عسل ومعجون الحليب

[مليديا 08]

مرحبا بيكم

قلت نوريلكم طريقتي في تحضير العسل وهي طريقة ناجحة وعمرها ما تولي سكر
العسل
المقادير :
1 كغ سكر
نصف لتر ماء
شوية شب
فنجال صغير ماء
التحضير:
ليلة من قبل ديري حيلة فرغي فيها السكر ( نحي منو 2 مغارف كبار) والماء وخلطي مليح وخليها في البلاكار ومرة على مرة روحي وحركي باش يدوب السكر .
غدوا منداك
ديري كاسرونة وفرغي فيها 2 مغارف سكر لي نحيناهم من الكيلو وديريهم فوق النار حتى يولو كراميل وحركي بالفوي
وهنا تتحكمي في لون العسل إذا حبيتيه كلار متخليش الكراميل يحمار بزاف .


ثم فرغي من الفوق السكر ألي دوبناه في الماء وشلي الحيلة ديالك بفنجال صغير تع الماء

ورميلو حجرة صغيرة تع الشب وفي كل مرة حركي بالفوي حي يدوب الكراميل وتكون النار خفيفة
حتى يغلي

بعد ما يغلي نقصي للنار وأحسبي 15 د (على نار خفيفة)
بعد 15د زيدي للنار وأحسبي 5د وطفيلو ويكون لعسل وجد


وصراحة أنا دايما نستعمل هاد العسل في كل شيء
وإذا حبيتيه يكون عندو ريحة العسل، أنا نطيب 5 كغ على مرة وبعد مايبرد نزيدلو باطة صغيرة تع عسل المرجان
جي ريحة روعة

معجون الحليب

المقادير:
نصف لتر حليب
200غ سكر قلاص (أنا نستعمل المرجان)
لافاني
التحضير:

في كاسرونة تكون ثقيلة فرغي الحليب والسكر وديريها فوق النار وحركي حتى يغلي




بعد مايغلي نقصي للنار وتكون خفيفة مليح وخليه مدة ساعة وانت في كل مرة تحركيه
أهنا بد ما غلى

وهنا بعد ما جازت نص ساعة واللون ديالو بدا يتبدل

وشوفو كي تفوت ساعة كيفاش يولي وكي تنحيه من النار ديريلو شوية لافاني

أيبانلك سائل بصاح غير يبرد يشد روحو

أنا صراحة نلصق به الصابلي ونديرو فوق الكيك ولا فوق الديسير أيجي هايل
ان شاء الله يعجبوكم وادعولها ليما بالرحمة