خويا عفسلي في الزواج لان البنت من تنس (معامرية)

[karimtomy]

انا شاب اعمل في ولاية الشلف تعرفت على بنت من اسرة فقيرة تتكون من الاب والام وبنت و خوها
بعد 05 اشهر عرضت عليها الزواح قبلت بيا و قاتلي اهدر مع بويا .درت موعد معاه و اهدرت و قتلو رانب حاب نتقدم على سنة الله و رسول صلى اللله عليه وسلم./
انا بدوري خبرت العائلة واخي الكبيرفي عوض بويا
لكن اخي رفض لان البنت تسكن في تنس يعني معامرية
واحنا مانتزوجوش بالمعامريين
لكن ان لا اعرف هذا العرف والله ماني عارف حرت
اتكلمت مع البنت ضحكت عليا وقاتلي انت حر كيما اتحب لكن بنت تصلي وتخاف ربي+ بوها معلم تاع قرءان
ممكن من الاخوة افهموني على هذا العرف وعاداتهم

[طيبة نفس]

والله ما علابالي واش نقولك هذه العادات و التقلاليد لي ما عندهاش لازم عادي مادام رانا قاع من امة لااله الا الله التفرقة بين العروش

قضى عليها الاسلام اذا انت راك مقتنع بالبنت قنع خوك وربي يجيب الخير

[amina2688]

بالتوفيق انشاء الله وبي يوفق بلي فيه الخير والصلاحة
لكن واش تقصدوا بالمعامرية
شكرا

[karimtomy]

زواج الربع دينار

[dotZero]

لم أفهم
لكن أن كان المهر ربع دينار (ذهبي) فقط
و المصاريف قليلة
*
*
تبانلي نضرب دورة

*
*
فهم خوك بلي التمييز بين أبناء -الإسلام- لا معنى له و لا مبرر

[karimtomy]

المشكل هو ان لازم تتدخل في العرف تاحهم
بعد العقد تصبح معامري
يعني اذ رزقت ببنت لا زم تزوجها حسب العرف المعامري
يعني اذ خالفتهم يصيبك مكروه

[.زَيْنْ الْدِيِنْ.]

المشاركة الأصلية كتبت بواسطة karimtomy

المشكل هو ان لازم تتدخل في العرف تاحهم
بعد العقد تصبح معامري
يعني اذ رزقت ببنت لا زم تزوجها حسب العرف المعامري
يعني اذ خالفتهم يصيبك مكروه

ههههههههههههههههههه
والله غير اضحكتني تاع الصح

و من قال هذا أخي ؟؟؟

[سلمى_2008]

السلام عليكم لم افهم يا اخي مادا تقصد بمعمارية ؟؟؟؟ لكن الفقر يا اخي ليس بعيب فمعيار التفريق بين الناس هو التقوى وليس المااال

[أم احمد3]

لم نفهم كلنا ما معنى المعامرية
لكن نعم ستعاني المشاكل
يجب ان تفكر في الامر ان كانت المعامرة لها شروط في الاولاد والعادات اي تتدخل في حياتك
اصرف النظر وان شاء الله تجد المرأة المناسبة

[*نآدرة~]

أف،مازالو هاذ العادات صح في بعض المناطق
ماعنديش فكرة على المعامرة بالصح عندي فكرة على المرابطين كاين لي يقول المرابطين يتزوجوا غير مع المرابطين واذا واحد ماهوش مرابط تزوج بوحدة مرابطة تخرج فيه حاجة والله اعلم،صحيح انا مانامنش بهاذ الصوالح بالصح الناس تخليك تآمن بالسيف،الله يسامح اللي كان السبب في هاذ التفرقة ودار هاذ العادات والاعراف الباطلة
توكل على ربي واستخير واذا راهي من مكتوبك واحد ماراه رايح ينحيهالك
الله يوفقك ويسهل عليك

[abdel02]

السلام عليكم وصبا ح الخير على الجميع........
في الشلف........هناك وليين صالحين ينحدر منهما كل سكان الشلف..."سيدي معمر" واحفاده المعامريين...و"سيدي امحمد" واحفاده المحامديين....لايتزاوجون بينهم الى اليوم...وان تم الزواج وحدث مكروه......يرجعوها الى اللعنة...هذا مايمليه عليهم عقولهم...انت يا اخي اوصيك مادامك راضي بالفتاة وهي راضية بيك....شاور خوك بالحسنى...وقولوا انه لا فرق بين عربي ولا عجمي الا بالتقوى...وان هذه الحكاية من موروثات الاستعمار فرق بيها الشعب الجزائري............والله الموفق.

[حنان شلفية]

معامري ولا مرابط للان نفس المشكل وحب يضيع بسبب هدى تفهات
انا نعرف بزاف حالات افترقو بسبب هدى الشي لانو الاهل يتمسكو بهدى العادة ذميمة
ربي يهديهم هدى مكان وانت الا تحبها وشايف فيها زوجة صالحة تزوج بيها واقنع خوك واب نتاعها
وربي يجيب الخير

[مستفانم]

أنت ستتزوج بالبنت وليس بأهلها والعكس صحيح هي ستتزوج بك أنت وليس بأخيك وأهلك
عادات تافهة مع إحتراماتي
مازلنا نتبع عادات الجاهلية والقبلية
الزواج قسمة ونصيب
إن كانت علاقاتكما جادة فتوكل على الله

[karimtomy]

عندكم الصح لكن والله ماعرفت لا نرضي خويا لي في عوض بويا و لا ارضي البنت

[soso sirin]

شوف يا خويا انا من الشلف و انا من الي يقولو عليهم من سيدي معمر مي حنا في دارنا الحمد الله هاذا الشي مايتكزيزتاش كامل عندنا دير في بالك خويا مكان ني لعنة ني تدخل في عرفهم و لا تدخل هي في عرفك انا وحدا من الناس مانامنش كامل بهاذو الحوايج .حنا في دارنا اختي مادينها لمحمدي كي ما يقولو و كناينا كامل محمديين والحمد الله راهم عايشين لاباس.انا نعرف حاجة وحدا رانا كامل مسلمين امالا خلاص انت راك تقول الطفلة مليحة ماليها ملاح انا من عندي غير روح خطبها و ريح راسك رانا في 2012 و مازالنا نهدرو على حوايج كامل مكانش الناس تزوجو بمسيحيات و دخلوهم للاسلام و حنا مازالنا متناقرين على المحمدي و المعمري والله غير تبهديلة تاع صح اه تفكرت حاجة يقولو الطفلة ماتاكلش من عند راجلها قبل ماتروح ليه احنا نهار اختي عقدت جابولها مالين راجلها عشاها و كليناه و الحمد الله مامتنا ماوالو والله كي نشوف ناس يهدرو على هذا الموضوع الا راسي يحبس .انا ماما كي تولي تهدر على الاعراف نولي نهبل فيها و نقلها هذا انسان وخلاص تبع الرسول مادارش حاجة و نولي نقلق فيها و هي تتنارفا مني المرة الجاية مانهدرش كامل معاها مادام ناس مثقفين و راهي جاتهم حاجة غريبة ربي يهدينا