يبدا في خدمة ليام هدو في لبريفي مي كما تعرفو سلاك تاع البريفي ناقص شويا انا قابلة بيه واعلابالي بلي ربي هو اللي يفرج والقسم على الله لكن المشكلة انو نخاف اهلي يرفضوه هو قالي كميقدرش نزوجو في اقرب الوقت يعني رح يطول شويا باه نتزوجو كما تعرفو امور الشباب كامل حتى يلم روحو وتعرفو وقتنا صعيب انا صدقوني قابلة بيه كما هو بصح نخاف اهلي يرفضوه مع العلم انه متخلق ومدين لاباس بيه من جيهة هدي بصح الخدمة مكانش خدمة ثابتة افيدوني شكون لي مرت بحالة كما حالتي تفيدني ربي يبارك فيها ولا اعطولي نصائح الله يحفظكم

[AMINA.Z]

المشكل انو حكاية متخلق و متدين راهي ولات مسالة نسبية بشكل كبير ..فالمظاهر احيانا ما تخفي الحقائق ...يعني حاجة ماراهي مضمونة ....و زيد ماعندوش عمل ثابت ..يعني غير مستعد لتحمل مصارف الزواج و مابالك مصاريف البيت.
فكري بعقلك
و ماكش راح تعرفي راي الاهل حتى يتقدم
و اذا قبلو ....لازمك صبر كبير و ربي يقدرك و مبروك عليك
و اذا ما قبلوش ما تلوميهمش ..بنتهم و يخافو عليها و يخمو على مستقبلها..راح يجي نهار و تكوني ام و تتمناي الافضل لولادك و تحبيهم يكونو مرتاحين و مهنيين
خليه يتوكل على ربي و يتقدم و ديري استخارة و اللي فيه خير راح يسهلو ربي
نصيحة اخرى .....اذا راهو مطول باه يجي يتقدم رسميا ...ننصحك ما تبقايش على اتصال بيه و ما تخليش قلبك يتعلق بيه ..لانو احتمال تكملي معاه و احتمال لا ..و انتي راح تكوني الخاسر الاكبر .

[محمد جديدي التبسي]

وعليكم السلام ورحمة الله وبركاته
اذا ما عندكش قوة الشخصية والمقدرة على أخذ قرار القبول بشاب فقير متخلق فلا داعي لتقحميه في هذا الأمر وكوني صريحة..
الكثير من الوالدين هم سبب بقاء بناتهم بلا زواج بسبب شروط تعجيزية وهم يعلمون علم اليقين حال الشباب وظروف العمل موظف وما يلحقش يتزوج في اقل من اعوام من الخطبة ... كوني شجاعة اذا كان شاب مرضي الدين والخلق فلا ينبغي رفضه والرزق يأتي بالسعي ليس بالضرورة وظيفه عند الدولة فكم من شباب تعلموا حرف وامتهنوا التجارة حالهم افضل من دكاترة في الجامعات .. ربي يفتح عليه وعلى كل الشباب الصالح.

[oumhana]

لسلام عليكم
يا بنتي المشكل مراهش إلاأهلك راحين يقبلو و لا لالا خمي مليح متمشيش بعواطفك قالو ناس زمان زواج ليلة تدبيرو عام. الكل يعرف بلي الرزق على ربي هذامفروغ منو بصح باه واحد يروح هكذا يزدم على جبل بقادوم هذي لالا.ونا متيقنه بلي والديك إذارفضو على مصلحتك خاطر بعد الزواج كي تولي تطلبي حاجة وهو مسكين ميخدمش منين راح يجيبهالك،وهذي مسؤوليه مشي لعب رايحة تصبري d'accordولكن يجي نهار لي رايح يكون فيه مشكل على الخدمة وأول واحد راح يحس هما والديك.
إذن إستخيري الله وشا وري أهلك من بعد خوذي القرار.صح هما الشباب يا حليلو بصح حتى بحنا منقدروش نرمو بناتنا برك. والله المستعان

[النجمة القطبية]

لازم تكونى واقعية شوية
نعم الارزاق على الله ولكن على العبد ان يسعى واين هو ادن سعي هدا الخطيب
يقولك راح نبدا خدمة في البريفي وهو مازال ما بداش ثم يقولك الخطوبة راح تطول !!!!!!!
كيفاش هدا يا صديقتى ونشوفكم متفقان حابة تحطى الاهل امام الامر الواقع ولا واش
ادا تعرفيه صارحى الاهل انك تعرفيه واتفقتى معاه
وادا معرفتيهش واتفقتما عن طريق وسيط خلى اهلك ينوبو عليك في الاتفاقات متصغريهمش
والحكاية مش حكاية غنى ولا فقير لان الله هو الغني وانما حكاية ان الاتفاق يكون معقول ميقولكش مثلا ان الخطوبة تطول والاكيد راح يطالبك بالحديث في الهاتف وووو والا كان صبر يخدم ثم يخطب
المهم يا اختى نتمنالك التوفيق والتيسير ان كان صالحا

[الطيب الجزائري34]

قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير "

[thorpe]

سبحان الله عن اية نصيحة تبحثين ؟؟؟
ساهلة ماهلة
اذا حابة تتستري وتتزوجي وتبني دار
وكيما راكي تقولي جاك شاب محترم
ابداي حياتك وربي هو الي يرزق
واذا شاتيا المال والقيل والقال تاع الناس راهي دات فلان وعلان عندو وما عندوش
ريحي استناي ولد بيل جيتس راه كبر بالاك يجيك مكتوب معاه
الناس تبحث عن الرجل لتستر بناتها وتستر انفسها وتحصن فرجها
وناس محوسة تتزوج بالخدمة والمنصب والشكارة والمظاهر
ربي يهديك الى ما هو اصوب

[هدآية]

اختي الرزق على ربي
المهم انت تكوني مقتنعة بيه
و من ثم تقدري تقنعي اهلم الا رفضو
وزيد مادام يخدم في البيرفي راه لاباس بيه
المهم ما يكونش قاعد
و ربي يقدملك الخير

[toulay]

وعليكم السلام ورحمة الله تعالى وبركاته
شوف اختي الارزاق يقسمها ربي سبحانه وتعالى و en plus انت مقتنعة بالرجل هذا خايفة برك من la réaction تاع داركم
هوما la famille تاعك من حقهم يشوفوا بنتهم مهنية في دارها لباس بيها مايخصها والو وديما يتمناولك الافضل
درك مين يتقدملك السيد ان شاء الله سقسوا عليه اولا واذا ظهر انسان يخاف ربي الله يسهل بيناتكم
المهم هو يدير des démarches يحوس على خدمة يشارك في les concours والا يتعلم كاش حرفة ويولي يخدم عند روحو
ومتنساش صلاة الاستخارة والدعاء
بالتوفيق

[*سبل السلام*]

اختي هذا مازال ماخطبش خلاص وراكم خايفين
اولا يتكلم مع اهلك يسقسيو عليه ويشوفو الا فعلا متدين ومتخلق والناس يشكرو فيه هنا تعرفو يوافقو ام لا. والا كان باغيك راح يرجع يخطبك مرة واثنين حتى يوافقو
الخدمة مشكل اغلبية الشباب
لكن المهم انو ما يتوقفش يعني يكون شخص مسؤول يبحث دائما عن عمل ويقبل بالوظيفة اللي يلقاها المهم تكون رزق حلال
ماشي يلقى خدمة تاع يوم ولا زوج باش يقولو خدام وكي يزوج يحبس
ومن الان الى ان يقبلو بيه اهلك. نصيحتى توقفي عن مقابلته وما تنسايش بلي هذا لا يجوز شرعا
وسيؤثر على حياتك مستقبلا ويخليك متعلقة بيه في حالة الرفض
ولا تنسي ان تستخيري الله فالخيرة فيم اختار الله
واذا كان قرار اهلك نهائي قاطع فطيعي والديك يوفقك الله
ربي يسهلك امورك

[~أميرة أميري~]

انا خطيبي زوالي ونفتخر بيه علابالي بلي ماراحش يوفرلي كلش مي يكفيني راه معايا وربي هو الرزاق ،،، عمري ماراح نسمح فيه فجال وضعو المادي و والديا كي شافوني قابلة ماقالولي والووووووو ،،، صح المعيشة غلات بصح كاين رب راه فوق كلشي وراح يباركنا لانو نوينا الحلال،،، ربي يسهلك حنونتي

[مهموم مبتسم]

عليك بالاستخارة
كرري الامر والاكثار من الدعاء