عفوا اختى لم الاحظ موضوعك سامحينى ..... اى سؤال انا فى الخدمة
ابنى كان عمره ثلاث سنوات لما اخذته عند المختص كان يقول كلمات معدودة مثلا حليب....ماء ...بابا ..ماما ..وكان ميحبش يتكلم ابدا ويشيرلى على الحاجة الى حابها نقلو قولها ميحبش وانا كنت نستسلم ونعطيهالو...
كى نتكلم معاه نحسو ميفهمنيش ونحاول نبسط فى كلامى ونستعمل اشارات ومصلحات بسيطة
والمختص اول جلسة لابنى قالى ابنك راه مش حاب يكبر ومعندوش رصيد لغوى وحالتو وصفها تاخر لغوى
وقالى تكلمى معاه على قد متقدرى والعبى معاه وتكلمى فى نفس الوقت عطانى بزاف نصائح والحمد لله جابت نتيجة وولدى راه يتكلم وراه يقرى
نتمنى نكون افدتك واى سؤال رانى هنا

لم أفهم التوحد يخلق مع الطفل أي في جيناته أم من تربيتنا لهم ؟

ام شروفة كاين توحد مكتسب اى زيد الطفل لاباس عليه ومن كثرة التلفزيون او اكل معين يصاب بالتوحد وهاذا النوع ساهل باش يتعالج ويرجع الطفل لاباس
اما النوع الثانى فهو توحد فطرى يزيد مع البيبى وهاذا صعيب فى العلاج
ان شاء الله نحط فى هاذا القسم موضوع مفصل على التوحد

شكرا جزيلا ام ياسمين على الرد كنت متاكد انك ماشفتيش الموضوع. يعني من البداية ابنك ماكانش عندو توحد
انا لما اخدت بنتي عند الارتوفونيست قالتلي عندها توحد خفيف انا نشك فيه متوسط بصراحة كي نهدر مع بنتي متفهمنيش خلاص وتستغرق وقت كبير باش تفهم حاجة بسيطة مهما نشرح ونعاود . وماعندهاش التركيز. مختصة اخرى قالتلي بنتك عندها تاخر برك ماشي توحد لكن قلبي يتبع المختصة الاولى. بنتي عندها ستة اشهر وهي عند الاورتوفونيست يقولولي بلي تركز معاهم وتعاود التطبيقات وانا لاحظت تحسن لكن بوتيرة بطيئة. قولو الطفل كي يكمل ثلاث سنوات يقدر يطور بشكل افضل وما علابليش هدي معلومة صحيحة ولا خاطئة. واش هو رايك ام ياسمين بالنسبة لبنتي وعلى المعلومة.
ام شروفة الجواب اللي عطاتهولك ام ياسمين هداك هو الجواب على السؤال ديالك.

سلام اختى saraz
ممكن بنتك عندها توحد خفيف كيما قالتلك المختصة الاولى حتى انا كنت شاكة ابنى عندو توحد على حساب تصرفاته ولكن المختص قالى تاخر برك فى الحقيقة مصدقتوش قلت موش حاب يخلعنى برك لانو صاحب زوجى
انتى بنتك اذا كان عمرها اقل من ثلاث سنوات ومنعندهاش خاوتها فى الدار يتكلمو ويلعبو معاها بلاك تاخر برك لانها مزالت صغيرة
انا ابنى ديتو للمختص عمره ثلاث سنوات ونصف يعنى كبير علابيها كنت متخوفة
والحمد لله اربع اشهر مع الجلسات كانت كافية تحسن وزدت كملتلو فى الدار واش كان يدير معاه المختص
شريتلو العاب ذكاء والوان وعلمتو يلعب العاب بالميكرو ونتكلم معاه بزاف واهم حاجة قالهالى المختص الاحتكاك بالاطفال ونصحنى بالروضة ودخلتو اليها فترة صباحية فقط وبدا يقرى فى الحروف وعلموه ايات قرانية ...وفى العشية نعيط لولاد الجيران يلعبو معاه ونهار الجمعة يديه باباه لحديقة الاطفال يلعب مع الاولاد اكيد فى الاسابيع الاولى كان يهبلنا ميحب حتى واحد يلعب معاه وبالشوية ولا يخليهم يلعبو معاه فى الحديقة او البيت او الروضة
والحمد لله راه فى عام تحسن كبير على واش كان
انتى متخافيش على بنتك قربيها ليك بزاف واحكى معاها حتى ومتفهمكش سميلها كلش فى الدار مثلا رايحة تشرب حليبها قوليلها هذا سكر وهذا حليب وهذا بيبرو ديريه فى فمك وهاذى عينك وهاذى يدك والفواكه والخضر والالعاب و...........
مرات توصلى لمرحلة تكرهى وتقولى عييت بلا فائدة بصح صدقينى ديرى الارادة وراح تلاحظى فرق حتى خير من جلسات المختصة

نسيت حاجة كل يوم صباح نقرى عليه هذه الرقية
- تقرأ سورة الفاتحه
2- و آية الكرسي
3- و أخر ايتين من سورة البقره
آَمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ وَالْمُؤْمِنُونَ كُلٌّ آَمَنَ بِاللَّهِ وَمَلَائِكَتِهِ وَكُتُبِهِ وَرُسُلِهِ لَا نُفَرِّقُ بَيْنَ أَحَدٍ مِنْ رُسُلِهِ وَقَالُوا سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ (٢٨٥) لَا يُكَلِّفُ اللَّهُ نَفْسًا إِلَّا وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِنْ قَبْلِنَا رَبَّنَا وَلَا تُحَمِّلْنَا مَا لَا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنْتَ مَوْلَانَا فَانْصُرْنَا عَلَى الْقَوْمِ الْكَافِرِينَ (٢٨٦)

4- و سورة الاخلاص 3مرات
5- و سورة الفلق 3مرات
6- و سورة الناس 3مرات

ثم تقول بسم الله 3مرات

و تقول اعيذك بعزة الله وقدرته من شر ماتجد وتحاذر 7مرات
ثم تقول (بسم الله الذي لايضر مع اسمه شيئ في الارض ولافي السماء وهو السميع العليم)

و تقول ( استودعتك الله الذي لاتضيع ودائعه)

ثم تمسح على راس الطفل وجسمه
وهكذا ترتاح الام من العين والامراض ومن العدوى من الاطفال وكل شي مقدر ومكتوب (قل لن يصيبنا الاماكتب الله لنا)
(ولا يرد القدر إلا الدعاااء


وادعيلى معاك اختى

شكرا جزيلا ام ياسمين
حاليا بنتي عندها 28 شهر وهي الكبيرة وكيما قولتي عاشت وحدها حتى الجيران ماكانش عندهم الدراري الصغار الاغلبية كبار. وبديت نعالج فيها من لي كان في عمرها عام ونص والحمد لله راهي تتحسن بالعقل. ما بداتش تهدر. اللغة عندها شبه منعدمة. بالنسبة للالعاب راني نشريلها .
ويعطيك الصحة على الرقية خصوصا هدو ليامات تبات الليل طول وهي تبكي رايحة نقراهالها.
وكيما قولتي في موضوع اخر كاين ناس عندهم اطفال متوحدين ومعلابلهمش. يمكن انت انتبهتي لوليدك وطلع معافى ربي يخليهولك ويفرحك بيه وانا تولهت لبنتي كاين غيرنا يقولو ولادنا تقال برك والحكاية تكبر وهما غافلين ربي يشافي كل مريض ويفرج عليه
وجزاك الله كل خير ام ياسمين

لاشكر على واجب اختى
انتى بنتك مزالت صغيرة وراح تتجاوب بالعقل وتولى تهدر كلش باذن الله
يارب يشافى كل اطفال المسلمين والمسلمات

من فضلك اختي اسفة على الازعاج حبيت نطمن على بنتك كيفاه راها لان هدرت ولا مازال وعند اي طبيب ديتيها اول مرة ارجوكم افيدوني راني تائهة مع ابني

اختي ماكان حتى ازعاج بالعكس نتمنى نفيدك انا وباقي الاخوات
بالنبة لبنتي قريب تكمل عامين ونص، اول مرة ديتها عند طبيبة اطفال كان عمرها عام ونص قالتلي مازلت صغيرة بصح انا ماحبيتش نقعد ونستنى، ديتها عند neurologie ديرتلها تخطيط للراس والحمد لله والو مابيها، مبعد ديتها عند ORL باش كشفت على السمع والحمد لله. وليت ديتها عند لورتوفونيست تم درنا تاست ولقينا عندها توحد خفيف وهدي هي الحاجة اللي كونت شاكة فيها ، ةقالتلي حتى تكمل عامين باش نبدوى معاها الخدمة بصح انا قعدت نحلل فيها حتى قبلت تحكمهالي. وراني نديها كل 3 اشهر عند Pédopsychiatre باش نتبع التحسن ديالها. ورايحة نقولك من العام اللي فات للعام هدا بنتي راهي تتحسن وبدات تفهم الاوامر والاشياء وتلعب مع الدراري ماشي بزاف مي نقول الحمد لله.
حبيت لوكان تهدرنا على وليدك قداش في عمرو واش راه مقلقك فيه وربي يجيب اللي فيه الخير. اي حاجة راني في الخدمة

شكرا لك اختي الكريمة انا ابني عمرو عامين وشهرين كان عادي في الصغر تاعو لكن تعرفي وليت نحطلو بزاااااف قناة طيور الجنة من بعد لاحظت عليه تغير كان بدا يقول بعض الكلمات والان ماراهو يقول حتى شيء مرات يفهمني عادي ومرات نحسو ماشي مركز معايا مرات نعيط لو مايخزرش فيا ومرات لالا يسمعني ويجي يجري والله حيرني والمشكل انو باباه من نقولو يقولي لالا راهو عادي غير تأخر في النطق وزاد التلفزيون اثر عليه شوية والله مرات نقعد نبكي والدنيا تضايق عليا ومرات نقول الحمد الله وماعرفت واش نعمل حتى انا مرات نقول عامل نفسي لانو من نهار ختناه تغيرت طباعه بزاف رجع يخاف وتبدل والله اعلم

تقدري تقوليلي كيفاه عامل التاست تاع التوحد يعني تسالكم عليه وعلى تصرفاته ولا هي تتعامل معاه وحدها ارجوك افيديني راني في حيرة وعلى السمع متاكدة بلي يسمع مليه مرات غير يحبس باباه بالطوموبيل عند الباب يروح يجري يستناه

واختي بنت دوك بدات تتكلم ولا مازالت