هل اوافق على الخطبة

[مشكلتي]

السلام عليكم
انا من الغرب عمري 18 و حبست القراية منذ سنة
راني قاعدة في الدار
كاين شاب يريد التقدم لخطبتي و انا جد محتارة مع اني صليت الاستخارة
الشاب الناس تشكر فيه متربي و باغيني عائلته مليحة و يحبوني ونعرف مع انهم بسطاء الا انهم يبغوا يعيشو مليح
عنده alimentation و ماعندهش بيت يعني ان قبلت سأسكن مع اهله
واهلي خلاولي القرار ليا بصح شايفتهم موافقين
انا في الاول وافقت مبدئيا لأانو خطبني شحال من واحد
مي كلهم مايعرفونيش هذا الوحيد اللي يعرفني و راه باغيني ومصر عليا هو جارنا و اخ صديقتي
ثم فكرت بطريقة ثانية
المشكل هو انني مدللة والفت حياة الرفاهية عمري ما طلبت حاجة و قالولي لا و عمري ماتمنيت حاجة و ماشراوهاليش
و الشاب هاذا من عائلة بسيطة وخدمته بسيطة خايفة مانقدرش نبدل عيشتي ونتحمل المسؤولية خصوصا اني رايحة نعيش مع اهله
واش تقترحوا عليا انا مازالني صغيرة واش نستنى يخطبني رجل احسن ولا كيفاش ; انا مازال ماعرفت واش يصلحلي و واش راني باغية
مادابيا تنصحوني مالقيتش اللي ينصحني

[abdel02]

انصحك بالذي يحبك....انت اللي لازم تعاونيه باش يكون نفسو ويدير الدراهم......اما المترف....اذا ماكانش بخيل ...ربما يكون عوج....ويزيد يكون متقلب وما يفرغلكش لكثرة مشاغله....استخيري واستشيري وتوكلي على الله.

[faridos]

يا اختي ليكن في علمك ان الرزاق هو الله ..فالشاب اذا كان بمقدوره الزواج اي تكاليف العرس وكان عاملا وذا خلق فلماذا لا ترضين به ..واعلمي ان رزقك ليس مرتبط بزوجك او شخص اخر فاذا كان رزقك ضيق حتى لو تزوجت بغني الدنيا الفقر يلاحقك .

[بنت الحجاج]

إذا مازلتي حابة تدَلـِي

غير اقعدي في داركم

أحسنْ ليكْ

و أحسنْ ليهْ

[ريماس]

اختي المشكل مش مشكل ماديات

مي اختي الراجل الي ماعندوش سكن
نقل راكي راح طيشي روحك في النار
تفوتي اشهر في العسل وبعد تبدى المشاكل راكي تعرفي العيلة يبانولك ناس املاح وبعد يبنولك الوجه الاخر

[نجمة ساطعة]

شوفي اختي اقبلي بشرط تنسي داركم و تنسي دلال و بلا ما تقعدي كل شوي تحسيه بلي درتي مزية تزوجتيه

باش تعيشي لاباس عليك غير هاك ننصحك مازال راكي على البر خير من طلاق و وولاد و ضياع

بصح بين قوسين الهنا عمرو ما كان بالمال اذا كنت حابة الشخص راحة البال تسوى الدنيا و ما فيها

[saydek xxo]

السلام عليكم ورحمة الله

بما انك قلت انك حبست لقراية .....هذا يعني انا حياة الرفاهية لم تعد في يدك..انت تعيشين في رفاهية والديك وهي غير دائمة ومن هنا لا ارى اي مشكل في قبولك به اذا كان ولد حلال وانسان قادر...تقبلي مروري

[nnas2003]

سلام عليكم
نقولك اختي حياة الدلال ماشي دايمة
بيناتنا شحال تعياي في الدلال و الرفاهية
الراجل حاب يتزوج و شلفك غير انت
و راكي تخمي على متطلباتك و فقط
ديري في بالك الرزاق ربي
تقدري تتزوجي بيه يكون متوسط الدخل ـ ايا ربي يجيبلو آفار تع 2 ملايير حتى تولي شبيك لبيك الحاجة لي تطلبيها بين يديك و يولوا واش نقولك السيارة - الذهب بين يديك - سكنى - كليماتيزور مع الصيف هذا انشاء الله - القلب اللوز و الزلابية و القطايف في رمضان إن شاء الله
اتوكلي على الله و اتزوجي
و السلام عليكم

[عكس التيار]

ابقي في بيتك حتى يفوت الاوان

[imi02i]

يروحلك الدلال تاع داركم
يجيك دلال وحد آخـر
خصوصا إذا راهو صح باغيك ومصر عليك

[نورسان]

المشاركة الأصلية كتبت بواسطة بنت الحجاج

إذا مازلتي حابة تدَلـِي

غير اقعدي في داركم

أحسنْ ليكْ

و أحسنْ ليهْ

علاش هاد الرد الجارح
الطفلة ماكتبت والو راهي غير تطرح في المشكل نتاعها كون جا عينها مازالت حابة تدلل كان ماطرحتش المشكل

اما لصاحبة الموضوع نقولك يا اختي سقسي مليح وماتنسايش لا خاب من استخار ولا ندم من استشار
ربي يهنيك

[نجمة ساطعة]

المشاركة الأصلية كتبت بواسطة عكس التيار

ابقي في بيتك حتى يفوت الاوان

لا يوجد شيء اسمه يفوت الاوان ... فلن تدخل النار اذا لم تتزوج و الزواج لا يدخل الجنة

[حضنية28]

المشاركة الأصلية كتبت بواسطة عكس التيار

ابقي في بيتك حتى يفوت الاوان

ماهدا الرد المجحف يا اخي كل شئ قسمة ونصيب

[صالح الدين 92]

تحبي الصراحة ماكاش توافق اجتماعي بينكما إما التنازل منك أو الإنتظار ورحمك ربي واسعة مازلت صغيرة والخير للقدام خير ماتندمي والخير ما اختاره الله فكري مليح والقرار ديما ليك نسأل الله أن يبصرك بما يحب ويرضى لك

[bouzo]

يااختي يقول الرسول (ص) من ترضون دينه و خلقه فزوجوه, في معني الحديث, الغنا غنا النفس , المال ليس كل شئ ,و الزواج مكتوب , صلي الاستخارة , و لي فيه الخير يجيب ربي ان شاء الله,