برنوس الشخشوخة نتاعي بالتفصيل و الصور

[ام كوكو]

السلام عليكم اليوم حبيت نوريلكم برنوس الشخشوخة نتاعي بسم الله نبدا
للعجينة يلزم سميد من الافضل ناعم+ملح و نبل بالماء



نخلط المكونات و نبل بالماء شوية شوية و ندلك جيدا و نرش بالماء حتى نتحصل على عجينة رطبة و رخوة كي نهزها لفوق تنزل وحدها



هنا نديرها كرات صغيرة ونغطيها ببلاستيك او قماش مبلول بالماء و نحطها ترتاح



بعدما ترتاح نحط طاجين الحديد فوق الطابونة بنار خفييفة و نرش عليه شوية زيت و نبدا بسم الله
نحل كرة من العجين بالزيت فوق طابلة ملساءبحيث نركز على فتح الاطراف رقاق و ما يهمش الوسط كي نهز الورقة يتحل
ندخل ظهر اليد اليسرى تحت طرف الورقة و نرفع شوية مع السحب لليسار ثم ندخل ظهر اليد اليمنى ونكسل العجين و شوفي كيفاش تكسلت الورقة من الوسط



نرميها في الطاجين كي تبياض نقلبها و نرشها بشوي زيت و نحل كرة اخرى نرميها ثم نقلب و نرش شوي زيت وهكذا حتى نكمل البرنوس ثم نهز من الوسط و نخلي الاطراف طيب




نحل الورقات عن بعضهم البعض و نفتتها كبيرة شوية و الحمد لله خلصت من البرنوس




نروح للمرقة
انا درت دجاج و مرات نخلط دجاج و لحم احمر+بصل رابي+ثوم+حبة طماطم+بطاطا+جريوات+خردل+ملح+فلفل اسود+راس الحانوت+فلفل احمر+فلفل عكري اختياري +زيتاو زبدة او سمن و نحطهم يتقلاو شوية ثم نزيد كمية ماء قليلة و نخلي يزيدو يتقلاو



نمرق بالماء و نخليها حتى توصل نص طياب
نزيد نرمي طماطم مصبرة+فلفل اخضر حار او حلو انا درت الحلو



ندير الكسكاس فوق المرق و نفور الشخشوخة بكميات قليلة باه ما تتنداش بزاف لي تحت
كي طيب المرقة نحي الجاج و البطاطا و نحمرهم في المقلة مع شوية زبدة او خليهم عادي



وهاهي شخشوخة ام كوكو مرة بالجاج و مرة خلطت جاج و لحم خروف و اذا ما كانش تقدري تخدميها ير بالخضار و تجي مليحة ان شاء الله تعجبكم و ديروها و الله ولي التوفيق





و بنفس الطريقة و عملت بيهم المحجوبة