خجلي دمر حياتي

[مشكلتي]

انا فتاة عمري 17 سنة ادرس بالثانوية مشكلتي هي الخجل المفرط عاد يؤثر عليا سلبيا نخجل من كل صغيرة وكبيرة اعلابالي كامل رايحين تقولولي الحياء مليح للمرأة لكن انا تخطييت الحياء منحبش نكون محطة انظار الناس مثلا فالقسم مانشاركش اخلاص حتى لوكان متأكدة من الاجابة مئة بالمئة منقدرش نجاوب كي نحب نرفع يدي زعما باه نجاوب نحس رجليا فشلانين ونفشل كامل ووجهي يرجع احمر ودقات قلبي ترجع فالالف او مثلا يتكلم معايا اي شخص مهما كان صديقتي ولا احد افراد عائلتي مانشوفش فيهم كامل حتى خواتاتي نحشم منهم بالرغم من انهم اصغر مني فالسن رجعت منحبش نوقف مع الناس اذا وقفت يرجع وجهي احمر ونرجع نرجف ومنقدرش نوقف ومنقدرش نمشي لوحدي الا اذا كان معايا شخص اما اذا رجعنا للاولاد هادوك منحكيش معاهم كامل مثلا اذا سألني زميل ليا فالقسم على شيء يخص الدراسة كامل لي فالقسم ينتبهو عليا لانو نرجع غريبة وحمراء حتى الكلام مانعرفش نتكلم نرجع مننشافش رجعت بدون سبب نخجل اذا تكلمت معايا الاستاذة نخجل اذا نادتلي صديقتي نخجل حتى لوكان غير نضحك ولا نبكي نخجل رجعت مانعمل حتى حاجا بنفسي لازم يعملهالي شخص اخر حتى اذا رحت مثلا نشري شيء منشريش انا نقول لي معايا تشريلي او مثلا نحب ناخد شيء من عند اي بنت منذهبش انا لعندها نبعثلها بنت اخرى تروح عندها ومانشوفش في وجه اي شخص مهما كان حتى والديا اذا حبيت نطلب منهم شيء نقعد ساعة نفكر كيفاه نقولهم الا نروح انا ولا نرسل اختي حتى اذا كان الامر لا يستحق التفكير بتاتا او حتى اذا كان من اتفه الاشياء حتى صحاباتي عادو ينادولي الحشامة وعادو يعاملوني كي الطفلة الصغيرة لي تحشم ومتعرفش واش تعمل عادو يقولولي انت دايما المختبئة وراء الناس واذا قعدتي هاكدا ورحت لجامعة ماراحش تعيشي حاولي تنقصي شوي من خجلك لكن اين السبيل وكيف والله رجع الخجل رفيقي الدائم ورجع يتمشى في دمي والله كرهت حياتي نتمنى لوكان تساعدوني بنصائح مارانيش حابة نتخلى على خجلي كله ولكن حابة نقص منه شوي حابة نكون مثل كامل الفتيات ونمارس حياتي بشكل عادي نتمنى منكونش طولت اعليكم وشكرا مسبقا