هل أنا معقدة كيما يقولو عليا ؟

[مشكلتي]

بسم الله الرحمن الرحيم
السلام عليكم ورحمة الله وبركاته



والله ماني عارفة منين نبدا

.....
المهم ، أنا متخرجة من الجامعة ونخدم فالإدارة ، متدينة وحجابي شرعي
بداو الناس يخطبوني من كنت نقرا فالثانوية ، لكن فهاذيك المرحلة كنت رافضة الزواج ونكره جنس آدم
من بعد كي قريت فالجامعة تفتحت عقليتي شويا وليت متقبلة هاذ الموضوع
بصح المشكل تاعي كلما يجيني واحد نشرط عليه أمور نشوفها من حقي، وتبان أمور بسيطة وفي صلاحو هو
نشرط يكون يصلي فالمسجد جماعة ، خاصة صلاة الصبح والعشاء
أنا عقليتي تقولي : اللي ما يفرطش فالفجر وكون حريص عليه ما يفرطش فيك
هذا الشرط الأول ، وسبحان الله اللي جاوني كاااامل ما ينوضوش للفجر ، ولا ينوضولو ساعااااااات
يعني خطرة فالسمانة ولا فالشهر
أنا مع يقولولي هكذا يطيحو من عيني ونحاوزهم مباشرة
ولاحظت بلي كي نرفضو ويروح يعجبني الحال بزااااااف تقول جبل وتنحى على ظهري !
عايلتي وصحاباتي يقولو عليا معقدة ومستحيل تتزوجي بهاذ التخمام
وكاين شيخ سقسيتو عل هاذ الحالة ، قالي نتي بالاك تحتاجي ديري رقية مادمت تفرحي كي ترفضيهم
قالي سكنك جني مسلم من صغرك ولازم ترقي
بصح انا ما نحبش نروح عند الراقي ، لعدة أسباب :
ـ في وقتنا صعب تلقى راقي ثقة ، شخال من خطرة نسمع بنات تخدعو فيهم ، لقاوهم مشعوذين بعدما راحو ليهم
ـ ديما نتساءل : ياخي الراقي مسلم ماهوش معصوم ، رايح يقرا عليا قرآن وينوض
وانا ثاني مسلمة عادية مانيش معصومة ، ونقدر نقرا على روحي ، مالا ما عندها حتى معنى اني نروح لراقي
وأصلا الله هو الشافي


المهم راني عارفة طولت عليكم
حابة تنصحوني
ورحمة على والديكم الردود اللي فيها سخرية واستهزاء لا داعي لها
ورحم الله من عرف قدر نفسه