تيراميسو من اروع ما يكون

[اميريم19]

السلام عليكم

منذ سنوات سمعت بالتيراميسو فجربت الكثير من الوصفات ثم بحثت على الوصفة الايطالية الاصلية ولانه ماعنديش جبنة الماسكاربون اضطريت نعدل في الوصفة حتى وصلت للوصفة المثالية لي اعتمدتها منذ 3 سنوات بزاف بنينة وناجحة فرميت كل الوصفات القديمة وراني متاكدة اذا جربتوها انتوما ايضا رايحين تعجبكم وتعتامدوها
تقدروا تديروها في اكواب او في صحن كبير تاع الفرن ثم تقسموها مربعات

المقادير ل8 اكواب

3بيضات
100غ سكر
100غ شانتيي غربة
200غ حليب
2علب فرماج الامير او250غ اي جبن طازج او جبن ابيض عادي
16 بودوار واذا درتي صحن كبير يلزملك 24
قهوة طايبة وباردة مليح اونسكافي نخليها في الماء تكون ثقيلة اذا تحبي ذوق القهوة يكون قوي او خفيفة اذا حبيتيه معتدل انا مانديرهاش ثقيلة بزاف
كاكاو للتزيين

التحضير

باش تجيني ساهلة نحضر 3 اواني واحدة نحط فيها بياض البيض والثانية الشانتيي مع الحليب والثالثة الصفار مع السكر


نخفق بالباتور وبالترتيب بياض البيض كالثلج ثم بلا ما نغسل الفوي تاع الباتور نضرب مباشرة الشانتيي حتى تحكم روحها مليح ثم مباشرة بلا مانغسل الفوي نزيد نضرب الصفار مع السكر حتى يبياض
نضيف الجبن نضرب فقط بضع ثواني بسرعة قليلة فقط حتى يتخلط ومانزيدش نستعمل الباتور


نضيف الشانتيي بملعقة او سباتيل برفق ثم البياض على مرتين وانا نحرك بالشوية من تحت الى فوق كيما نخدم الجينواز


نحط الكريمة في الثلاجة
نحضر القهوة والاكواب
نقسم حبة البودوار على 2 ونغطس في القهوة ونحيها مباشرة مانخليهاش تتشرب بزاف القهوة ثم نحطها في الكوب


نزيد فوقها طبقة اولى من الكريمة


نعاود نفس العملية وندير طبقة ثانية تاع البودوار


نحط فوقها طبقة ثانية تاع الكريمة
[IMG]ht

نسوي مليح ونزين من فوق بالكاكاو مع استعمال الصفاية
نخليها على الاقل 4 ساعات في الثلاجة اذا استعملت الاكواب و8 ساعات على الاقل اذا كانت في بلا كبير باش تقدري تقطعيها مربعات مايفسدلكش الشكل
راهي واجدة تمتعي بذوقها الراااائع وبالصحة